半人馬座 A

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Centaurus A
• 影像來源 kah 版權：David Alemazkour
• 台文翻譯：An-Li Tsai (NCU)

[漢羅] 半人馬座 A

半人馬座 A 是離咱地球上近 ê 活跳星系，伊離咱干焦 1100 萬光年遠爾爾。 這个望遠鏡景色實在是有夠清楚。 內底這个特殊 ê 長株圓星系閣叫做 NGC 5128，伊 ê 闊度有 6 萬光年闊。 半人馬座 A 看起來是兩个一般星系相挵 ê 結果，這个結果產生奇幻複雜 ê 星團 kah 壯觀 ê 烏暗塗粉帶。 Tī 星系中心附近 ê 宇宙殘骸，當 leh 去予一粒幾若十億倍太陽質量 ê 中央烏洞 沓沓仔食去。 半人馬座 A to̍h kah 其他活跳星系仝款，這个過程可能會輻射出能量足強 ê 電波、X-光、kah gamma-光。

[POJ] Poàn-jîn-má-chō A

Poàn-jîn-má-chō A sī lî lán Tē-kiû siōng kīn ê oa̍h-thiàu-seng-hē, i lî lán kan-na 1100 bān kng-nî hn̄g niā-niā. Chit-ê bōng-oán-kiàⁿ kéng-sek si̍t-chāi sī ū-kàu chheng-chhó͘. Lāi-té chit-ê te̍k-sû ê tn̂g-tu-îⁿ-seng-hē koh kiò-chò NGC 5128, i ê khoah-tō͘ ū 6 bān kng-nî khoah. Poàn-jîn-má-chō A khòaⁿ--khí-lâi sī nn̄g-ê it-poaⁿ seng-hē sio-lòng ê kiat-kó, chit-ê kiat-kó sán-seng kî-hoàn ho̍k-cha̍p ê seng-thoân kah chòng-koan ê o͘-àm thô͘-hún-tòa. Tī seng-hē tiong-sim hū-kīn ê ú-tiū chân-hâi, tng leh khì hō͘ chi̍t-lia̍p kúi-ā-cha̍p-ek pōe Thài-iông-chit-liōng ê tiong-ng o͘-tōng tau̍h-tau̍h-á chia̍h--khì. Poàn-jîn-má-chō A to̍h kah kî-tha oa̍h-thiàu-seng-hē kāng-khoán, chit-ê kòe-têng khó-lêng ē hok-siā--chhut lêng-liōng chiok-kiông ê tiān-pho, X-kng, kah gamma-kng.

[KIP] Puàn-jîn-má-tsō A

Puàn-jîn-má-tsō A sī lî lán Tē-kiû siōng kīn ê ua̍h-thiàu-sing-hē, i lî lán kan-na 1100 bān kng-nî hn̄g niā-niā. Tsit-ê bōng-uán-kiànn kíng-sik si̍t-tsāi sī ū-kàu tshing-tshóo. Lāi-té tsit-ê ti̍k-sû ê tn̂g-tu-înn-sing-hē koh kiò-tsò NGC 5128, i ê khuah-tōo ū 6 bān kng-nî khuah. Puàn-jîn-má-tsō A khuànn--khí-lâi sī nn̄g-ê it-puann sing-hē sio-lòng ê kiat-kó, tsit-ê kiat-kó sán-sing kî-huàn ho̍k-tsa̍p ê sing-thuân kah tsòng-kuan ê oo-àm thôo-hún-tuà. Tī sing-hē tiong-sim hū-kīn ê ú-tiū tsân-hâi, tng leh khì hōo tsi̍t-lia̍p kuí-ā-tsa̍p-ik puē Thài-iông-tsit-liōng ê tiong-ng oo-tōng ta̍uh-ta̍uh-á tsia̍h--khì. Puàn-jîn-má-tsō A to̍h kah kî-tha ua̍h-thiàu-sing-hē kāng-khuán, tsit-ê kuè-tîng khó-lîng ē hok-siā--tshut lîng-liōng tsiok-kiông ê tiān-pho, X-kng, kah gamma-kng.

[English] Centaurus A

A mere 11 million light-years away, Centaurus A is the closest active galaxy to planet Earth. Spanning over 60,000 light-years, the peculiar elliptical galaxy also known as NGC 5128, is featured in this sharp telescopic view. Centaurus A is apparently the result of a collision of two otherwise normal galaxies resulting in a fantastic jumble of star clusters and imposing dark dust lanes. Near the galaxy's center, leftover cosmic debris is steadily being consumed by a central black hole with a billion times the mass of the Sun. As in other active galaxies, that process likely generates the enormous radio, X-ray, and gamma-ray energy radiated by Centaurus A.

詞彙學習（漢羅/POJ/KIP/華語/English）

• 【半人馬座 A】Poàn-jîn-má-chō A/Puàn-jîn-má-tsō A/半人馬座 A/Centaurus A
• 【活跳星系】oa̍h-thiàu-seng-hē/ua̍h-thiàu-sing-hē/活躍星系/active galaxy
• 【長株圓星系】tn̂g-tu-îⁿ seng-hē/tn̂g-tu-înn sing-hē/長株圓星系/ elliptical galaxy
• 【NGC 5128】NGC ngó͘-it-jī-pat/NGC ngóo-it-jī-pat/NGC 5128/NGC 5128
• 【烏洞】o͘-tōng/oo-tōng/黑洞/black hole
• 【電波】tiān-pho/tiān-pho/電波/radio
• 【X-光】X-kng/X-kng/X-光/X-ray
• 【gamma-光】gamma-kng/gamma-kng/gamma-光/gamma-ray
• 【星團】seng-thoân/sing-thuân/星團/star clusters
• 【塗粉帶】thô͘-hún-tòa/thôo-hún-tuà/灰塵帶/dust lane
• 【太陽質量】Thài-iông-chit-liōng/Thài-iông-tsit-liōng/太陽質量/solar mass