地球 ê 暗暝

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Earth at Night
• 影像來源：NASA, Suomi NPP VIIRS; 資料來源：Miguel Román (NASA GSFC); 資料處理：Joshua Stevens
• 台文翻譯：An-Li Tsai (NCU)

[漢羅] 地球 ê 暗暝

地球 tī 暗暝看起來是按呢 neh！ 毋知你敢會當揣著你上愛 ê 國家 抑是 城市？ 有一个好消息欲報予你知，城市 ê 燈火應該會當 kā 你鬥相共。 人造 燈火 kā 咱鬥報位，予咱知影 地球面頂 發展較好 抑是 人口較濟 ê 所在 tī 佗。 這包括 歐洲、美國東部、kah 日本 ê 海岸。 足濟較大 ê 城市攏 tī 河川 抑是 海洋 邊仔，按呢 in to̍h 有法度坐船，用較低 ê 成本來交換物件。 較暗 ê 所在 to̍h 包括 南美洲、非洲、亞洲、kah 澳洲 ê 中部。 這張相片 有一个名是「烏色大理石」，是 kā 踅地球 ê Suomi NPP 極地軌道 氣象衛星 tī 2016 年翕 ê 幾若千張相片，重新 處理了後才 kā 組合做這張 ê。

[POJ] Tē-kiû ê àm-mî

Tē-kiû tī àm-mî khòaⁿ-khí-lâi sī án-ne neh! M̄-chai lí kám ē-tàng chhōe-tio̍h lí siōng ài ê kok-ka iah-sī siâⁿ-chhī? Ū chi̍t-ê hó siau-sit pò hō͘ lí chai, siâⁿ-chhī ê teng-hóe eng-kai ē-tàng kā lí tàu-saⁿ-kāng. Jîn-chō teng-hóe kā lán tàu pò ūi, hō͘ lán chai-iáⁿ Tē-kiû bīn-téng hoat-tián khah hó iah-sī jîn-kháu khah chōe ê só͘-chāi tī to̍h. Che pau-koat Au-chiu, Bí-kok tang-pō͘, Ji̍t-pún ê hái-hōaⁿ. Chiok chōe khah tōa ê siâⁿ-chhī lóng tī hô-chhoan iah-sī hái-iûⁿ piⁿ-á, án-ne in to̍h ū-hoat-tō͘ chē chûn, iōng khah kē ê sêng-pún lâi kau-ōaⁿ mi̍h-kiāⁿ. Khah àm ê só͘-chāi to̍h pau-koat Lâm-bí-chiu, Hui-chiu, A-chiu, kah Ò-chiu ê tiong-pō͘. Chit-tiuⁿ siòng-phìⁿ ū chi̍t-ê miâ sī "O͘-sek Tāi-lí-chio̍h", sī kā se̍h Tē-kiû ê Suomi NPP Ke̍k-tē kúi-tō khì-siōng ūi-chhiⁿ tī 2016 nî hip ê kúi-ā chheng tiuⁿ siòng-phìⁿ, tiông-sin chhú-lí liáu-āu chiah kā cho͘-ha̍p chò chit-tiuⁿ ê.

[KIP] Tē-kiû ê àm-mî

Tē-kiû tī àm-mî khuànn-khí-lâi sī án-ne neh! M̄-tsai lí kám ē-tàng tshuē-tio̍h lí siōng ài ê kok-ka iah-sī siânn-tshī? Ū tsi̍t-ê hó siau-sit pò hōo lí tsai, siânn-tshī ê ting-hué ing-kai ē-tàng kā lí tàu-sann-kāng. Jîn-tsō ting-hué kā lán tàu pò uī, hōo lán tsai-iánn Tē-kiû bīn-tíng huat-tián khah hó iah-sī jîn-kháu khah tsuē ê sóo-tsāi tī to̍h. Tse pau-kuat Au-tsiu, Bí-kok tang-pōo, Ji̍t-pún ê hái-huānn. Tsiok tsuē khah tuā ê siânn-tshī lóng tī hô-tshuan iah-sī hái-iûnn pinn-á, án-ne in to̍h ū-huat-tōo tsē tsûn, iōng khah kē ê sîng-pún lâi kau-uānn mi̍h-kiānn. Khah àm ê sóo-tsāi to̍h pau-kuat Lâm-bí-tsiu, Hui-tsiu, A-tsiu, kah Ò-tsiu ê tiong-pōo. Tsit-tiunn siòng-phìnn ū tsi̍t-ê miâ sī "Oo-sik Tāi-lí-tsio̍h", sī kā se̍h Tē-kiû ê Suomi NPP Ki̍k-tē kuí-tō khì-siōng uī-tshinn tī 2016 nî hip ê kuí-ā tshing tiunn siòng-phìnn, tiông-sin tshú-lí liáu-āu tsiah kā tsoo-ha̍p tsò tsit-tiunn ê.

[English] Earth at Night

This is what the Earth looks like at night. Can you find your favorite country or city? Surprisingly, city lights make this task quite possible. Human-made lights highlight particularly developed or populated areas of the Earth's surface, including the seaboards of Europe, the eastern United States, and Japan. Many large cities are located near rivers or oceans so that they can exchange goods cheaply by boat. Particularly dark areas include the central parts of South America, Africa, Asia, and Australia. The featured image, nicknamed Black Marble, is actually a composite of hundreds of pictures remade in 2016 from data taken by the orbiting Suomi NPP satellite.

詞彙學習