金牛座 T 星 kah Hind 變光星雲

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：T Tauri and Hind’s Variable Nebula
• 影像來源 kah 版權：Dawn Lowry, Gian Lorenzo Ferretti, Ewa Pasiak and Terry Felty
• 台文翻譯：An-Li Tsai (NCU)

[漢羅] 金牛座 T 星 kah Hind 變光星雲

Tī 這張厚塗粉 ê 望遠鏡影像 中央，有一粒柑仔色色調 ê 恆星，金牛座 T 星，伊是 金牛座 T 型變星 這个分類 ê 原型星。 伊倒爿彼个黃色宇宙雲，歷史上 咱 kā 叫做是 Hind 變光星雲 (NGC 1555)。 伊差不多有 650 光年遠，tī 本地泡 kah 金牛座分子雲 交界 ê 所在。 恆星 kah 星雲 ê 輝度變化攏足大 ê，毋閣 in 毋是同齊發生，所以這區才會予人感覺遮爾趣味。 咱這馬 知影 講，金牛座 T 型變星 是較少年 ê 恆星，干焦幾若百萬歲爾爾。 In kah 咱 ê 太陽是仝類 ê 恆星，毋閣 in 是 tī 恆星形成 較早期 ê 階段。 這幅圖 閣較 複雜 ê 部份是，紅外線觀測結果講，金牛座 T 星 是 多星系統 ê 成員之一。 而且 kah 伊有關 ê Hind 變光星雲內底，嘛藏一粒足少年 ê 恆星。 這幅圖 ê 構圖袂䆀。 若是用 金牛座 T 星 ê 距離來推算，這幅圖有 8 光年遐爾闊。

[POJ] Kim-gû-chō T chhiⁿ kah Hind Piàn-kng-seng-hûn

Tī chit-tiuⁿ kāu thô͘-hún ê bōng-oán-kiàⁿ iáⁿ-siōng tiong-ng, ū chi̍t-lia̍p kam-á-sek sek-tiāu ê hêng-chhiⁿ, Kim-gû-chō T chhiⁿ, i sī Kim-gû-chō T-hêng piàn-seng chit-ê hun-lūi ê goân-hêng-chhiⁿ. I tò-pêng hit-ê n̂g-sek ú-tiū-hûn, le̍k-sú-siōng lán kā kiò-chò sī Hind Piàn-kng-seng-hûn (NGC 1555). I chha-put-to ū 650 kng-nî hn̄g, tī pún-tē-pho kah Kim-gû-chō hūn-chú-hûn kau-kài ê só͘-chāi. Hêng-chhiⁿ kah seng-hûn ê hui-tō͘ piàn-hòa lóng chiok-tōa ê, m̄-koh in m̄-sī tâng-chê hoat-seng, só͘-í chit-khu chiah-ē hō͘ lâng kám-kak chiah-nī chhù-bī. Lán chit-má chai-iáⁿ kóng, Kim-gû-chō T-hêng piàn-seng sī khah siàu-liân ê hêng-chhiⁿ, kan-na kúi-ā pah-bān hòe niā-niā. In kah lán ê Thài-iông sī kāng-lūi ê hêng-chhiⁿ, m̄-koh in sī tī hêng-chhiⁿ hêng-sêng khah chá-kî ê kai-tōaⁿ. Chit-pak-tô͘ koh-khah ho̍k-cha̍p ê pō͘-hūn sī, âng-gōa-sòaⁿ koan-chhek kiat-kó kóng, Kim-gû-chō T chhiⁿ sī tō-chhiⁿ-hē-thóng ê sêng-goân chi-it. Jî-chhiáⁿ kah i ū-koan ê Hind Piàn-kng-seng-hûn lāi-té, mā chhàng chi̍t-lia̍p chiok siàu-liân ê hêng-chhiⁿ. Chit-pak-tô͘ ê kò͘-tô͘ bōe-bái. Nā-sī iōng Kim-gû-chō T chhiⁿ ê kū-lî lâi thui-sǹg, chit-pak-tô͘ ū peh kng-nî hiah-nī khoah.

[KIP] Kim-gû-tsō T tshinn kah Hind Piàn-kng-sing-hûn

Tī tsit-tiunn kāu thôo-hún ê bōng-uán-kiànn iánn-siōng tiong-ng, ū tsi̍t-lia̍p kam-á-sik sik-tiāu ê hîng-tshinn, Kim-gû-tsō T tshinn, i sī Kim-gû-tsō T-hîng piàn-sing tsit-ê hun-luī ê guân-hîng-tshinn. I tò-pîng hit-ê n̂g-sik ú-tiū-hûn, li̍k-sú-siōng lán kā kiò-tsò sī Hind Piàn-kng-sing-hûn (NGC 1555). I tsha-put-to ū 650 kng-nî hn̄g, tī pún-tē-pho kah Kim-gû-tsō hūn-tsú-hûn kau-kài ê sóo-tsāi. Hîng-tshinn kah sing-hûn ê hui-tōo piàn-huà lóng tsiok-tuā ê, m̄-koh in m̄-sī tâng-tsê huat-sing, sóo-í tsit-khu tsiah-ē hōo lâng kám-kak tsiah-nī tshù-bī. Lán tsit-má tsai-iánn kóng, Kim-gû-tsō T-hîng piàn-sing sī khah siàu-liân ê hîng-tshinn, kan-na kuí-ā pah-bān huè niā-niā. In kah lán ê Thài-iông sī kāng-luī ê hîng-tshinn, m̄-koh in sī tī hîng-tshinn hîng-sîng khah tsá-kî ê kai-tuānn. Tsit-pak-tôo koh-khah ho̍k-tsa̍p ê pōo-hūn sī, âng-guā-suànn kuan-tshik kiat-kó kóng, Kim-gû-tsō T tshinn sī tō-tshinn-hē-thóng ê sîng-guân tsi-it. Jî-tshiánn kah i ū-kuan ê Hind Piàn-kng-sing-hûn lāi-té, mā tshàng tsi̍t-lia̍p tsiok siàu-liân ê hîng-tshinn. Tsit-pak-tôo ê kòo-tôo buē-bái. Nā-sī iōng Kim-gû-tsō T tshinn ê kū-lî lâi thui-sǹg, tsit-pak-tôo ū peh kng-nî hiah-nī khuah.

[English] T Tauri and Hind’s Variable Nebula

The star with an orange tint near top center in this dusty telescopic frame is T Tauri, prototype of the class of T Tauri variable stars. Next to it (right) is a yellow cosmic cloud historically known as Hind’s Variable Nebula (NGC 1555). About 650 light-years away, at the boundary of the local bubble and the Taurus molecular cloud, both star and nebula are seen to vary significantly in brightness but not necessarily at the same time, adding to the mystery of the intriguing region. T Tauri stars are now generally recognized as young (less than a few million years old), sun-like stars still in the early stages of formation. To further complicate the picture, infrared observations indicate that T Tauri itself is part of a multiple system and suggest that the associated Hind’s Nebula may also contain a very young stellar object. The well-composed image spans about 8 light-years at the estimated distance of T Tauri.

詞彙學習（漢羅/POJ/KIP/華語/English）

• 【金牛座 T 星】Kim-gû-chō T chhiⁿ/Kim-gû-tsō T tshinn/金牛座 T 星/T Tauri
• 【金牛座 T 型變星】Kim-gû-chō T-hêng piàn-seng/Kim-gû-tsō T-hîng piàn-sing/金牛座 T 型變星/T Tauri stars
• 【Hind 變光星雲】Hind Piàn-kng seng-hûn/Hind Piàn-kng sing-hûn/Hind 變光星雲/Hind’s Variable Nebula
• 【NGC 1555】NGC it-ngó͘-ngó͘-ngó͘/NGC it-ngóo-ngóo-ngóo/NGC 1555/NGC 1555
• 【金牛座分子雲】Kim-gû-chō hūn-chú-hûn/Kim-gû-tsō hūn-tsú-hûn/金牛座分子雲/the Taurus molecular cloud
• 【輝度】hui-tō͘/hui-tōo/亮度/brightness
• 【光度】kng-tō͘/kng-tōo/光度/luminosity
• 【多星系統】tō-chhiⁿ-hē-thóng/tō-tshinn-hē-thóng/多星系統/a multiple system
• 【原型星】goân-hêng-chhiⁿ/guân-hîng-tshinn/原型星/prototype
• 【本地泡】pún-tē-pho/pún-tē-pho/本地泡/the local bubble