比薩敧塔 kah 活跳 ê 日頭

Page(/daily/2022/04/20220401.md)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 比薩敧塔 kah 活跳 ê 日頭

這个霧霧 ê 天氣 成做大自然 ê 濾光片,予咱 tī 3 月 27 這工 ê 日落景色內底,連鞭 to̍h 看著有名 ê 建築。 太陽 to̍h chhāi tī 比薩大教堂 kah 有名 ê 比薩敧塔 之間。 Kah 太陽盤比–起來,遮大粒 ê 太陽烏子,看–起來嘛是烏烏一點。 這是 tī 太陽活跳區 第 2975 到 2976 區 ê 大粒烏子。 一工後,專門觀測太陽 ê 太空船 隨看著 活跳區 第 2975 區 噴出 活動力足強 ê 太陽閃焰,閣有 兩擺 ê 日冕物質噴出事件 (CME)。 Tī 3 月 31 這工,對磁層上大 ê 影響,就是驅動 地磁風暴 kah tī 懸緯度夜空 ê 極光3 月 30,活跳區 第 2975 區閣爆發矣! 這擺產生能量較懸 ê X-級 太陽閃焰,這會予地球面頂 ê 電波信號暫時斷–去。

[POJ] Pí-sat khi-thah kah Oah-thiàu ê Ji̍t-thâu

Chit-ê bū-bū ê thiⁿ-khì chiâⁿ-chò tāi-chū-jiân ê lū-kng-phìⁿ, hō͘ lán tī 3 goe̍h 27 chit-kang ê ji̍t-lo̍h kéng-sek lāi-té, liâm-mi to̍h khòaⁿ-tio̍h ū-miâ ê kiàn-tio̍k. Thài-iông to̍h chhāi tī Pí-sat Tōa-kàu-tn̂g kah ū-miâ ê Pí-sat khi-thah chi-kan. Kah Thài-iông-pôaⁿ pí–khí-lâi, chiah tōa-lia̍p ê Thài-iông-o͘-chú, khòaⁿ–khí-lâi mā-sī o͘-o͘ chi̍t-tiám. Che sī tī Thài-iông oa̍h-thiàu-khu tē 2975 kàu 2976 khu ê tōa-lia̍p o͘-chú. Chi̍t-kang āu, choan-mn̂g koan-chhek Thài-iông ê thài-khong-chûn sûi khòaⁿ-tio̍h oa̍h-thiàu-khu tē 2975 khu phùn-chhut oa̍h-tōng-le̍k chiok kiông ê Thài-iông siám-iām, koh ū nn̄g-pái ê Ji̍t-bián bu̍t-chit phùn-chhut sū-kiāⁿ (CME). Tī 3 goe̍h 31 chit-kang, tùi chû-chân siōng tōa ê éng-hióng, tō-sī khu-tōng tē-chû hong-pō kah tī koân hūi-tō͘ iā-khong ê ke̍k-kng. 3 goe̍h 30, oa̍h-thiàu-khu tē 2975 khu koh po̍k-hoat ah! Chit-pái sán-seng lêng-liōng khah koân ê X-kip Thài-iông siám-iām, che ē hō͘ Tē-kiû bīn-téng ê tiān-pho sìn-hō chiām-sî tn̄g–khì.

[KIP] Pí-sat khi-thah kah Uah-thiàu ê Ji̍t-thâu

Tsit-ê bū-bū ê thinn-khì tsiânn-tsò tāi-tsū-jiân ê lū-kng-phìnn, hōo lán tī 3 gue̍h 27 tsit-kang ê ji̍t-lo̍h kíng-sik lāi-té, liâm-mi to̍h khuànn-tio̍h ū-miâ ê kiàn-tio̍k. Thài-iông to̍h tshāi tī Pí-sat Tuā-kàu-tn̂g kah ū-miâ ê Pí-sat khi-thah tsi-kan. Kah Thài-iông-puânn pí–khí-lâi, tsiah tuā-lia̍p ê Thài-iông-oo-tsú, khuànn–khí-lâi mā-sī oo-oo tsi̍t-tiám. Tse sī tī Thài-iông ua̍h-thiàu-khu tē 2975 kàu 2976 khu ê tuā-lia̍p oo-tsú. Tsi̍t-kang āu, tsuan-mn̂g kuan-tshik Thài-iông ê thài-khong-tsûn suî khuànn-tio̍h ua̍h-thiàu-khu tē 2975 khu phùn-tshut ua̍h-tōng-li̍k tsiok kiông ê Thài-iông siám-iām, koh ū nn̄g-pái ê Ji̍t-bián bu̍t-tsit phùn-tshut sū-kiānn (CME). Tī 3 gue̍h 31 tsit-kang, tuì tsû-tsân siōng tuā ê íng-hióng, tō-sī khu-tōng tē-tsû hong-pō kah tī kuân huī-tōo iā-khong ê ki̍k-kng. 3 gue̍h 30, ua̍h-thiàu-khu tē 2975 khu koh po̍k-huat ah! Tsit-pái sán-sing lîng-liōng khah kuân ê X-kip Thài-iông siám-iām, tse ē hōo Tē-kiû bīn-tíng ê tiān-pho sìn-hō tsiām-sî tn̄g–khì.

[English] Leaning Tower, Active Sun

The natural filter of a hazy atmosphere offered this recognizable architecture at sunset view on March 27. Dark against the solar disk, large sunspots in solar active regions 2975 and 2976 are wedged between the Duomo of Pisa and its famous Leaning Tower. Only one day later, Sun-staring spacecraft watched active region 2975 unleash a frenzy of solar flares along with two coronal mass ejections. The largest impacted the magnetosphere on March 31 tiggering a geomagnetic storm and aurorae in high-latitude night skies. On March 30, active region 2975 errupted again with a powerful X-class solar flare that caused a temporary radio blackout on planet Earth.

詞彙學習(漢羅/POJ/KIP/華語/English)

  • 【濾光片】lū-kng-phìⁿ/lū-kng-phìnn/濾光片/filter
  • 【太陽盤】Thài-iông-pôaⁿ/Thài-iông-puânn/太陽盤/solar disk
  • 【太陽烏子】Thài-iông o͘-chú/Thài-iông oo-tsú/太陽黑子/sunspot
  • 【比薩大教堂】Pí-sat Tōa-kàu-tn̂g/Pí-sat Tuā-kàu-tn̂g/比薩大教堂/the Duomo of Pisa
  • 【比薩敧塔】Pí-sat khi-thah/Pí-sat khi-thah/比薩斜塔/the Leaning Tower
  • 【太陽活跳區】Thài-iông oa̍h-thiàu-khu/Thài-iông ua̍h-thiàu-khu/太陽活躍區/solar active region
  • 【太陽閃焰】Thài-iông siám-iām/Thài-iông siám-iām/太陽閃焰/solar flare
  • 【日冕物質噴出事件】Ji̍t-bián bu̍t-chit phùn-chhut sū-kiāⁿ/Ji̍t-bián bu̍t-tsit phùn-tshut sū-kiānn/日冕物質拋射/coronal mass ejection (CME)
  • 【磁層】chû-chân/tsû-tsân/磁層/magnetosphere
  • 【地磁風暴】tē-chû hong-pō/tē-tsû hong-pō/地磁風暴/geomagnetic storm
  • 【電波】tiān-pho/tiān-pho/電波/radio
  • 【緯度】hūi-tō͘/huī-tōo/緯度/high-latitude
  • 【極光】ke̍k-kng/ki̍k-kng/極光/aurora
  • 【第 2975 區】tē jī-kiú-chhit-ngó͘ khu/tē jī-kiú-tshit-ngóo khu/第 2975 區/region 2975
  • 【第 2976 區】tē jī-kiú-chhit-lio̍k khu/tē jī-kiú-chhit-lio̍k khu/第 2976 區/region 2976
  • 【3 月 27】saⁿ goe̍h jī-chhit/sann gue̍h jī-tshit/3 月 27/March 27
  • 【3 月 31】saⁿ goe̍h saⁿ-it/sann gue̍h sann-it/3 月 31/March 31
  • 【3 月 30】saⁿ goe̍h saⁿ-cha̍p/sann gue̍h sann-tsa̍p/3 月 30/March 30

  1. 阮嘛有 Podcast面冊InstagramTwitter,會逐工 kā 你提醒有新 ê 翻譯 kah 錄音。閣有 YouTube 頻道,有當時仔會出新 ê 影片,緊來追蹤! ↩︎

  2. 本站 ê 介紹 (台語/華語)FAQ (華語) ↩︎

  3. 看無台文?阮讀予你聽!已經錄過 ê 文章 ↩︎

昨昏 ê 圖:探索蝶鬚星系 明仔載 ê 圖:Nova Scotia ê 北極光