烏白色倒反 ê 衛星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Moon in Inverted Colors
• 影像來源 kah 版權：Dawid Glawdzin
• 台文翻譯：An-Li Tsai (NCU)

[漢羅] 烏白色倒反 ê 衛星

這是 siáng ê 衛星？ 是 地球 ê 啦！毋閣這是烏白色倒反 ê 月球！ Tī 這張相片內底，光暗區 ê 像素所對應 ê 數字倒反矣，產生一个假色影像，to̍h 親像是烏白相片 ê 底片 仝款。 這个 倒反色 ê 彩色 月球 相片內底，較粉色 ê 部份是真 ê。 毋閣有 tī 烏白色倒反進前，用數位處理 ê 方式 kā 色彩 ê 比例 放較大咧。 平常時 ùi Tycho 隕石 坑噴出來 較光 ê 輻射巡 tī 遮是石青色 ê。 這个 ùi 直徑 85 公里闊 ê 隕石坑噴出 ê 輻射巡，是 南半球（下底）上主要 ê 特徵。 平常時較暗 ê 月海 tī 遮是白殕色 ê。 這張相片是 ùi 英國 英格蘭 ê Southend-on-Sea 提著 ê。 歷史上，用 底片 記錄 ê 天文影像，攏會直接利用 底片 ê 倒反色 來檢查。 因為這會當予咱 ê 目睭 較緊揣著一寡較暗 ê 細節。

[POJ] O͘-pe̍h-sek tò-péng ê Ūi-chhiⁿ

Che sī siáng ê ūi-chhiⁿ? Sī Tē-kiû ê la̍h! M̄-koh che sī o͘-pe̍h-sek tò-péng ê Goe̍h-kiû! Tī chit-tiuⁿ siòng-phìⁿ lāi-té, kng-àm-khù ê siòng-sò͘ só͘ tùi-èng ê sò͘-jī tò-péng ah, sán-seng chi̍t-ê ká-sek iáⁿ-siōng, to̍h chhin-chhiūⁿ sī o͘-pe̍h siòng-phìⁿ ê té-phìⁿ kāng-khoán. Chit-ê tò-péng-sek ê chhái-sek Goe̍h-kiû siòng-phìⁿ lāi-té, khah hún-sek ê pō͘-hūn sī chin ê. M̄-koh ū tī o͘-pe̍h-sek tò-péng chìn-chêng, iōng só͘-ūi chhú-lí ê hong-sek kā sek-chhái ê pí-lē hòng khah tōa leh. Pêng-siông-sî ùi Tycho ún-se̍k-kheⁿ phùn--chhut-lâi khah kng ê hok-siā-sòaⁿ-sûn tī chia sī chio̍h-chhiⁿ-sek ê. Chit-ê ùi ti̍t-kèng 85 kong-lí khoah ê ún-se̍k-kheⁿ phùn--chhut ê hok-siā-sûn, sī Lâm-pòaⁿ-kiû (ē-té) siōng chú-iàu ê te̍k-teng. Pêng-siông-sî khah àm ê Goe̍h-hái tī chia sī pe̍h-phú-sek ê. Chit-tiuⁿ siòng-phìⁿ sī ùi Eng-kok Eng-keh-lân ê Southend-on-Sea the̍h-tio̍h ê. Le̍k-sú-siōng, iōng té-phìⁿ kì-lo̍k ê thian-bûn iáⁿ-siōng, lóng ē ti̍t-chiap iōng té-phìⁿ ê tò-péng-sek lâi kiám-cha. In-ūi che ē-tàng hō͘ lán ê ba̍k-chiu khah kín chhōe-tio̍h chi̍t-kóa khah àm ê sè-chiat.

[KIP] Oo-pe̍h-sik tò-píng ê Uī-tshinn

Tse sī siáng ê uī-tshinn? Sī Tē-kiû ê la̍h! M̄-koh tse sī oo-pe̍h-sik tò-píng ê Gue̍h-kiû! Tī tsit-tiunn siòng-phìnn lāi-té, kng-àm-khù ê siòng-sòo sóo tuì-ìng ê sòo-jī tò-píng ah, sán-sing tsi̍t-ê ká-sik iánn-siōng, to̍h tshin-tshiūnn sī oo-pe̍h siòng-phìnn ê té-phìnn kāng-khuán. Tsit-ê tò-píng-sik ê tshái-sik Gue̍h-kiû siòng-phìnn lāi-té, khah hún-sik ê pōo-hūn sī tsin ê. M̄-koh ū tī oo-pe̍h-sik tò-píng tsìn-tsîng, iōng sóo-uī tshú-lí ê hong-sik kā sik-tshái ê pí-lē hòng khah tuā leh. It-puann kóng-lâi, uì Tycho ún-si̍k-khenn phùn--tshut-lâi khah kng ê hok-siā-suànn-sûn sī Lâm-puànn-kiû (ē-té) tsú-iàu ê ti̍k-ting. In-uī uì ti̍t-kìng 85 kong-lí khuah ê ún-si̍k-khenn phùn--tshut ê tsio̍h-tshinn-sik hok-siā-sûn khah hó jīn. It-puann kóng-lâi, khah àm ê Gue̍h-hái sī pe̍h-phú-sik ê. Tsit-tiunn siòng-phìnn sī uì Ing-kok Ing-keh-lân ê Southend-on-Sea the̍h-tio̍h ê. Li̍k-sú-siōng, iōng té-phìnn kì-lo̍k ê thian-bûn iánn-siōng, lóng ē ti̍t-tsiap iōng té-phìnn ê tò-píng-sik lâi kiám-tsa. In-uī tse ē-tàng hōo lán ê ba̍k-tsiu khah kín tshuē-tio̍h tsi̍t-kuá khah àm ê sè-tsiat.

[English] Moon in Inverted Colors

Which moon is this? It's Earth's moon -- but in inverted colors. Here, the pixel values corresponding to light and dark areas have been translated in reverse, or inverted, producing a false-color representation reminiscent of a black and white photographic negative. However, this is an inverted color image -- where the muted colors of the moon are real but digitally exaggerated before inversion. Normally bright rays from the large crater Tycho dominate the southern (bottom) features as easily followed dark green lines emanating from the 85-kilometer diameter impact site. Normally dark lunar mare appear light and silvery. The image was acquired in Southend-on-Sea, England, UK. Historically, astronomical images recorded on photographic plates were directly examined on inverted-color negatives because it helped the eye pick out faint details.

詞彙學習