2021 年 規年 ê 天色

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：The Sky in 2021
• 影像來源 kah 版權：Cees Bassa (Netherlands Institute for Radio Astronomy)
• APOD 嘛有 Instagram：English, Indonesian, Persian, Portuguese or 台語
• 台文翻譯：An-Li Tsai (NCU)

[漢羅] 2021 年 規年 ê 天色

你若是會當一擺看著規年 ê 天色，毋知會是啥款？ 彼就 kah 今仔日這幅圖足 相-siâng ê。 這是 2021 年 tī 荷蘭 用 全天 kha-mé-lah 每 15 分鐘 tùi 天頂翕一張 ê 結果。 Kā 這寡影像 中央 彼逝 對予齊齊，才合做這張 天色圖。 上面頂是 1 月，上下底是 12 月，中央較倚倒爿彼規逝直 ê 是 半暝。 按呢你看著啥物？ 上明顯 ê 是，日時 ê 天色攏是藍色 ê，毋閣暗暝 ê 天色攏是烏色 ê。 暗暝彼區有 12 條 光帶 迒過，彼其實是月娘 ê 月光。 烏色漏壼上瘦彼位其實是 夏節，這工 ê 日時上長，上肥彼位是 冬節。 昨昏是 春秋分點，就是暗暝 kah 日時平長 ê 一工。 咱會當 tī 這張舊年 ê 天色圖四分之三懸 ê 所在，揣著北半球 ê 春分。

[POJ] 2021 nî kui-nî ê Thiⁿ-sek

Lí nā-sī ē-tàng chi̍t-pái khòaⁿ-tio̍h kui-nî ê thiⁿ-sek, m̄-chai ē sī siáⁿ-khóaⁿ? He to̍h kah kin-á-ji̍t chit-pak-tô͘ chiok sio-siâng ê. Che sī 2021 nî tī Hô-lân iōng choân-thian kha-mé-lah múi 15 hun-cheng tùi thiⁿ-téng hip chi̍t-tiuⁿ ê kiat-kó. Kā chi̍t-kóa iáⁿ-siōng tiong-ng hit-chōa tùi hō͘ chiâu-chê, chiah hap chō chit-tiuⁿ thiⁿ-sek-tô͘. Siōng bīn-téng sī 1 goe̍h, siōng ē-té sī 12 goe̍h, tiong-ng khah óa tò-pêng hit kui-chōa ti̍t–ê sī pòaⁿ-mî. Án-ni lí khòaⁿ-tio̍h siáⁿ-mih? Siōng bêng-hián ê sī, ji̍t-sî ê thiⁿ-sek lóng-sī nâ-sek ê, m̄-koh àm-mî ê thiⁿ-sek lóng-sī o͘-sek ê. Àm-mî hit-khu ū 12 tiâu kng-tòa hāⁿ kòe, he kî-si̍t sī goe̍h-niû ê goe̍h-kng. O͘-sek lāu-ô͘ siōng sán hit-ūi kî-si̍t sī hā-cheh, chit-kang ê ji̍t-sî siōng tn̂g, siōng pûi hit-ūi sī tang-cheh. Cha-hng sī chhun-chhiu hun-tiám, tō-sī àm-mî kah ji̍t-sî pêⁿ-tn̂g ê chi̍t-kang. Lán ē-tàng tī chit-tiuⁿ kū-nî ê thiⁿ-sek-tô͘ sì-hun-chi-saⁿ koân ê só͘-chāi, chhōe-tio̍h pak-pòaⁿ-kiû ê chhun-hun.

[KIP] 2021 nî kui-nî ê Thinn-sik

Lí nā-sī ē-tàng tsi̍t-pái khuànn-tio̍h kui-nî ê thinn-sik, m̄-tsai ē sī siánn-khuánn? He to̍h kah kin-á-ji̍t tsit-pak-tôo tsiok sio-siâng ê. Tse sī 2021 nî tī Hô-lân iōng tsuân-thian kha-mé-lah muí 15 hun-tsing tuì thinn-tíng hip tsi̍t-tiunn ê kiat-kó. Kā tsi̍t-kuá iánn-siōng tiong-ng hit-tsuā tuì hōo tsiâu-tsê, tsiah hap tsō tsit-tiunn thinn-sik-tôo. Siōng bīn-tíng sī 1 gue̍h, siōng ē-té sī 12 gue̍h, tiong-ng khah uá tò-pîng hit kui-tsuā ti̍t–ê sī puànn-mî. Án-ni lí khuànn-tio̍h siánn-mih? Siōng bîng-hián ê sī, ji̍t-sî ê thinn-sik lóng-sī nâ-sik ê, m̄-koh àm-mî ê thinn-sik lóng-sī oo-sik ê. Àm-mî hit-khu ū 12 tiâu kng-tuà hānn kuè, he kî-si̍t sī gue̍h-niû ê gue̍h-kng. Oo-sik lāu-ôo siōng sán hit-uī kî-si̍t sī hā-tseh, tsit-kang ê ji̍t-sî siōng tn̂g, siōng puî hit-uī sī tang-tseh. Tsa-hng sī tshun-tshiu hun-tiám, tō-sī àm-mî kah ji̍t-sî pênn-tn̂g ê tsi̍t-kang. Lán ē-tàng tī tsit-tiunn kū-nî ê thinn-sik-tôo sì-hun-tsi-sann kuân ê sóo-tsāi, tshuē-tio̍h pak-puànn-kiû ê tshun-hun.

[English] The Sky in 2021

What if you could see the entire sky – all at once – for an entire year? That, very nearly, is what is pictured here. Every 15 minutes during 2021, an all-sky camera took an image of the sky over the Netherlands. Central columns from these images were then aligned and combined to create the featured keogram, with January at the top, December at the bottom, and the middle of the night running vertically just left of center. What do we see? Most obviously, the daytime sky is mostly blue, while the nighttime sky is mostly black. The twelve light bands crossing the night sky are caused by the glow of the Moon. The thinnest part of the black hourglass shape occurs during the summer solstice when days are the longest, while the thickest part occurs at the winter solstice. Yesterday was an equinox – when night and day were equal – and the northern-spring equinox from one year ago can actually be located in the keogram – about three-quarters of the way up.

詞彙學習（漢羅/POJ/KIP/華語/English）

• 【天色圖】thiⁿ-sek-tô͘/thinn-sik-tôo/天光圖/keogram
• 【夏節】hā-cheh/hā-tseh/夏至/summer solstice
• 【冬節】tang-cheh/tang-tseh/冬至/winter solstice
• 【春秋分點】chhun-chhiu hun-tiám/tshun-tshiu hun-tiám/春秋分點/equinox
• 【漏壼】lāu-ô͘/lāu-ôo/沙漏/hourglass
• 【2021 年】jī-khòng-jī-it/jī-khòng-jī-it/2021 年 /year 2021