太陽軌道太空船 翕著 創記錄 ê 太陽日珥

Page(/daily/2022/03/20220302)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 太陽軌道太空船 翕著 創記錄 ê 太陽日珥

咱 ê 太陽 sī 發生啥物代誌? 頂個月,咱才拄翕著 有史以來 上大 ê 太陽 日珥 kah 規个太陽盤這張 創記錄 ê 影像,sī 踅太陽 ê 太陽 軌道 太空船紫外光波段 翕 ê。 恬去 ê 太陽日珥太陽表面 ê 高溫氣體雲,sī 太陽磁場 leh 控制 ê。 這个 太陽日珥 實在 sī 有夠大 ê,伊 ê 闊度 kah 太陽直徑 有通比。 太陽日珥 ê 爆發 實在 sī 真歹臆,伊會利用 日冕物質噴出事件 (CME) kā 噴出來 ê 高溫氣體 擲到 太陽系 內底。 CME 若是挵著地球 kah 伊 ê 磁層,可能 to̍h 會 產生足光 ê 極光。 雖罔講太陽日珥 確實會產生 CME 現象,毋閣伊這擺 ê 方向毋是 tùi 地球來。 咱這馬已經知影 日珥 kah 太陽磁場 ê 改變有關係,毋閣 產生 太陽日珥 ê 能量機制 到今猶是一个 研究主題

[POJ] Thài-iông Kúi-tō Thài-khong-chûn hip-tio̍h chhòng kì-lo̍k ê Thài-iông Ji̍t-jíⁿ

Lán ê Thài-iông sī hoat-seng siáⁿ-mih tāi-chì? Téng kò goe̍h, lán chiah tú hip-tio̍h iú-sú í-lâi siōng tōa ê Thài-iông ji̍t-jíⁿ kah kui-ê Thài-iông-pôaⁿ. Chit-tiuⁿ chhòng kì-lo̍k ê iáⁿ-siōng, sī se̍h Thài-iông ê Thài-iông Kúi-tō Thài-khong-chûn tī chí-gōa-kng pho-tōaⁿ hip ê. Tiām–khì ê Thài-iông ji̍t-jíⁿ sī Thài-iông piáu-bīn ê ko-un khì-thé-hûn, sī Thài-iông chû-tiûⁿ leh khòng-chè ê. Chit-ê Thài-iông ji̍t-jíⁿ si̍t-chāi sī ū-kàu tōa ê, i ê khoah-tō͘ kah Thài-iông ti̍t-kèng ū-thang pí. Thài-iông ji̍t-jíⁿ ê po̍k-hoat si̍t-chāi sī chin phái ioh, i ē lī-iōng Ji̍t-bián bu̍t-chit phùn-chhut sū-kiāⁿ (CME) kā phùn–chut-lâi ê ko-un khì-thé tàn kàu Thài-iông-hē lāi-té. CME nā-sī lòng-tio̍h Tē-kiû kah i ê chû-chân, khó-lêng to̍h ē sán-seng chiok kng ê ke̍k-kng. Sui-bóng-kóng Thài-iông ji̍t-jíⁿ khak-si̍t ē sán-seng CME hiān-siōng, m̄-koh i chit-pái ê hong-hiòng m̄-sī tùi Tē-kiû lâi. Lán chit-má í-keng chai-iáⁿ ji̍t-jíⁿ kah Thài-iông chû-tiûⁿ ê kái-piàn ū koan-hē, m̄-koh sán-seng Thài-iông ji̍t-jíⁿ ê lêng-liōng ki-chè kàu-taⁿ iáu-sī chi̍t-ê gián-kiù chú-tê.

[KIP] Thài-iông Kuí-tō Thài-khong-tsûn hip-tio̍h tshòng kì-lo̍k ê Thài-iông Ji̍t-jínn

Lán ê Thài-iông sī huat-sing siánn-mih tāi-tsì? Tíng kò gue̍h, lán tsiah tú hip-tio̍h iú-sú í-lâi siōng tuā ê Thài-iông ji̍t-jínn kah kui-ê Thài-iông-puânn. Tsit-tiunn tshòng kì-lo̍k ê iánn-siōng, sī se̍h Thài-iông ê Thài-iông Kuí-tō Thài-khong-tsûn tī tsí-guā-kng pho-tuānn hip ê. Tiām–khì ê Thài-iông ji̍t-jínn sī Thài-iông piáu-bīn ê ko-un khì-thé-hûn, sī Thài-iông tsû-tiûnn leh khòng-tsè ê. Tsit-ê Thài-iông ji̍t-jínn si̍t-tsāi sī ū-kàu tuā ê, i ê khuah-tōo kah Thài-iông ti̍t-kìng ū-thang pí. Thài-iông ji̍t-jínn ê po̍k-huat si̍t-tsāi sī tsin phái ioh, i ē lī-iōng Ji̍t-bián bu̍t-tsit phùn-tshut sū-kiānn (CME) kā phùn–tsut-lâi ê ko-un khì-thé tàn kàu Thài-iông-hē lāi-té. CME nā-sī lòng-tio̍h Tē-kiû kah i ê tsû-tsân, khó-lîng to̍h ē sán-sing tsiok kng ê ki̍k-kng. Sui-bóng-kóng Thài-iông ji̍t-jínn khak-si̍t ē sán-sing CME hiān-siōng, m̄-koh i tsit-pái ê hong-hiòng m̄-sī tuì Tē-kiû lâi. Lán tsit-má í-king tsai-iánn ji̍t-jínn kah Thài-iông tsû-tiûnn ê kái-piàn ū kuan-hē, m̄-koh sán-sing Thài-iông ji̍t-jínn ê lîng-liōng ki-tsè kàu-tann iáu-sī tsi̍t-ê gián-kiù tsú-tê.

[English] Record Prominence Imaged by Solar Orbiter

What’s happened to our Sun? Last month, it produced the largest prominence ever imaged together with a complete solar disk. The record image, featured, was captured in ultraviolet light by the Sun-orbiting Solar Orbiter spacecraft. A quiescent solar prominence is a cloud of hot gas held above the Sun’s surface by the Sun’s magnetic field. This solar prominence was huge – spanning a length rivaling the diameter of the Sun itself. Solar prominences may erupt unpredictably and expel hot gas into the Solar System via a Coronal Mass Ejection (CME). When a CME strikes the Earth and its magnetosphere, bright auroras may occur. This prominence did produce a CME, but it was directed well away from the Earth. Although surely related to the Sun’s changing magnetic field, the energy mechanism that creates and sustains a solar prominence remains a topic of research.

詞彙學習(漢羅/POJ/KIP/華語/English)

  • 【太陽日珥】Thài-iông ji̍t-jíⁿ/Thài-iông ji̍t-jínn/太陽日珥/solar prominence
  • 【太陽盤】Thài-iông-pôaⁿ/Thài-iông-puânn/太陽盤/solar disk
  • 【太陽軌道太空船】Thài-iông Kúi-tō Thài-khong-chûn/Thài-iông Kuí-tō Thài-khong-tsûn/太陽軌道太空船/Solar Orbiter spacecraft
  • 【日冕物質噴出事件】Ji̍t-bián bu̍t-chit phùn-chhut sū-kiāⁿ/Ji̍t-bián bu̍t-tsit phùn-tshut sū-kiānn/日冕物質拋射/Coronal Mass Ejection (CME)
  • 【紫外光】chí-gōa-kng/tsí-guā-kng/紫外光/ultraviolet light
  • 【磁層】chû-chân/tsû-tsân/磁層/magnetosphere
  • 【極光】ke̍k-kng/ki̍k-kng/極光/auroras

  1. 阮嘛有 Podcast面冊InstagramTwitter,會逐工 kā 你提醒有新 ê 翻譯 kah 錄音。閣有 YouTube 頻道,有當時仔會出新 ê 影片,緊來追蹤! ↩︎

  2. 本站 ê 介紹 (台語/華語)FAQ (華語) ↩︎

  3. 看無台文?阮讀予你聽!已經錄過 ê 文章 ↩︎

昨昏 ê 圖:Tī 夜空決鬥 ê 兩條光帶 明仔載 ê 圖:捲螺仔星系 NGC 2841