毅力號 tī 火星 ê 第 354 工 火星日

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Perseverance Sol 354
• 影像來源：NASA, JPL-Caltech, 資料處理：Kenneth Kremer
• 台文翻譯：An-Li Tsai (NCU)

[漢羅] 毅力號 tī 火星 ê 第 354 工 火星日

這張相片是 甲車平大台 ê 毅力號 探測車 面頂 ê Navcam 翕 ê 拼鬥影像。 看會出來這張是 ùi 探測車 ê 甲板 面頂翕 ê，翕 ê 是火星 Jezero 隕石坑。 這張拼鬥影像是 tī 火星任務 第 354 工火星日翕 ê。 Tùi 地球人來講，毅力號降落 tī 火星 已經一年矣，差不多是地球時間 ê 2022 年 2 月 17。 這台探測車 ê 質量是 1000 公斤，伊有 6 輪，是登陸火星 ê 探測車內底上重 ê。 毅力號頭一年 ê 探索，已經收集 6 塊 岩心標本，以後才會提轉來地球。 伊嘛是 獨創號 ê 基地，彼是火星面頂頭一台直升機。 探測車閣用伊面頂 ê MOXIE（火星酸素原位資源利用實驗儀）對 這粒紅色行星 薄薄 ê 大氣 做實驗。 Kā 伊內底 厚-tut-tut ê 二酸化碳素 變做 酸素。

[POJ] Gē-le̍k-hō tī Hóe-chhiⁿ ê Tē 354 kang

Chit-tiuⁿ siòng-phìⁿ sī kah chhia pêⁿ-tōa-tâi ê Gē-le̍k-hō thàm-chhek-chhia bīn-téng ê Navcam hip ê pheng-tàu iáⁿ-siōng. Khòaⁿ ē chhut-lâi chit-tiuⁿ sī ùi thàm-chhek-chhia ê kah-pán bīn-téng hip ê, hip ê sī Hóe-chhiⁿ Jezero ún-se̍k-kheⁿ. Chit-tiuⁿ pheng-tàu iáⁿ-siōng sī tī Hóe-chhiⁿ jīm-bū tē 354 kang Hóe-chhiⁿ-ji̍t hip ê. Tùi Tē-kiû-lâng lâi-kóng, Gē-le̍k-hō kàng-lo̍h tī Hóe-chhiⁿ í-keng chi̍t nî ah, chha-put-to sī Tē-kiû sî-kan ê 2022 nî 2 goe̍h 17. Chit-tâi thàm-chhek-chhia ê chit-liōng sī 1000 kong-kin, i ū 6 lián, sī teng-lio̍k Hóe-chhiⁿ ê thàm-chhek-chhia lāi-té siōng tāng ê. Gē-le̍k-hō thâu chi̍t nî ê thàm-soh, í-keng siu-chi̍p 6 tè giâm-sim piau-pún, í-āu chiah ē the̍h tńg-lâi Tē-kiû. I mā-sī To̍k-chhòng-hō ê ki-tē, he sī Hóe-chhiⁿ bīn-téng thâu chi̍t tâi ti̍t-seng-ki Thàm-chhek-chhia koh iōng i bīn-téng ê MOXIE (Hóe-chhiⁿ sǹg-sò͘ goân-ūi chu-liāu lī-iōng si̍t-giām-gî) tùi chit-lia̍p âng-sek kiâⁿ-chhiⁿ po̍h-po̍h ê tōa-khì chò si̍t-giām. Kā tōa-khì lāi-té kāu-tut-tut ê jī-sng-hòa-thòaⁿ-sò͘ piàn chò sǹg-sò͘.

[KIP] Gē-li̍k-hō tī Hué-tshinn ê Tē 354 kang

Tsit-tiunn siòng-phìnn sī kah tshia pênn-tuā-tâi ê Gē-li̍k-hō thàm-tshik-tshia bīn-tíng ê Navcam hip ê phing-tàu iánn-siōng. Khuànn ē tshut-lâi tsit-tiunn sī uì thàm-tshik-tshia ê kah-pán bīn-tíng hip ê, hip ê sī Hué-tshinn Jezero ún-si̍k-khenn. Tsit-tiunn phing-tàu iánn-siōng sī tī Hué-tshinn jīm-bū tē 354 kang Hué-tshinn-ji̍t hip ê. Tuì Tē-kiû-lâng lâi-kóng, Gē-li̍k-hō kàng-lo̍h tī Hué-tshinn í-king tsi̍t nî ah, tsha-put-to sī Tē-kiû sî-kan ê 2022 nî 2 gue̍h 17. Tsit-tâi thàm-tshik-tshia ê tsit-liōng sī 1000 kong-kin, i ū 6 lián, sī ting-lio̍k Hué-tshinn ê thàm-tshik-tshia lāi-té siōng tāng ê. Gē-li̍k-hō thâu tsi̍t nî ê thàm-soh, í-king siu-tsi̍p 6 tè giâm-sim piau-pún, í-āu tsiah ē the̍h tńg-lâi Tē-kiû. I mā-sī To̍k-tshòng-hō ê ki-tē, he sī Hué-tshinn bīn-tíng thâu tsi̍t tâi ti̍t-sing-ki Thàm-tshik-tshia koh iōng i bīn-tíng ê MOXIE (Hué-tshinn sǹg-sòo guân-uī tsu-liāu lī-iōng si̍t-giām-gî) tuì tsit-lia̍p âng-sik kiânn-tshinn po̍h-po̍h ê tuā-khì tsò si̍t-giām. Kā tuā-khì lāi-té kāu-tut-tut ê jī-sng-huà-thuànn-sòo piàn tsò sǹg-sòo.

[English] Perseverance Sol 354

This Navcam mosaic from Perseverance looks out over the car-sized rover’s deck, across the floor of Jezero crater on Mars. Frames used to construct the mosaic view were captured on mission sol 354. That corresponds to Earth calendar date February 17, 2022, nearly one Earth year after the rover’s landing. With a mass of over 1,000 kilograms, six-wheeled Perseverance is the heaviest rover to [touch down on Mars][touch down on Mars]. During its first year of exploration the rover has collected six (so far) rock core samples for later return to planet Earth, served as the base station [for Ingenuity][for Ingenuity], the first helicopter on Mars, and tested MOXIE (Mars Oxygen In-Situ Resource Utilization Experiment), converting some of the Red Planet’s thin, carbon dioxide-rich atmosphere into oxygen.

詞彙學習（漢羅/POJ/KIP/華語/English）

• 【毅力號】Gē-le̍k-hō/Gē-li̍k-hō/毅力號/Perseverance
• 【火星日】Hóe-chhiⁿ-ji̍t/Hué-tshinn-ji̍t/火星日/Sol
• 【探測車】thàm-chhek-chhia/thàm-tshik-tshia/探測車/rover
• 【甲板】kah-pán/kah-pán/甲板/deck
• 【隕石坑】ún-se̍k-kheⁿ/ún-si̍k-khenn/隕石坑/crater
• 【岩心標本】giâm-sim piau-pún/giâm-sim piau-pún/岩心標本/rock core samples
• 【獨創號】To̍k-chhòng-hō/ti̍t-sing-ki/獨創號/Ingenuity
• 【直升機】ti̍t-seng-ki/ti̍t-seng-ki/直升機/helicopter
• 【火星酸素原位資源利用實驗儀】Hóe-chhiⁿ sǹg-sò͘ goân-ūi chu-goân lī-iōng si̍t-giām-gî/Hué-tshinn sǹg-sòo guân-uī tsu-guân lī-iōng si̍t-giām-gî/火星氧氣原位資源利用實驗儀/Mars Oxygen In-Situ Resource Utilization Experiment (MOXIE)
• 【二酸化碳素】jī-sng-hòa-thòaⁿ-sò͘/jī-sng-huà-thuànn-sòo/二氧化碳/carbon dioxide
• 【酸素】sǹg-sò͘/sǹg-sòo/氧/oxygen