土星、土衛三 Tethys、土星環、kah 烏影

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Saturn, Tethys, Rings, and Shadows
• 影像來源：Cassini Imaging Team, SSI, JPL, ESA, NASA
• 台文翻譯：An-Li Tsai (NCU)

[漢羅] 土星、土衛三 Tethys、土星環、kah 烏影

Ùi 土衛三 Tethys 這个堅凍 ê 衛星 來 kā 看，會當看著土星系統內底 ê 奇幻景色：土星環 kah 烏影。 你最近敢 捌去過 土衛三 Tethys？ 若是無，按呢這个 翕著 土星環 壯麗景色 ê Cassini 太空船 就欲 chhōa 咱來去矣。 這張是 2005 年翕 ê。 土衛三 Tethys tī 相片中央，太陽光 ùi 倒爿下跤來。 Tethys 是一粒直徑 1000 公里闊 ê 衛星，伊踅中央彼粒氣態巨行星 ê 軌道半徑是 比 5 倍土星半徑 較短淡薄仔。 土衛三 Tethys 離土星差不多有 30 萬公里遠，遮已經是 土星環較光部份 ê 外口矣，毋閣伊猶 tī 較暗較蔫 ê E 環 內底。 這內底有五粒較大粒 ê 衛星，土衛三 Tethys 就是 其中一粒。 伊是 tī 1980 年代去予人發現 ê。 有兩粒足細粒 ê 衛星：土衛十三 Telesto kah 土衛十四 Calypso，去予土衛三 Tethys 鎖甲穩觸觸，綴 Tethys ê 軌道 leh 行。 土衛十三 Telesto 綴 tī 土衛三 Tethys ê 頭前 leh 行，土衛十四 Calypso 綴 tī 土衛三 Tethys ê 後壁 leh 行。 In to̍h 成做 踅土星 ê 三重奏。

[POJ] Thó͘-chhiⁿ, Thó͘-ūi saⁿ Tethys, Thó͘-chhiⁿ-khoân, kah O͘-iáⁿ

Ùi Thó͘-ūi saⁿ Tethys chit-ê kian-tàng ê ūi-chhiⁿ lâi kā khòaⁿ, ē-tàng khòaⁿ-to̍h Thó͘-chhiⁿ-hē-thóng lāi-té ê kî-hoàn kéng-sek: Thó͘-chhiⁿ-khoân kah o͘-iáⁿ. Lí chòe-kīn kám bat khì kòe Thó͘-ūi saⁿ Tethys? Nā-sī bô, án-ne chit-ê hip-tio̍h Thó͘-chhiⁿ-khoân chòng-lē kéng-sek ê Cassini thài-khong-chûn to̍h beh chhōa lán lâi-khì ah. Chit-tiuⁿ sī jī-khòng-khòng-gō͘ nî hip ê. Thó͘-ūi saⁿ Tethys tī siòng-phìⁿ tiong-ng, thài-iông-kng ùi tò-pêng ē-kha lâi. Tethys sī chi̍t-lia̍p ti̍t-kèng chi̍t-chheng kong-lí khoah ê ūi-chhiⁿ, i se̍h tiong-ng hit-lia̍p khì-thài kū-kiâⁿ-chhiⁿ ê kúi-tō pòaⁿ-kèng sī pí gō͘ pōe Thó͘-chhiⁿ pòaⁿ-kèng khah té tām-po̍h-á. Thó͘-ūi saⁿ Tethys lî Thó͘-chhiⁿ chha-put-to ū saⁿ-cha̍p-bān kong-lí hn̄g, chia í-keng sī Thó͘-chhiⁿ-khoân khah kng pō͘-hūn ê gōa-kháu ah, m̄-koh i iáu tī khah-àm khah-lian ê E khoân lāi-té. Chit lāi-té ū gō͘-lia̍p khah tōa-lia̍p ê ūi-chhiⁿ, Thó͘-ūi saⁿ Tethys tō-sī kî-tiong chi̍t-lia̍p. I sī tī i̍t-kiú-pat-khòng nî-tāi khì hō͘ lâng hoat-hiān ê. Ū nn̄g-lia̍p chiok sè-lia̍p ê ūi-chhiⁿ: Thó͘-ūi cha̍p-saⁿ Telesto kah Thó͘-ūi cha̍p-sì Calypso, khì hō͘ Thó͘-ūi saⁿ Tethys só kah ún-tak-tak, tòe Tethys ê kúi-tō leh kiâⁿ. Thó͘-ūi cha̍p-saⁿ Telesto tòe tī Thó͘-ūi saⁿ Tethys ê thâu-chêng leh kiâⁿ, Thó͘-ūi cha̍p-sì Calypso tòe tī Thó͘-ūi saⁿ Tethys ê āu-piah leh kiâⁿ。 In to̍h chiâⁿ chò se̍h Thó͘-chhiⁿ ê saⁿ-têng-chàu.

[KIP] Thóo-tshinn, Thóo-uī sann Tethys, Thóo-tshinn-khuân, kah Oo-iánn

Uì Thóo-uī sann Tethys tsit-ê kian-tàng ê uī-tshinn lâi kā khuànn, ē-tàng khuànn-to̍h Thóo-tshinn-hē-thóng lāi-té ê kî-huàn kíng-sik: Thóo-tshinn-khuân kah oo-iánn. Lí tsuè-kīn kám bat khì kuè Thóo-uī sann Tethys? Nā-sī bô, án-ne tsit-ê hip-tio̍h Thóo-tshinn-khuân tsòng-lē kíng-sik ê Cassini thài-khong-tsûn to̍h beh tshuā lán lâi-khì ah. Tsit-tiunn sī jī-khòng-khòng-gōo nî hip ê. Thóo-uī sann Tethys tī siòng-phìnn tiong-ng, thài-iông-kng uì tò-pîng ē-kha lâi. Tethys sī tsi̍t-lia̍p ti̍t-kìng tsi̍t-tshing kong-lí khuah ê uī-tshinn, i se̍h tiong-ng hit-lia̍p khì-thài kū-kiânn-tshinn ê kuí-tō puànn-kìng sī pí gōo puē Thóo-tshinn puànn-kìng khah té tām-po̍h-á. Thóo-uī sann Tethys lî Thóo-tshinn tsha-put-to ū sann-tsa̍p-bān kong-lí hn̄g, tsia í-king sī Thóo-tshinn-khuân khah kng pōo-hūn ê guā-kháu ah, m̄-koh i iáu tī khah-àm khah-lian ê E khuân lāi-té. Tsit lāi-té ū gōo-lia̍p khah tuā-lia̍p ê uī-tshinn, Thóo-uī sann Tethys tō-sī kî-tiong tsi̍t-lia̍p. I sī tī i̍t-kiú-pat-khòng nî-tāi khì hōo lâng huat-hiān ê. Ū nn̄g-lia̍p tsiok sè-lia̍p ê uī-tshinn: Thóo-uī tsa̍p-sann Telesto kah Thóo-uī tsa̍p-sì Calypso, khì hōo Thóo-uī sann Tethys só kah ún-tak-tak, tuè Tethys ê kuí-tō leh kiânn. Thóo-uī tsa̍p-sann Telesto tuè tī Thóo-uī sann Tethys ê thâu-tsîng leh kiânn, Thóo-uī tsa̍p-sì Calypso tuè tī Thóo-uī sann Tethys ê āu-piah leh kiânn。 In to̍h tsiânn tsò se̍h Thóo-tshinn ê sann-tîng-tsàu.

[English] Saturn, Tethys, Rings, and Shadows

Seen from ice moon Tethys, rings and shadows would display fantastic views of the Saturnian system. Haven’t dropped in on Tethys lately? Then this gorgeous ringscape from the Cassini spacecraft will have to do for now. Caught in sunlight just below and left of picture center in 2005, Tethys itself is about 1,000 kilometers in diameter and orbits not quite five saturn-radii from the center of the gas giant planet. At that distance (around 300,000 kilometers) it is well outside Saturn’s main bright rings, but Tethys is still one of five major moons that find themselves within the boundaries of the faint and tenuous outer E ring. Discovered in the 1980s, two very small moons Telesto and Calypso are locked in stable along Tethys’ orbit. Telesto precedes and Calypso follows Tethys as the trio circles Saturn.

詞彙學習（漢羅/POJ/KIP/華語/English）

• 【土星環】Thó͘-chhiⁿ-khoân/Thóo-tshinn-khuân/土星環/Saturn’s Ring
• 【氣態巨行星】khì-thài kū-kiâⁿ-chhiⁿ/khì-thài kū-kiânn-tshinn/氣態巨行星/gas giant planet
• 【三重奏】saⁿ-têng-chàu/sann-tîng-tsàu/三重奏/the trio
• 【直徑】ti̍t-kèng/ti̍t-kìng/直徑/diameter
• 【半徑】pòaⁿ-kèng/puànn-kìng/半徑/radius