美麗 ê Albireo AB

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Beautiful Albireo AB
• 影像來源 kah 版權：Robert Eder
• 台文翻譯：An-Li Tsai (NCU)

[漢羅] 美麗 ê Albireo AB

天鵝座 β 星 對咱 ê 目睭來講，是一粒星。 伊離咱有 420 光年遠，是 北十字星群 ê 一支跤。 這个有名 ê 北十字星群 to̍h tī 天鵝座 內底。 毋閣你若是 kā 細台望遠鏡 鬥 目鏡 來看，就會看著伊其實是一組美麗 ê 雙星。 In 發出 ê 藍光 kah 黃光，是 夜空內底 ê 珍寶。 天鵝座 β 星 嘛叫做 Albireo。 伊較完整 ê 名是 Albireo AB，表示講伊是兩粒足光 ê 恆星組成 ê。 In tī 這張望遠鏡速翕內底 發出兩款無仝款 ê 色光。 In ê 可見光 光譜圖 to̍h 插 tī 正爿。 頂懸彼張插圖是 Albireo A ê 光譜，伊是 K-型巨星，比太陽較冷。伊發出 ê 能量主要是 tī 黃光 kah 紅光波段。 下跤彼張插圖是 Albireo B ê 光譜，伊是 主序帶 ê 恆星，比太陽較燒。伊發出 ê 能量主要是 tī 藍光 kah 紫光。 Albireo A 是一組雙星，這兩粒恆星 踅 in ê 共同質心 做伙 leh 行。 毋閣這兩粒恆星實在是傷倚矣，所以用細台望遠鏡 才會分 無啥會 出來。 Albireo A 佮 Albireo B 是光學上 ê 兩粒星，毋是物理上 ê 雙星系統。 這是 因為 咱有量著這兩組 tī 天頂 ê 運動，其實是無仝。

[POJ] Bí-lē ê Albireo AB

Thian-gô-chō Beta chhiⁿ tùi lán ê ba̍k-chiu lâi-kóng, sī chi̍t-lia̍p chhiⁿ. I lī lán ū 420 kng-nî hn̄g, sī Pak-si̍p-jī seng-kûn ê chi̍t-ki kha. Chit-ê ū-miâ ê Pak-si̍p-jī seng-kûn to̍h tī Thian-gô-chō lāi-té. M̄-koh lí nā-sī kā sè-tâi bōng-oán-kiàⁿ tàu bo̍k-kiàⁿ lâi khòaⁿ, to̍h ē khòaⁿ-tio̍h i kî-si̍t sī chi̍t-cho͘ bí-lē ê siang-chhiⁿ. In hoat–chhut ê nâ-kng kah n̂g-kng, sī iā-khong lāi-té ê tin-pó. Thian-gô-chō Beta chhiⁿ mā kiò-chò Albireo. I khah oân-chéng ê miâ sī Albireo AB, piáu-sī kóng i sī nn̄g-lia̍p chiok kng ê hêng-chhiⁿ cho͘-sêng ê. In tī chit-tiuⁿ bōng-oán-kiàⁿ sok-hip lāi-té hoat-chhut nn̄g-khoán bô-kâng-khoán ê se̍k-kng. In ê khó-kiàn-kng kng-phó͘-tô͘ to̍h chhah tī chiàⁿ-pêng. Téng-koân hit-tiuⁿ chhah-tô͘ sī Albireo A ê kng-phó͘, i sī K-hêng kū-chhiⁿ, pí Thài-iông khah léng. I hoat–chhut ê lêng-liōng chú-iàu sī tī n̂g-kng kah âng-kng pho-tōaⁿ. Ē-kha hit-tiuⁿ chhah-tô͘ sī Albireo B ê kng-phó͘, i sī Chú-sī-tòa ê hêng-chhiⁿ, pí Thài-iông khah sio. I hoat–chhut ê lêng-liōng chú-iàu sī tī nâ-kng kah chí-kng. Albireo A sī chi̍t-cho͘ siang-chhiⁿ, chit nn̄g-lia̍p hêng-chhiⁿ se̍h in ê kiōng-tông chit-sim chò-hóe leh kiâⁿ. M̄-koh chit nn̄g-lia̍p hêng-chhiⁿ si̍t-chāi sī siūⁿ óa ah, só͘-í iōng sè-tâi bōng-oán-kiàⁿ chiah ē hun bô siáⁿ ē chhut–lâi. Albireo A kah Albireo B sī kng-ha̍k siōng ê nn̄g-la̍p chhiⁿ, m̄-sī bu̍t-lí siōng ê siang-chhiⁿ hē-thóng. Che sī in-ūi lán ū niû-tio̍h chit nn̄g-cho͘ tī thiⁿ-téng ê ūn-tōng, kî-si̍t sī bô-kâng.

[KIP] Bí-lē ê Albireo AB

Thian-gô-tsō Beta tshinn tuì lán ê ba̍k-tsiu lâi-kóng, sī tsi̍t-lia̍p tshinn. I lī lán ū 420 kng-nî hn̄g, sī Pak-si̍p-jī sing-kûn ê tsi̍t-ki kha. Tsit-ê ū-miâ ê Pak-si̍p-jī sing-kûn to̍h tī Thian-gô-tsō lāi-té. M̄-koh lí nā-sī kā sè-tâi bōng-uán-kiànn tàu bo̍k-kiànn lâi khuànn, to̍h ē khuànn-tio̍h i kî-si̍t sī tsi̍t-tsoo bí-lē ê siang-tshinn. In huat–tshut ê nâ-kng kah n̂g-kng, sī iā-khong lāi-té ê tin-pó. Thian-gô-tsō Beta tshinn mā kiò-tsò Albireo. I khah uân-tsíng ê miâ sī Albireo AB, piáu-sī kóng i sī nn̄g-lia̍p tsiok kng ê hîng-tshinn tsoo-sîng ê. In tī tsit-tiunn bōng-uán-kiànn sok-hip lāi-té huat-tshut nn̄g-khuán bô-kâng-khuán ê si̍k-kng. In ê khó-kiàn-kng kng-phóo-tôo to̍h tshah tī tsiànn-pîng. Tíng-kuân hit-tiunn tshah-tôo sī Albireo A ê kng-phóo, i sī K-hîng kū-tshinn, pí Thài-iông khah líng. I huat–tshut ê lîng-liōng tsú-iàu sī tī n̂g-kng kah âng-kng pho-tuānn. Ē-kha hit-tiunn tshah-tôo sī Albireo B ê kng-phóo, i sī Tsú-sī-tuà ê hîng-tshinn, pí Thài-iông khah sio. I huat–tshut ê lîng-liōng tsú-iàu sī tī nâ-kng kah tsí-kng. Albireo A sī tsi̍t-tsoo siang-tshinn, tsit nn̄g-lia̍p hîng-tshinn se̍h in ê kiōng-tông tsit-sim tsò-hué leh kiânn. M̄-koh tsit nn̄g-lia̍p hîng-tshinn si̍t-tsāi sī siūnn uá ah, sóo-í iōng sè-tâi bōng-uán-kiànn tsiah ē hun bô siánn ē tshut–lâi. Albireo A kah Albireo B sī kng-ha̍k siōng ê nn̄g-la̍p tshinn, m̄-sī bu̍t-lí siōng ê siang-tshinn hē-thóng. Tse sī in-uī lán ū niû-tio̍h tsit nn̄g-tsoo tī thinn-tíng ê ūn-tōng, kî-si̍t sī bô-kâng.

[English] Beautiful Albireo AB

Beta Cygni is a single bright star to the naked eye. About 420 light-years away it marks the foot of the Northern Cross, famous asterism in the constellation Cygnus. But a view through the eyepiece of a small telescope will transform it into a beautiful double star, a treasure of the night sky in blue and gold. Beta Cygni is also known as Albireo, designated Albireo AB to indicate its two bright component stars. Their visually striking color difference is illustrated in this telescopic snapshot, along with their associated visible spectrum of starlight shown in insets to the right. Albireo A, top inset, shows the spectrum of a K-type giant star, cooler than the Sun and emitting most of its energy at yellow and red wavelengths. Below, Albireo B has the spectrum of a main sequence star much hotter than the Sun, emitting more energy in blue and violet. Albireo A is known to be a binary star, two stars together orbiting a common center of mass, though the two stars are too close together to be seen separately with a small telescope. Well-separated Albireo A and B most likely represent an optical double star and not a physical binary system because the two components have clearly different measured motions through space.

詞彙學習（漢羅/POJ/KIP/華語/English）

• 【目鏡】bo̍k-kiàⁿ/bo̍k-kiànn/目鏡/eyepiece
• 【天鵝座 β 星】Thian-gô-chō Beta chhiⁿ/Thian-gô-tsō Beta tshinn/天鵝座 β/Beta Cygni
• 【北十字】Pak-si̍p-jī/Pak-si̍p-jī/北十字座/the Northern Cross
• 【星群】seng-kûn/sing-kûn/星群/asterism
• 【天鵝座】Thian-gô-chō/Thian-gô-tsō/天鵝座/Cygnus
• 【雙星】siang-chhiⁿ/siang-tshinn/雙星/binary stars
• 【速翕】sok-hip/sok-hip/快照/snapshot
• 【主序帶】Chú-sī-tòa/Tsú-sī-tuà/主序帶/Main Sequence
• 【K-型巨星】K-hêng kū-chhiⁿ/K-hîng kū-tshinn/K-型巨星/K-type giant star
• 【共同質心】kiōng-tông chit-sim/kiōng-tông tsit-sim/共同質心/a common center of mass
• 【光譜】kng-phó͘/kng-phóo/光譜/spectrum
• 【雙星系統】siang-chhiⁿ hē-thóng/siang-tshinn hē-thóng/雙星系統/a binary system