棍螺仔星系 NGC 6217

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Barred Spiral Galaxy NGC 6217
• 影像來源：NASA, ESA, and the Hubble SM4 ERO Team
• APOD ê 各國語言：Arabic, Bulgarian, Catalan, Chinese (Beijing), Chinese (Taiwan), Croatian, Czech, Dutch, French, French (Canada), German, Hebrew, Indonesian, Japanese, Korean, Montenegrin, Polish, Russian, Serbian, Slovenian, Spanish, 台語, Turkish, Turkish, and Ukrainian
• 台文翻譯：An-Li Tsai (NCU)

[漢羅] 棍螺仔星系 NGC 6217

足濟捲螺仔星系 ê 中央攏有棍仔形結構。 咱 ê 銀河系 嘛去予人認為講，伊有一个 大細拄仔好 ê 中央棍仔。 這張相片 內底 ê 棍螺仔星系 NGC 6217，有一个足明顯 ê 棍仔形結構。 相片是 2009 年翕 ê，是用踅地球 ê 哈伯太空望遠鏡 面頂 ê 先進巡天 Kha-mé-lah 翕 ê。 看會著烏暗雲絲 ê 塗粉帶，有足濟足光藍色恆星 ê 少年 星團，發紅光 ê 水素氣體 發射星雲，迵過星系中心 長棍仔 ê 恆星，kah 足光 ê 活跳星系核。 這个星系核內底，可能藏一粒 超大質量 烏洞。 光線 ùi NGC 6217 行到咱遮愛行 6000 萬年，估計這个星系差不多是 3 萬 光年 闊。 咱會當 tī 細隻熊 ê 星座（小熊座）ê 方向揣著伊。

[POJ] Kùn-lê-á seng-hē NGC 6217

Chiok-chōe kńg-lê-á seng-hē ê tiong-ng lóng-ū kùn-á-hêng kiat-kò͘. Lán ê Gîn-hô-hē mā khì hō͘ lâng jīn-ûi kóng, i ū chi̍t-ê tōa-sè tú-á-hó ê tiong-ng kùn-á. Chit-tiuⁿ siòng-phìⁿ lāi-té ê kùn-lê-á seng-hē NGC 6217, ū chi̍t-ê chiok bêng-hián ê kùn-á-hêng kiat-kò͘. Siòng-phìⁿ sī 2009 nî hip ê, sī iōng se̍h Tē-kiû ê Ha-peh Thài-khong Bōng-oán-kiàⁿ bīn-téng ê Sian-chìn Sûn-thian Kha-mé-lah hip ê. Khòaⁿ-ē-tio̍h o͘-àm hûn-si ê thô͘-hún-tòa, ū chiok-chōe chiok-kng nâ-sek hêng-chhiⁿ ê siàu-liân seng-thoân, hoat âng-kng ê chúi-sò͘ khì-thé hoat-siā-seng-hûn, thàng kòe seng-hē tiong-sim tn̂g kùn-á ê hêng-chhiⁿ, kah chiok-kng ê oa̍h-thiàu seng-hē-he̍k. Chit-ê seng-hē-he̍k lāi-té, khó-lêng chhàng chi̍t-lia̍p chhiau-tōa chit-liōng o͘-tōng. Kng-sòaⁿ ùi NGC 6217 kiâⁿ kàu lán chiah ài kiâⁿ 6000 bān nî, kó͘-kè chit-ê seng-hē chha-put-to sī 3 bān kng-nî khoah. Lán ē-tàng tī sè-chiah hîm ê seng-chō (Sió-hîm-chō) ê hong-hiòng chhōe-tio̍h i.

[KIP] Kùn-lê-á sing-hē NGC 6217

Tsiok-tsuē kńg-lê-á sing-hē ê tiong-ng lóng-ū kùn-á-hîng kiat-kòo. Lán ê Gîn-hô-hē mā khì hōo lâng jīn-uî kóng, i ū tsi̍t-ê tuā-sè tú-á-hó ê tiong-ng kùn-á. Tsit-tiunn siòng-phìnn lāi-té ê kùn-lê-á sing-hē NGC 6217, ū tsi̍t-ê tsiok bîng-hián ê kùn-á-hîng kiat-kòo. Siòng-phìnn sī 2009 nî hip ê, sī iōng se̍h Tē-kiû ê Ha-peh Thài-khong Bōng-uán-kiànn bīn-tíng ê Sian-tsìn Sûn-thian Kha-mé-lah hip ê. Khuànn-ē-tio̍h oo-àm hûn-si ê thôo-hún-tuà, ū tsiok-tsuē tsiok-kng nâ-sik hîng-tshinn ê siàu-liân sing-thuân, huat âng-kng ê tsuí-sòo khì-thé huat-siā-sing-hûn, thàng kuè sing-hē tiong-sim tn̂g kùn-á ê hîng-tshinn, kah tsiok-kng ê ua̍h-thiàu sing-hē-hi̍k. Tsit-ê sing-hē-hi̍k lāi-té, khó-lîng tshàng tsi̍t-lia̍p tshiau-tuā tsit-liōng oo-tōng. Kng-suànn uì NGC 6217 kiânn kàu lán tsiah ài kiânn 6000 bān nî, kóo-kè tsit-ê sing-hē tsha-put-to sī 3 bān kng-nî khuah. Lán ē-tàng tī sè-tsiah hîm ê sing-tsō (Sió-hîm-tsō) ê hong-hiòng tshuē-tio̍h i.

[English] Barred Spiral Galaxy NGC 6217

Many spiral galaxies have bars across their centers. Even our own Milky Way Galaxy is thought to have a modest central bar. Prominently barred spiral galaxy NGC 6217, featured here, was captured in spectacular detail in this image taken by the Advanced Camera for Surveys on the orbiting Hubble Space Telescope in 2009. Visible are dark filamentary dust lanes, young clusters of bright blue stars, red emission nebulas of glowing hydrogen gas, a long bar of stars across the center, and a bright active nucleus that likely houses a supermassive black hole. Light takes about 60 million years to reach us from NGC 6217, which spans about 30,000 light years across and can be found toward the constellation of the Little Bear (Ursa Minor).

詞彙學習（漢羅/POJ/KIP/華語/English）

• 【棍螺仔星系】kùn-lê-á seng-hē/kùn-lê-á sing-hē/棒旋星系/Barred Spiral Galaxy
• 【NGC 6217】NGC lio̍k-jī-it-chhit/NGC lio̍k-jī-it-tshit/NGC 6217/NGC 6217
• 【哈伯太空望遠鏡】Ha-peh Thài-khong Bōng-oán-kiàⁿ/Ha-peh Thài-khong Bōng-uán-kiànn/哈伯太空望遠鏡/Hubble Space Telescope
• 【先進巡天 Kha-mé-lah】Sian-chìn Sûn-thian Kha-mé-lah/Sian-tsìn Sûn-thian Kha-mé-lah/先進巡天照相機/Advanced Camera for Surveys
• 【塗粉帶】thô͘-hún-tòa/thôo-hún-tuà/灰塵帶/dust lane
• 【星團】seng-thoân/sing-thuân/星團/cluster of stars
• 【水素】chúi-sò͘/tsuí-sòo/氫/hydrogen
• 【發射星雲】hoat-siā seng-hûn/huat-siā sing-hûn/發射星雲/emission nebulas
• 【活跳星系核】oa̍h-thiàu seng-hē-he̍k/ua̍h-thiàu sing-hē-hi̍k/活躍星系核/active galactic nucleus
• 【超大質量烏洞】chhiau-tōa chit-liōng o͘-tōng/tshiau-tuā tsit-liōng oo-tōng/超大質量黑洞/supermassive black hole
• 【小熊座】Sió-hîm-chō/Sió-hîm-tsō/小熊座/Ursa Minor