土衛六 Titan ê 海洋 反射 太陽光

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Titan Seas Reflect Sunlight
• 影像來源：NASA, JPL-Caltech, U. Arizona, U. Idaho
• 台文翻譯：An-Li Tsai (NCU)

[漢羅] 土衛六 Titan ê 海洋 反射 太陽光

土衛六 Titan ê 表面，是按怎會閃閃爍爍、遮爾光？ 有一个可能：是液態海洋反射 太陽光 。 土衛六 Titan 有 足濟平平平 ê 甲烷湖。 若是角度有著，海洋 to̍h 會 親像鏡按呢反射太陽光。 Cassini 機器人太空船 tī 2004 到 2017 年 踅土星 leh 行。 這張相片 是假色相片，是 Cassini 太空船 tī 2014 年 用 會迵過雲 ê 無仝波段紅外線 翕 這粒 厚雲 ê Titan。 這款反射 是 遮爾光，光到 Cassini 太空船其中一台紅外線 kha-mé-lah ê 感光已經飽矣。 雖罔講 這个 太陽爍光 是有較 困擾，毋閣伊嘛是 有貢獻。 反射區證明講，Titan ê 北方有較闊、較複雜 ê 海洋陣列，伊 ê 幾何圖樣 暗示講，這馬是 tī 一个有明顯蒸發作用 ê 時期。 Cassini 太空船 已經飛過這粒 咱太陽系 上神祕 ê 衛星幾若擺矣。 伊 kā 咱講，Titan 是一个有 活跳天氣 ê 世界。 伊定定會落雨，落 ê 是 液態 gá-suh。

[POJ] Thó͘-ūi-la̍k Titan ê Hái-iûⁿ hoán-siā Thài-iông-kng

Thó͘-ūi-la̍k Titan ê piáu-bīn, sī án-ná ē siám-siám-sih-sih, chiah-nī kng? Ū chi̍t-ê khó-lêng: Sī e̍k-thài hái-iûⁿ hoán-siā Thài-iông-kng. Thó͘-ūi-la̍k Titan ū chiok-chōe pêⁿ-pêⁿ-pêⁿ ê kah-oân-ô͘.。 Nā-sī kak-tō͘ ū tio̍h, hái-iûⁿ to̍h ē chhiⁿ-chhiūⁿ kiàⁿ án-ni hoán-siā Thài-iông-kng. Cassini Ke-khì-lâng Thài-khong-chûn tī 2004 kàu 2017 nî se̍h Thó͘-chhiⁿ leh kiâⁿ. Chit-tiuⁿ siòng-phìⁿ sī ká-sek siòng-phìⁿ, sī Cassini Thài-khong-chûn tī 2014 nî iōng ē thàng kòe hûn ê bô-kâng pho-tōaⁿ âng-gōa-sòaⁿ hip chit-lia̍p kāu-hûn ê Titan。 Chit-khoán hoán-siā sī chiah-nī kng, kng kàu Cassini Thài-khong-chûn kî-tiong chi̍t-tâi âng-gōa-sòaⁿ kha-mé-lah ê kám-kng í-keng pá ah. Sui-bóng-kóng chit-ê Thài-iông sih-kng sī ū khah khùn-jiáu, m̄-koh i mā-sī ū kòng-hiàn. Hoán-siā-khu chèng-bêng kóng, Titan ê pak-hong ū khah khoah, khah ho̍k-cha̍p ê hái-iûⁿ tīn-lia̍t, i ê kí-hô tô͘-iūⁿ àm-sî kóng, chit-má sī tī chi̍t-ê ū bêng-hián cheng-hoat chok-iōng ê sî-ki. Cassini Thài-khong-chûn í-keng poe-kòe chit-lia̍p lán Thài-iông-hē siōng sîn-pì ê ūi-chhiⁿ kúi-ā-pái ah. I kā lán kóng, Titan ū chi̍t-ê ū oa̍h-thiàu thiⁿ-khì ê sè-kài. I tiāⁿ-tiāⁿ ē lo̍h-hō͘, lo̍h ê sī e̍k-thài gá-suh.

[KIP] Thóo-uī-la̍k Titan ê Hái-iûnn huán-siā Thài-iông-kng

Thóo-uī-la̍k Titan ê piáu-bīn, sī án-ná ē siám-siám-sih-sih, tsiah-nī kng? Ū tsi̍t-ê khó-lîng: Sī i̍k-thài hái-iûnn huán-siā Thài-iông-kng. Thóo-uī-la̍k Titan ū tsiok-tsuē pênn-pênn-pênn ê kah-uân-ôo.。 Nā-sī kak-tōo ū tio̍h, hái-iûnn to̍h ē tshinn-tshiūnn kiànn án-ni huán-siā Thài-iông-kng. Cassini Ke-khì-lâng Thài-khong-tsûn tī 2004 kàu 2017 nî se̍h Thóo-tshinn leh kiânn. Tsit-tiunn siòng-phìnn sī ká-sik siòng-phìnn, sī Cassini Thài-khong-tsûn tī 2014 nî iōng ē thàng kuè hûn ê bô-kâng pho-tuānn âng-guā-suànn hip tsit-lia̍p kāu-hûn ê Titan。 Tsit-khuán huán-siā sī tsiah-nī kng, kng kàu Cassini Thài-khong-tsûn kî-tiong tsi̍t-tâi âng-guā-suànn kha-mé-lah ê kám-kng í-king pá ah. Sui-bóng-kóng tsit-ê Thài-iông sih-kng sī ū khah khùn-jiáu, m̄-koh i mā-sī ū kòng-hiàn. Huán-siā-khu tsìng-bîng kóng, Titan ê pak-hong ū khah khuah, khah ho̍k-tsa̍p ê hái-iûnn tīn-lia̍t, i ê kí-hô tôo-iūnn àm-sî kóng, tsit-má sī tī tsi̍t-ê ū bîng-hián tsing-huat tsok-iōng ê sî-ki. Cassini Thài-khong-tsûn í-king pue-kuè tsit-lia̍p lán Thài-iông-hē siōng sîn-pì ê uī-tshinn kuí-ā-pái ah. I kā lán kóng, Titan ū tsi̍t-ê ū ua̍h-thiàu thinn-khì ê sè-kài. I tiānn-tiānn ē lo̍h-hōo, lo̍h ê sī i̍k-thài gá-suh.

[English] Titan Seas Reflect Sunlight

Why would the surface of Titan light up with a blinding flash? The reason: a sunglint from liquid seas. Saturn’s moon Titan has numerous smooth lakes of methane that, when the angle is right, reflect sunlight as if they were mirrors. Pictured here in false-color, the robotic Cassini spacecraft that orbited Saturn from 2004 to 2017 imaged the cloud-covered Titan in 2014 in different bands of cloud-piercing infrared light. This specular reflection was so bright it saturated one of Cassini’s infrared cameras. Although the sunglint was annoying – it was also useful. The reflecting regions confirm that northern Titan houses a wide and complex array of seas with a geometry that indicates periods of significant evaporation. During its numerous passes of our Solar System’s most mysterious moon, Cassini has revealed Titan to be a world with active weather – including times when it rains a liquefied version of natural gas.

詞彙學習（漢羅/POJ/KIP/華語/English）

• 【土衛】Thó͘-ūi/Thóo-uī/土衛/Saturn’s moon
• 【甲烷】kah-oân/kah-uân/甲烷/methane
• 【液態】e̍k-thài/i̍k-thài/液態/liquid
• 【假色】ká-sek/ká-sik/假色/false-color
• 【Cassini 機器人太空船】Cassini Ke-khì-lâng Thài-khong-chûn/Cassini Ke-khì-lâng Thài-khong-tsûn/卡西尼機器人太空船/robotic Cassini spacecraft
• 【Cassini 太空船】Cassini Thài-khong-chûn/Cassini Thài-khong-tsûn/卡西尼太空船/Cassini spacecraft
• 【紅外線】âng-gōa-sòaⁿ/âng-guā-suànn/紅外線/infrared
• 【太陽爍光】Thài-iông sih-kng/Thài-iông sih-kng/陽光閃爍/sunglint
• 【海洋陣列】hái-iûⁿ tīn-lia̍t/hái-iûnn tīn-lia̍t/海洋陣列/array of seas
• 【幾何圖樣】kí-hô tô͘-iūⁿ/kí-hô tôo-iūnn/幾何圖案/geometry
• 【液態 gá-suh】e̍k-thài gá-suh/i̍k-thài gá-suh/液化天然氣/liquefied natural gas
• 【2004 年】jī-khòng-khòng-sù nî/jī-khòng-khòng-sù nî/2004 年/in 2004
• 【2017 年】jī-khòng-it-chhit nî/jī-khòng-it-tshit nî/2017 年/in 2017
• 【2014 年】jī-khòng-it-sù nî/jī-khòng-it-sù nî/2014 年/in 2014