咱附近 ê 捲螺仔星系 NGC 4945

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Nearby Spiral Galaxy NGC 4945
• 影像來源 kah 版權：Dietmar Hager, Eric Benson
• 台文翻譯：An-Li Tsai (NCU)

[漢羅] 咱附近 ê 捲螺仔星系 NGC 4945

這是 大捲螺仔星系 NGC 4945 ê 特寫，這个宇宙星系是一个 側向 星系，kah 咱 ê 銀河系 是差不多大。 Tī 這張彩色 ê 望遠鏡影像內底，咱會當清楚看著 NGC 4945 有厚塗粉 ê 星系盤，少年 ê 藍色星系團，kah 粉紅仔色 ê 恆星形成區。 NGC 4945 tī 南天 ê 大 星座 半人馬座 ê 方向，離咱差不多 1300 萬 光年遠 ê 所在，按呢差不多是咱到 仙女座星系 距離 ê 6 倍遠。 仙女座星系是離咱銀河系上近 ê 星系。 咱若是用光學望遠鏡來 kā 看，NGC 4945 ê 星系中心區實在是看無。 毋閣 X-光 kah 紅外線 觀測表示，伊 ê 核心區 有 足明顯 ê 高能發射 kah 恆星形成活動。 這粒藏 tī 星系中心、活動力足強 ê 核心，予這个華麗 ê 島宇宙成做一个 Seyfert 星系。 Seyfert 星系 ê 中心，其實有一粒 超大質量烏洞。

[POJ] Lán hū-kīn ê Kńg-lê-á seng-hē NGC 4945

Che sī tōa kńg-lê-á seng-hē NGC 4945 ê te̍k-siá, chit-ê ú-tiū seng-hē sī chi̍t-ê chhek-hiòng seng-hē, kah lán ê Gîn-hô-hē sī chha-put-to tōa. Tī chit-tiuⁿ chhái-sek ê bōng-oán-kiàⁿ iáⁿ-siōng lāi-té, lán ē-tàng chheng-chhó͘ khòaⁿ-tio̍h NGC 4945 ū kāu thô͘-hún ê seng-hē-pôaⁿ, siàu-liân ê nâ-sek seng-hē-thoân, kah hún-âng-á-sek ê hêng-chhiⁿ hêng-sêng-khu. NGC 4945 tī lâm-thian seng-chō Poàn-jîn-má-chō ê hong-hiòng, lī lán chha-put-to 1300 bān kng-nî hn̄g ê só͘-chāi, án-ne chha-put-to sī lán kàu Sian-lú-chō seng-hē kū-lî ê 6 pōe hn̄g. Sian-lú-chō seng-hē sī lī lán Gîn-hô-hē siōng kīn ê seng-hē. Lán nā-sī kng-ha̍k bōng-oán-kiàⁿ lâi kā khòaⁿ, NGC 4945 ê seng-hē tiong-sim-khu si̍t-chāi sī khòaⁿ bô. M̄-koh X-kng kah âng-gōa-sòaⁿ koan-chhek piáu-sī, i ê he̍k-sim-khu ū chiok bêng-hián ê ko-lêng hoat-siā kah hêng-chhiⁿ hêng-sêng oa̍h-tāng. chit-lia̍p chhàng tī seng-hē tiong-sim, oa̍h-tōng-le̍k chiok kiông ê he̍k-sim, hō͘ chit-ê hôa-lē ê tó-ú-tiū chiâⁿ chò chi̍t-ê Seyfert seng-hē. Seyfert seng-hē ê tiong-sim, kî-si̍t ū chi̍t-lia̍p chhiau-tōa chit-liōng o͘-tōng.

[KIP] Lán hū-kīn ê Kńg-lê-á sing-hē NGC 4945

Tse sī tuā kńg-lê-á sing-hē NGC 4945 ê ti̍k-siá, tsit-ê ú-tiū sing-hē sī tsi̍t-ê tshik-hiòng sing-hē, kah lán ê Gîn-hô-hē sī tsha-put-to tuā. Tī tsit-tiunn tshái-sik ê bōng-uán-kiànn iánn-siōng lāi-té, lán ē-tàng tshing-tshóo khuànn-tio̍h NGC 4945 ū kāu thôo-hún ê sing-hē-puânn, siàu-liân ê nâ-sik sing-hē-thuân, kah hún-âng-á-sik ê hîng-tshinn hîng-sîng-khu. NGC 4945 tī lâm-thian sing-tsō Puàn-jîn-má-tsō ê hong-hiòng, lī lán tsha-put-to 1300 bān kng-nî hn̄g ê sóo-tsāi, án-ne tsha-put-to sī lán kàu Sian-lú-tsō sing-hē kū-lî ê 6 puē hn̄g. Sian-lú-tsō sing-hē sī lī lán Gîn-hô-hē siōng kīn ê sing-hē. Lán nā-sī kng-ha̍k bōng-uán-kiànn lâi kā khuànn, NGC 4945 ê sing-hē tiong-sim-khu si̍t-tsāi sī khuànn bô. M̄-koh X-kng kah âng-guā-suànn kuan-tshik piáu-sī, i ê hi̍k-sim-khu ū tsiok bîng-hián ê ko-lîng huat-siā kah hîng-tshinn hîng-sîng ua̍h-tāng. tsit-lia̍p tshàng tī sing-hē tiong-sim, ua̍h-tōng-li̍k tsiok kiông ê hi̍k-sim, hōo tsit-ê huâ-lē ê tó-ú-tiū tsiânn tsò tsi̍t-ê Seyfert sing-hē. Seyfert sing-hē ê tiong-sim, kî-si̍t ū tsi̍t-lia̍p tshiau-tuā tsit-liōng oo-tōng.

[English] Nearby Spiral Galaxy NGC 4945

Large spiral galaxy NGC 4945 is seen nearly edge-on in this cosmic galaxy close-up. It's almost the size of our Milky Way Galaxy. NGC 4945's own dusty disk, young blue star clusters, and pink star forming regions standout in the colorful telescopic frame. About 13 million light-years distant toward the expansive southern constellation Centaurus, NGC 4945 is only about six times farther away than Andromeda, the nearest large spiral galaxy to the Milky Way. Though this galaxy's central region is largely hidden from view for optical telescopes, X-ray and infrared observations indicate significant high energy emission and star formation in the core of NGC 4945. Its obscured but active nucleus qualifies the gorgeous island universe as a Seyfert galaxy and home to a central supermassive black hole.

詞彙學習