虹 leh 微微仔笑

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：When Rainbows Smile
• 影像來源 kah 版權：Marcella Giulia Pace
• 台文翻譯：An-Li Tsai (NCU)

[漢羅] 虹 leh 微微仔笑

你有想欲看 虹 ê 笑容無？ 若是 tī 日頭較低 ê 時陣，向「天頂 (頭頂)」看去，可能 to̍h 有機會看著。 這張相片是 2 月 24 tī Sicily 島 Ragusa 市 ê 棕樹 頭頂翕著 ê。 相片內底這款 冰暈 嘛叫做 環天頂弧。 像有這款色水 ê 光弧 定定去 hŏng 叫做是虹 ê 笑容，因為 光弧 ê 方向 kah 色水 ê 順序攏是顛倒反 ê。 一般咱看著 ê 虹，會綴 tī 西北雨後壁出現，伊 ê 光弧是 彎對地平線去。 毋閣 若是看著 環天頂弧，「天頂」to̍h 是 tī 光弧 ê 中心矣，紅色是 tī 上外口彼輾。 真正 ê 虹是水滴 kā 太陽光 ê 光路屈折去，產生彩色光 ê 光譜。 毋閣 環天頂弧 是 光線行過 扁扁仔 ê 六角形冰晶 了後，屈折 kah 反射 ê 產物。 這 to̍h kah 冰晶會 tī 較懸較薄 ê 雲內底，產生 幻日 ê 現象仝款。

[POJ] Khēng leh bî-bî-á chhiò

Lí ū siūⁿ beh khòaⁿ khēng ê chhiò-iông bô? Nā-sī tī ji̍t-thâu khah kē ê sî-chūn, hiòng “Thian-téng (thâu-téng)” khòaⁿ–khì, khó-lêng to̍h ū ki-hōe khòaⁿ–tio̍h. Chit-tiuⁿ siòng-phìⁿ sī jī goe̍h jī-sì tī Sicily tó Ragusa chhī ê chang-chhiu thâu-téng hip-tio̍h ê. Siòng-phìⁿ lāi-té chit-khoán peng-n̄g mā kiò-chò Khoân-thian-téng-hô͘. Chhiūⁿ ū chit-khoán sek-chúi ê kng-hô͘ tiāⁿ-tiāⁿ khì hŏng kiò-chò sī khēng ê chhiò-iông, in-ūi kng-hô͘ ê hong-hiòng kah sek-chúi ê sūn-sī lóng sī tian-tò-péng ê. It-poaⁿ lán khòaⁿ-tio̍h ê khēng, ē tòe tī sai-pak-hō͘ āu-piah chhut-hiān, i ê kng-hô͘ sī oan tùi tē-pêng-sòaⁿ khì. M̄-koh nā-sī khòaⁿ-tio̍h Khoân-thian-téng-hô͘, “Thian-téng” to̍h sī tī kng-hô͘ ê tiong-sim ah, âng-sek sī tī siōng gōa-kháu hit-liàn. Chin-chiàⁿ ê khēng sī chúi-tih kā thài-iông-kng ê kng-lō͘ khut-chiat khì, sán-seng chhái-sek-kng ê kng-phó͘. M̄-koh Khoân-thian-téng-hô͘ sī kng-sòaⁿ kiâⁿ kòe píⁿ-píⁿ-á ê la̍k-kak-hêng peng-chiⁿ liáu-āu, khut-chiat kah hoán-siā ê sán-bu̍t. Che to̍h kah peng-chiⁿ ē tī khah koân khah po̍h ê hûn lāi-té, sán-seng Hoàn-ji̍t ê hiān-siōng kāng-khoán.

[KIP] Khīng leh bî-bî-á tshiò

Lí ū siūnn beh khuànn khīng ê tshiò-iông bô? Nā-sī tī ji̍t-thâu khah kē ê sî-tsūn, hiòng “Thian-tíng (thâu-tíng)” khuànn–khì, khó-lîng to̍h ū ki-huē khuànn–tio̍h. Tsit-tiunn siòng-phìnn sī jī gue̍h jī-sì tī Sicily tó Ragusa tshī ê tsang-tshiu thâu-tíng hip-tio̍h ê. Siòng-phìnn lāi-té tsit-khuán ping-n̄g mā kiò-tsò Khuân-thian-tíng-hôo. Tshiūnn ū tsit-khuán sik-tsuí ê kng-hôo tiānn-tiānn khì hŏng kiò-tsò sī khīng ê tshiò-iông, in-uī kng-hôo ê hong-hiòng kah sik-tsuí ê sūn-sī lóng sī tian-tò-píng ê. It-puann lán khuànn-tio̍h ê khīng, ē tuè tī sai-pak-hōo āu-piah tshut-hiān, i ê kng-hôo sī uan tuì tē-pîng-suànn khì. M̄-koh nā-sī khuànn-tio̍h Khuân-thian-tíng-hôo, “Thian-tíng” to̍h sī tī kng-hôo ê tiong-sim ah, âng-sik sī tī siōng guā-kháu hit-liàn. Tsin-tsiànn ê khīng sī tsuí-tih kā thài-iông-kng ê kng-lōo khut-tsiat khì, sán-sing tshái-sik-kng ê kng-phóo. M̄-koh Khuân-thian-tíng-hôo sī kng-suànn kiânn kuè pínn-pínn-á ê la̍k-kak-hîng ping-tsinn liáu-āu, khut-tsiat kah huán-siā ê sán-bu̍t. Tse to̍h kah ping-tsinn ē tī khah kuân khah po̍h ê hûn lāi-té, sán-sing Huàn-ji̍t ê hiān-siōng kāng-khuán.

[English] When Rainbows Smile

Want to see a rainbow smile? Look near the zenith (straight up) when the sun is low in the sky and you might. This example of an ice halo known as a circumzenithal arc was captured above a palm tree top from Ragusa, Sicily on February 24. The vividly colorful arcs are often called smiling rainbows because of their upside down curvature and colors. For circumzenithal arcs the zenith is at the center and red is on the outside, compared to rainbows whose arcs bend toward the horizon after a downpour. True rainbows are formed by water droplets refracting the sunlight to produce a spectrum of colors, though. Circumzenithal arcs are the product of refraction and reflection in flat hexagonal ice crystals, like the ice crystals that create sundogs, formed in high thin clouds.

詞彙學習（漢羅/POJ/KIP/華語/English）

• 【虹】khēng/khīng/彩虹/Rainbows
• 【天頂】Thian-téng/Thian-tíng/天頂/zenith
• 【冰暈】peng-n̄g/ping-n̄g/冰暈/ice halo
• 【環天頂弧】Khoân-thian-téng-hô͘/Khuân-thian-tíng-hôo/環天頂弧/a circumzenithal arc
• 【棕樹】chang-chhiu/tsang-tshiu/棕櫚樹/palm tree
• 【反射】hoán-siā/huán-siā/反射/reflection
• 【屈折】khut-chiat/khut-tsiat/折射/refraction
• 【幻日】Hoàn-ji̍t/Huàn-ji̍t/幻日/sundogs
• 【光譜】kng-phó͘/kng-phóo/光譜/spectrum
• 【西北雨】sai-pak-hō͘/sai-pak-hōo/西北雨/downpour
• 【六角形】la̍k-kak-hêng/la̍k-kak-hîng/六邊形/hexagonal
• 【冰晶】peng-chiⁿ/ping-tsinn/冰晶/ice crystals
• 【光弧】kng-hô͘/kng-hôo/光弧/arc