動畫：奇怪 ê 電波箍仔

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Animation: Odd Radio Circles
• 影片來源：插圖：Sam Moorfield; 觀測資料：CSIRO, HST (HUDF), ESA, NASA; 影像：J. English (U. Manitoba), EMU, MeerKAT, DES (CTIO); 文字：Jayanne English
• 台文翻譯：An-Li Tsai (NCU)

[漢羅] 動畫：奇怪 ê 電波箍仔

若是有一个逐家攏看袂著 ê 宇宙之謎，毋知你會按怎叫？ 像這个 奇怪 ê 電波箍仔，伊 ê 簡稱是 ORCs。 ORC-1 代表 5 个神祕天體，in 干焦會當 tī 電波頻率 看會著。 這是 2019 年 用 澳洲 新 ê SKA 探路者 電波陣列望遠鏡觀測 ê 時陣，無意中發現 ê。 影片內底上尾彼張影像，是 2021 年 南非 MeerKAT 電波陣列望遠鏡 ê 觀測資料。 按呢咱 to̍h 會當看著閣較清楚 ê 細節。 電波觀測資料是青色 ê，to̍h 疊 tī 暗能量巡天計畫 ê 光學/紅外線 觀測影像 面頂。 這个 ùi 動畫藝術家生出來 ê 插圖，才拄 kā ORC 起源 ê 其中一个概念舞予清楚。 Tī 星系中心，若是有兩个 超大質量烏洞合併，in 發--出 ê 震波 to̍h 會產生電波輻射 ê 箍仔。 這个箍仔 會愈來愈大，大到 kā 影片畫面攏櫼滿矣！ Kā 這支影片 搝 較遠來看，按呢咱 to̍h 會當追蹤 ORC 脹大到 100 萬 光年 闊 ê 狀況。 好咧佳哉，SKA 望遠鏡 會當 kā 咱鬥量 這个電波箍仔 kah 其他有可能 ê 科學現象。

[POJ] Tōng-ōe: Kî-koài ê Tiān-pho-kho͘-á

Nā-sī ū chi̍t-ê ta̍k-ke lóng khòaⁿ-bōe-tio̍h ê ú-tiū chi bê, m̄-chai lí ē án-ná kiò? Chhiūⁿ chit-ê kî-koài ê tiān-pho-kho͘-á, i ê kán-chheng sī ORCs. ORC-1 tāi-piáu 5 ê sîn-pì thian-thé, in kan-na ē-tàng tī tiān-pho pîn-lu̍t khòaⁿ-ē-tio̍h. Che sī 2019 nî iōng Ò-chiu sin ê SKA Thàm-lō͘-chiá Tiān-pho-tīn-lia̍t bōng-oán-kiàⁿ koan-chhek ê sî-chūn, bô-ì-tiong hoat-hiān ê. Iáⁿ-phìⁿ lāi-té siōng-bóe hit-tiuⁿ iáⁿ-siōng, sī 2021 nî Lâm-hui MeerKAT Tiān-pho-tīn-lia̍t bōng-oán-kiàⁿ ê koan-chhek chu-liāu. Án-ne lán to̍h ē-tàng khòaⁿ-tio̍h koh-khah chheng-chhó͘ ê sè-chiat. Tiān-pho koan-chhek chu-liāu sī chhiⁿ-sek ê, to̍h tha̍h tī Àm-lêng-liōng Sûn-thian-kè-ōe ê kng-ha̍k/âng-gōa-sòaⁿ koan-chhek iáⁿ-siōng bīn-téng. Chit-ê ùi tōng-ōe gē-su̍t-ka siⁿ-chhut-lâi ê chhah-tô͘, chiah tú kā ORC khí-goân ê kî-tiong chi̍t-ê khài-liām bú hō͘ chheng-chhó͘. Tī seng-hē tiong-sim, nā-sī ū nn̄g-ê chhiau-tōa-chit-liōng o͘-tōng ha̍p-pèng, in hoat--chhut ê chìn-pho to̍h ē sán-seng tiān-pho-hok-siā ê kho͘-á. Chit-ê kho͘-á ē lú-lâi lú-tōa, tōa kàu kā iáⁿ-phìⁿ ōe-bīn lóng chiⁿ móa ah! Kā chi̍t-ki iáⁿ-phìⁿ giú khah hn̄g lâi khòaⁿ, án-ne lán to̍h ē-tàng tui-chong ORC tiùⁿ-tōa kàu 100 bān kng-nî khoah ê chōng-hóng. Hó-lí-ka-chài, SKA bōng-oán-kiàⁿ ē-tàng kā lán tàu niû chit-ê tiān-pho-kho͘-á kah kî-tha ū khó-lêng ê kho-ha̍k hiān-siōng.

[KIP] Tōng-uē: Kî-kuài ê Tiān-pho-khoo-á

Nā-sī ū tsi̍t-ê ta̍k-ke lóng khuànn-buē-tio̍h ê ú-tiū tsi bê, m̄-tsai lí ē án-ná kiò? Tshiūnn tsit-ê kî-kuài ê tiān-pho-khoo-á, i ê kán-tshing sī ORCs. ORC-1 tāi-piáu 5 ê sîn-pì thian-thé, in kan-na ē-tàng tī tiān-pho pîn-lu̍t khuànn-ē-tio̍h. Tse sī 2019 nî iōng Ò-tsiu sin ê SKA Thàm-lōo-tsiá Tiān-pho-tīn-lia̍t bōng-uán-kiànn kuan-tshik ê sî-tsūn, bô-ì-tiong huat-hiān ê. Iánn-phìnn lāi-té siōng-bué hit-tiunn iánn-siōng, sī 2021 nî Lâm-hui MeerKAT Tiān-pho-tīn-lia̍t bōng-uán-kiànn ê kuan-tshik tsu-liāu. Án-ne lán to̍h ē-tàng khuànn-tio̍h koh-khah tshing-tshóo ê sè-tsiat. Tiān-pho kuan-tshik tsu-liāu sī tshinn-sik ê, to̍h tha̍h tī Àm-lîng-liōng Sûn-thian-kè-uē ê kng-ha̍k/âng-guā-suànn kuan-tshik iánn-siōng bīn-tíng. Tsit-ê uì tōng-uē gē-su̍t-ka sinn-tshut-lâi ê tshah-tôo, tsiah tú kā ORC khí-guân ê kî-tiong tsi̍t-ê khài-liām bú hōo tshing-tshóo. Tī sing-hē tiong-sim, nā-sī ū nn̄g-ê tshiau-tuā-tsit-liōng oo-tōng ha̍p-pìng, in huat--tshut ê tsìn-pho to̍h ē sán-sing tiān-pho-hok-siā ê khoo-á. Tsit-ê khoo-á ē lú-lâi lú-tuā, tuā kàu kā iánn-phìnn uē-bīn lóng tsinn muá ah! Kā tsi̍t-ki iánn-phìnn giú khah hn̄g lâi khuànn, án-ne lán to̍h ē-tàng tui-tsong ORC tiùnn-tuā kàu 100 bān kng-nî khuah ê tsōng-hóng. Hó-lí-ka-tsài, SKA bōng-uán-kiànn ē-tàng kā lán tàu niû tsit-ê tiān-pho-khoo-á kah kî-tha ū khó-lîng ê kho-ha̍k hiān-siōng.

[English] Animation: Odd Radio Circles

What do you call a cosmic puzzle that no one expected to see? In this case, Odd Radio Circles, aka ORCs. ORC-1 typifies the enigmatic five objects, only visible at radio frequencies, that were serendipitously discovered in 2019 using the new Australian SKA Pathfindern_Square_Kilometre_Array_Pathfinder) radio array. The final image in the featured video uses 2021 data from the South African MeerKAT array to reveal more detail. The radio data, assigned turquoise colors, are combined with a Dark Energy Survey optical/IR map. The animated artist's illustration explores just one idea about the ORCs' origins. If two supermassive black holes merge in the center of a galaxy, the associated shockwaves could generate rings of radio radiation. These grow to fill the video frame. The video zooms out so the expansion the ORC can be tracked until it is about a million light-years across. Fortunately, the up-coming Square Kilometer Array can help test this and other promising scenarios.

詞彙學習