晨昏線區 鬥出來 ê 月球影像

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Terminator Moon
• 影像來源：NASA, Lunar Reconnaissance Orbiter, SVS; 資料處理 kah 版權： Jai & Neil Shet
• 月娘時鐘：來揣你生日彼工 ê 月相
• 台文翻譯：An-Li Tsai (NCU)

[漢羅] 晨昏線區 鬥出來 ê 月球影像

這粒月球較特別 ê 部份是啥物？ 是 晨昏線啦！ 彼是一條 kā 日時 光 ê 彼面 kah 暗時 暗 ê 彼面 分做兩爿 ê 線。 Tī 這个影像內底，你無法度直接看著 晨昏線。 這是因為這个影像是 用 數位組合 ê 方式，kā 29 張 晨昏線區 ê 月球影像 鬥做一張 ê，所以才會看無晨昏線。 實際上，晨昏線區有上長 上明顯 ê 烏影，伊產生 ê 明暗對比 kah 長短比例，會當予 2D ê 相片看起來變做是 3D ê。 原始影像 kah 資料是 NASA ê 月球探測軌道衛星 tī 月球 附近翕了送轉來 ê。 足濟月球 ê 隕石坑 看起來會遮爾清楚，是因為晨昏線區 ê 烏影 較明顯，in 攏投影 tùi 正爿去。 這个影像會當看著足清楚 ê 細節。 咱 kā 較烏彼區叫做月海，伊其實毋若比 月球 其他所在較暗，嘛較平。

[POJ] Sîn-hun-sòaⁿ-khu tàu--chhut-lâi ê Goe̍h-kiû iáⁿ-siōng

Chit-lia̍p Goe̍h-kiû khah te̍k-pia̍t ê pō͘-hūn sī siáⁿ-mih? Sī Sîn-hun-sòaⁿ la̍h! He sī chi̍t-tiâu kā ji̍t-sî kng ê hit-bīn kah àm-sî àm ê hit-bīn pun chò nn̄g-pêng ê sòaⁿ. Tī chit-ê iáⁿ-siōng lāi-té, lí bô-hoat-tō͘ ti̍t-chiap khòaⁿ-tio̍h Sîn-hun-sòaⁿ. Che sī in-ūi chit-ê iáⁿ-siōng sī iōng só͘-ūi cho͘-ha̍p ê hong-sek, kā 29 tiuⁿ Sîn-hun-sòaⁿ-khu ê Goe̍h-kiû iáⁿ-siōng tàu chò chi̍t-tiuⁿ ê, só͘-í chiah-ē khòaⁿ-bô Sîn-hun-sòaⁿ. Si̍t-chè-siōng, Sîn-hun-sòaⁿ-khu ū siōng tn̂g siōng bêng-hián ê o͘-iáⁿ, i sán-seng ê bêng-àm tùi-pí kah tn̂g-té pí-lē, ē-tàng hō͘ 2D ê siòng-phìⁿ khòaⁿ--khí-lâi piàn-chò sī 3D ê. Goân-sú iáⁿ-siōng kah chu-liāu sī NASA ê Goe̍h-kiû thàm-chhek kúi-tō ūi-chhiⁿ tī Goe̍h-kiû hū-kīn hip-liáu sàng--tńg-lâi ê. Chiok-chōe Goe̍h-kiû ê ún-se̍k-kheⁿ khòaⁿ--khí-lâi ē chiah-nī chheng-chhó͘, sī in-ūi Sîn-hun-sòaⁿ-khu ê o͘-iáⁿ khah bêng-hián, in lóng tâu-iáⁿ tùi chiàⁿ-pêng khì. Chit-ê iáⁿ-siōng ē-tàng khòaⁿ-tio̍h chiok chheng-chhó͘ ê sè-chiat. Lán kā khah o͘ hit-khu kiò-chò Goe̍h-hái, i kî-si̍t m̄-nā pí Goe̍h-kiû kî-tha só͘-chāi khah àm, mā khah pêⁿ.

[KIP] Sîn-hun-suànn-khu tàu--tshut-lâi ê Gue̍h-kiû iánn-siōng

Tsit-lia̍p Gue̍h-kiû khah ti̍k-pia̍t ê pōo-hūn sī siánn-mih? Sī Sîn-hun-suànn la̍h! He sī tsi̍t-tiâu kā ji̍t-sî kng ê hit-bīn kah àm-sî àm ê hit-bīn pun tsò nn̄g-pîng ê suànn. Tī tsit-ê iánn-siōng lāi-té, lí bô-huat-tōo ti̍t-tsiap khuànn-tio̍h Sîn-hun-suànn. Tse sī in-uī tsit-ê iánn-siōng sī iōng sóo-uī tsoo-ha̍p ê hong-sik, kā 29 tiunn Sîn-hun-suànn-khu ê Gue̍h-kiû iánn-siōng tàu tsò tsi̍t-tiunn ê, sóo-í tsiah-ē khuànn-bô Sîn-hun-suànn. Si̍t-tsè-siōng, Sîn-hun-suànn-khu ū siōng tn̂g siōng bîng-hián ê oo-iánn, i sán-sing ê bîng-àm tuì-pí kah tn̂g-té pí-lē, ē-tàng hōo 2D ê siòng-phìnn khuànn--khí-lâi piàn-tsò sī 3D ê. Guân-sú iánn-siōng kah tsu-liāu sī NASA ê Gue̍h-kiû thàm-tshik kuí-tō uī-tshinn tī Gue̍h-kiû hū-kīn hip-liáu sàng--tńg-lâi ê. Tsiok-tsuē Gue̍h-kiû ê ún-si̍k-khenn khuànn--khí-lâi ē tsiah-nī tshing-tshóo, sī in-uī Sîn-hun-suànn-khu ê oo-iánn khah bîng-hián, in lóng tâu-iánn tuì tsiànn-pîng khì. Tsit-ê iánn-siōng ē-tàng khuànn-tio̍h tsiok tshing-tshóo ê sè-tsiat. Lán kā khah oo hit-khu kiò-tsò Gue̍h-hái, i kî-si̍t m̄-nā pí Gue̍h-kiû kî-tha sóo-tsāi khah àm, mā khah pênn.

[English] Terminator Moon

What's different about this Moon? It's the terminators. In the featured image, you can't directly see any terminator -- the line that divides the light of day from the dark of night. That's because the image is a digital composite of 29 near-terminator lunar strips. Terminator regions show the longest and most prominent shadows -- shadows which, by their contrast and length, allow a flat photograph to appear three-dimensional. The original images and data were taken near the Moon by NASA's Lunar Reconnaissance Orbiter. Many of the Moon's craters stand out because of the shadows they all cast to the right. The image shows in graphic detail that the darker regions known as maria are not just darker than the rest of the Moon -- they are flatter.

詞彙學習