晨昏光 ê 月娘

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Moons at Twilight
• 影像來源 kah 版權：Robert Fedez
• 台文翻譯：An-Li Tsai (NCU)

[漢羅] 晨昏光 ê 月娘

雖罔講 木星 是 2 月 2 號欲暗仔彼陣 天頂唯一一粒看會著 ê 行星，毋閣伊 kah 太陽系 上光 ê 衛星（咱 ê 月娘），攏 tī 西爿地平線面頂 ê 晨昏光 內底。 這張相片是 tī 墨西哥 Cancun 市 日落了後翕 ê 。 Tī 這个望遠鏡視野內底正爿頂懸，有咱太陽系上大粒 ê 氣態巨行星。 這張速翕嘛翕著咱 ê 月娘，這馬拄仔好是伊頂月眉 ê 時期。 月盤實在是有夠大 ê 啦！ 這个 咱熟似 ê 月面 這馬是去予 地球 ê 反照光，照甲遮爾光。 毋閣木星邊仔 kah 伊 排規排 ê 四粒光點，是木星 ê 加利略四大衛星。 Ùi 面頂 到 下跤是：木衛三 Ganymede，木星，木衛一 Io，木衛二 Europa，kah 木衛四 Callisto。 木衛三 Ganymede，木衛一 Io，kah 木衛四 Callisto，是比咱 ê 月球閣較大粒。 毋閣 木衛二 Europa 這粒水世界，是比咱 ê 月球較細粒淡薄仔。

[POJ] Sîn-hun-kng ê Goe̍h-niû

Sui-bóng-kóng Bo̍k-chhiⁿ sī jī goe̍h jī hō beh-àm-á hit-chūn thiⁿ-téng ûi-it chi̍t-lia̍p khòaⁿ-ē-tio̍h ê kiâⁿ-chhiⁿ, m̄-koh i kah Thài-iông-hē siōng-kng ê ūi-chhiⁿ (lán ê goe̍h-niû), lóng-sī tī sai-pêng tē-pêng-sòaⁿ bīn-téng ê sîn-hun-kng lāi-té. Chit-tiuⁿ siòng-phìⁿ sī tī Be̍k-se-ko Cancun chhī ji̍t-lo̍h liáu-āu hip ê. Tī chit-ê bōng-oán-kiàⁿ sī-iá lāi-té chiàⁿ-pêng téng-koân, ū lán Thài-iông-hē siōng tōa-lia̍p ê khì-thài kū-kiâⁿ-chhiⁿ. Chit-tiuⁿ sok-hip mā ū hip-tio̍h lán ê goe̍h-niû, chit-má tú-á-hó sī i téng-goe̍h-bâi ê sî-kî. Goe̍h-pôaⁿ si̍t-chāi sī ū-kàu tōa ê la̍h! Chit-ê lán se̍k-sāi ê goe̍h-bīn chit-má sī khì hō͘ Tē-kiû ê hoán-chiò-kng, chiò kah chiah-nī kng. M̄-koh Bo̍k-chhiⁿ piⁿ-á kah i pâi-kui-pâi ê sì-lia̍p kng-tiám sī Bo̍k-chhiⁿ ê Ka-lī-lio̍h sì tōa ūi-chhiⁿ. Ùi bīn-téng kàu ē-kha sī: Bo̍k-ūi-saⁿ Ganymede, Bo̍k-chhiⁿ, Bo̍k-ūi-it Io, Bo̍k-ūi-jī Europa, kah Bo̍k-ūi-sì Callisto. Bo̍k-ūi-saⁿ Ganymede, Bo̍k-ūi-it Io, kah Bo̍k-ūi-sì Callisto, sī pí lán ê Goe̍h-kiû koh-khah tōa-lia̍p. M̄-koh Bo̍k-ūi-jī Europa chit-lia̍p chúi-sè-kài, sī pí lán ê goe̍h-kiû khah sè-lia̍p tām-po̍h-á.

[KIP] Sîn-hun-kng ê Gue̍h-niû

Sui-bóng-kóng Bo̍k-tshinn sī jī gue̍h jī hō beh-àm-á hit-tsūn thinn-tíng uî-it tsi̍t-lia̍p khuànn-ē-tio̍h ê kiânn-tshinn, m̄-koh i kah Thài-iông-hē siōng-kng ê uī-tshinn (lán ê gue̍h-niû), lóng-sī tī sai-pîng tē-pîng-suànn bīn-tíng ê sîn-hun-kng lāi-té. Tsit-tiunn siòng-phìnn sī tī Bi̍k-se-ko Cancun tshī ji̍t-lo̍h liáu-āu hip ê. Tī tsit-ê bōng-uán-kiànn sī-iá lāi-té tsiànn-pîng tíng-kuân, ū lán Thài-iông-hē siōng tuā-lia̍p ê khì-thài kū-kiânn-tshinn. Tsit-tiunn sok-hip mā ū hip-tio̍h lán ê gue̍h-niû, tsit-má tú-á-hó sī i tíng-gue̍h-bâi ê sî-kî. Gue̍h-puânn si̍t-tsāi sī ū-kàu tuā ê la̍h! Tsit-ê lán si̍k-sāi ê gue̍h-bīn tsit-má sī khì hōo Tē-kiû ê huán-tsiò-kng, tsiò kah tsiah-nī kng. M̄-koh Bo̍k-tshinn pinn-á kah i pâi-kui-pâi ê sì-lia̍p kng-tiám sī Bo̍k-tshinn ê Ka-lī-lio̍h sì tuā uī-tshinn. Uì bīn-tíng kàu ē-kha sī: Bo̍k-uī-sann Ganymede, Bo̍k-tshinn, Bo̍k-uī-it Io, Bo̍k-uī-jī Europa, kah Bo̍k-uī-sì Callisto. Bo̍k-uī-sann Ganymede, Bo̍k-uī-it Io, kah Bo̍k-uī-sì Callisto, sī pí lán ê Gue̍h-kiû koh-khah tuā-lia̍p. M̄-koh Bo̍k-uī-jī Europa tsit-lia̍p tsuí-sè-kài, sī pí lán ê gue̍h-kiû khah sè-lia̍p tām-po̍h-á.

[English] Moons at Twilight

Even though Jupiter was the only planet visible in the evening sky on February 2, it shared the twilight above the western horizon with the Solar System's brightest moons. In a single exposure made just after sunset, the Solar System's ruling gas giant is at the upper right in this telephoto field-of-view from Cancun, Mexico. The snapshot also captures our fair planet's own natural satellite in its young crescent phase. The Moon's disk looms large, its familiar face illuminated mostly by earthshine. But the four points of light lined-up with Jupiter are Jupiter's own large Galilean moons. Top to bottom are Ganymede, [Jupiter][Jupiter], Io, Europa, and Callisto. Ganymede, Io, and Callisto are physically larger than Earth's Moon while water world Europa is only slightly smaller.

詞彙學習