捲螺仔星系 NGC 2841

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Spiral Galaxy NGC 2841
• 影像來源 kah 版權：Vitali Pelenjow
• 台文翻譯：An-Li Tsai (NCU)

[漢羅] 捲螺仔星系 NGC 2841

捲螺仔星系 NGC 2841 離咱有 4600 萬光年遠，會當 tī 北方星座 大熊座 ê 方向揣著。 這張 深空景色 內底 ê 美麗 島宇宙，是 kā 2021 年 11 月 到 2022 年 1 月 之間，32 暗 好天 ê 時陣 翕著 ê 相片，疊做一張 ê。 相片內底有明顯 ê 黃色 星系核、星系盤、佮 外圍較暗 ê 區域。 毋閣塗粉帶、較細區 ê 恆星形成區、佮 少年星系團，to̍h 藏 tī 一節一節、捲 絚絚 ê 捲螺仔 手骨 內底。 若是佮其他 ê 捲螺仔星系 相比，in ê 捲螺仔手骨攏較大支，嘛有較大範圍 ê 恆星形成區。 NGC 2841 ê 直徑超過 15 萬光年闊，比咱 ê 銀河系閣較大。 伊 ê X-光影像 kā 咱講，星系風 kah 恆星爆炸產生 ê 高溫氣體煙，攏走入去 NGC 2841 外圍 ê 星系暈 內底矣！

[POJ] Kńg-lê-á seng-hē NGC 2841

Kńg-lê-á seng-hē NGC 2841 lî lán ū 4600 bān kng-nî hn̄g, ē-tàng tī pak-hong seng-chō Tōa-hîm-chō ê hong-hiòng chhōe-tio̍h. Chit-tiuⁿ chhim-khong kéng-sek lāi-té ê bí-lē tó-ú-tiū, sī kā 2021 nî cha̍p-it goe̍h kàu 2022 nî it goe̍h chi-kan, 32 àm hó-thiⁿ ê sî-chūn hip-tio̍h ê siòng-phìⁿ, tha̍h chò chi̍t-tiuⁿ ê. Siòng-phìⁿ lāi-té ū bêng-hián ê n̂g-sek seng-hē-he̍k, seng-hē-pôaⁿ, kah gōa-ûi khah àm ê khu-he̍k. M̄-koh thô͘-hún-tòa, khah sè khu ê hêng-chhiⁿ hêng-sêng-khu, kah siàu-liân seng-thoân, to̍h chhàng tī chi̍t-chiat chi̍t-chiat, kńg ân-ân ê kńg-lê-á chhiú-kut lāi-té. Nā-sī kah kî-tha ê kńg-lê-á seng-hē sio-pí, in ê kńg-lê-á chhiú-kut lóng khah tōa ki, mā ū khah tōa hoān-ûi ê hêng-chhiⁿ hêng-sêng-khu. NGC 2841 ê ti̍t-kèng chhiau-kòe 15 bān kng-nî khoah, pí lán ê Gîn-hô-hē koh khah tōa. I ê X-kng iáⁿ-siōng kā lán kóng, seng-hē-hong kah hêng-chhiⁿ po̍k-chà sán-seng ê ko-un khì-thé-ian, lóng cháu ji̍p-khì NGC 2841 gōa-ûi ê seng-hē-n̄g lāi-té ah!

[KIP] Kńg-lê-á sing-hē NGC 2841

Kńg-lê-á sing-hē NGC 2841 lî lán ū 4600 bān kng-nî hn̄g, ē-tàng tī pak-hong sing-tsō Tuā-hîm-tsō ê hong-hiòng tshuē-tio̍h. Tsit-tiunn tshim-khong kíng-sik lāi-té ê bí-lē tó-ú-tiū, sī kā 2021 nî tsa̍p-it gue̍h kàu 2022 nî it gue̍h tsi-kan, 32 àm hó-thinn ê sî-tsūn hip-tio̍h ê siòng-phìnn, tha̍h tsò tsi̍t-tiunn ê. Siòng-phìnn lāi-té ū bîng-hián ê n̂g-sik sing-hē-hi̍k, sing-hē-puânn, kah guā-uî khah àm ê khu-hi̍k. M̄-koh thôo-hún-tuà, khah sè khu ê hîng-tshinn hîng-sîng-khu, kah siàu-liân sing-thuân, to̍h tshàng tī tsi̍t-tsiat tsi̍t-tsiat, kńg ân-ân ê kńg-lê-á tshiú-kut lāi-té. Nā-sī kah kî-tha ê kńg-lê-á sing-hē sio-pí, in ê kńg-lê-á tshiú-kut lóng khah tuā ki, mā ū khah tuā huān-uî ê hîng-tshinn hîng-sîng-khu. NGC 2841 ê ti̍t-kìng tshiau-kuè 15 bān kng-nî khuah, pí lán ê Gîn-hô-hē koh khah tuā. I ê X-kng iánn-siōng kā lán kóng, sing-hē-hong kah hîng-tshinn po̍k-tsà sán-sing ê ko-un khì-thé-ian, lóng tsáu ji̍p-khì NGC 2841 guā-uî ê sing-hē-n̄g lāi-té ah!

[English] Spiral Galaxy NGC 2841

A mere 46 million light-years distant, spiral galaxy NGC 2841 can be found in the northern constellation of Ursa Major. This deep view of the gorgeous island universe was captured during 32 clear nights in November, December 2021 and January 2022. It shows off a striking yellow nucleus, galactic disk, and faint outer regions. Dust lanes, small star-forming regions, and young star clusters are embedded in the patchy, tightly wound spiral arms. In contrast, many other spirals exhibit grand, sweeping arms with large star-forming regions. NGC 2841 has a diameter of over 150,000 light-years, even larger than our own Milky Way. X-ray images suggest that resulting winds and stellar explosions create plumes of hot gas extending into a halo around NGC 2841.

詞彙學習（漢羅/POJ/KIP/華語/English）

• 【捲螺仔星系】kńg-lê-á seng-hē/kńg-lê-á sing-hē/螺旋星系/spiral galaxy
• 【NGC 2841】NGC jī-pat-sù-it/NGC jī-pat-sù-it/NGC 2841/NGC 2841
• 【大熊座】Tōa-hîm-chō/Tuā-hîm-tsō/大熊座/Ursa Major
• 【星系核】seng-hē-he̍k/sing-hē-hi̍k/星系核/galactic nucleus
• 【星系盤】seng-hē-pôaⁿ/sing-hē-puânn/星系盤/galactic disk
• 【捲螺仔手骨】kńg-lê-á chhiú-kut/kńg-lê-á tshiú-kut/螺旋手臂、旋臂/spiral arm
• 【恆星形成區】hêng-chhiⁿ hêng-sêng-khu/hîng-tshinn hîng-sîng-khu/恆星形成區/star-forming region
• 【星系風】seng-hē-hong/sing-hē-hong/星系風/galactic wind
• 【星系暈】seng-hē-n̄g/sing-hē-n̄g/星系暈/galactic halo
• 【2021】jī-khòng-jī-it/jī-khòng-jī-it/2021/2021
• 【2022】jī-khòng-jī-jī/jī-khòng-jī-jī/2022/2022
• 【塗粉帶】thô͘-hún-tòa/thôo-hún-tuà/塵埃帶/dust lane