哈伯影像:木星 kah 變細粒 ê 大紅斑

Page(/daily/2022/01/20220109.md)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 哈伯影像:木星 kah 變細粒 ê 大紅斑

木星 ê 大紅斑會變做啥款? 木星 這粒氣態巨行星是太陽系內底上大粒 ê 行星。 伊 ê 質量是 地球 ê 320 倍大。 木星是目前咱知影太陽系內底有上大、上久風暴系統 ê 行星。 就是倒爿你看著 ê 彼粒 大紅斑大紅斑 大到比地球閣較大,就算講伊這馬變較細粒矣,猶是較大。 若是 kah 歷史記錄比起來,這个 風暴 干焦 150 年前 ê 1/3 大爾爾。 NASA ê 外行星大氣遺產 (OPAL) 計畫,最近一直咧用 哈伯太空望遠鏡 監看這个風暴。 這張哈伯 OPAL 影像 是 2016 年 ê 木星,毋閣色調有處理過,才會予紅色變較明顯。 咱 ùi 現代 大紅斑資料知影,風暴區是愈來愈細,毋閣伊嘛 tī 坦徛方向變 較懸淡薄仔。 無人知影這粒 大紅斑 未來會變按怎,嘛毋知是毋是會繼續 變閣較細。 若是按呢,大紅斑有一工可能會 完全變無去

[POJ] Ha-peh iáⁿ-siōng: Bo̍k-chhiⁿ kah piàn sè-lia̍p ê Tōa-âng-pan

Bo̍k-chhiⁿ ê Tōa-âng-pan ē piàn-chò siáⁿ-khoán? Bo̍k-chhiⁿ chit-lia̍p Khì-thài kū-kiâⁿ-chhiⁿ sī Thài-iông-hē lāi-té siōng tōa-lia̍p ê kiâⁿ-chhiⁿ. I ê chit-liōng sī Tē-kiû ê saⁿ-pah-jī-cha̍p poe tōa. Bo̍k-chhiⁿ sī bo̍k-chêng lán chai-iáⁿ Thài-iông-hē lāi-té ū siōng-tōa, siōng-kú hong-pō hē-thóng ê kiâⁿ-chhiⁿ. Tō-sī tò-pêng lí khòaⁿ–tio̍h ê hit-lia̍p Tōa-âng-pan. Tōa-âng-pan tōa kàu pí Tē-kiû koh-khah tōa, tō-sǹg kóng i chit-má piàn khah sè-lia̍p ah, iáu-sī khah-tōa. Nā-sī kah le̍k-sú kì-lo̍k pí–khí-lâi, chit-ê hong-pō kan-na chi̍t-pah-gō͘-cha̍p nî-chêng ê saⁿ-hun-chi-it tōa niā-niā. NASA ê Gōa-kiâⁿ-chhiⁿ Tōa-khì Ûi-sán (OPAL) kè-ōe, chòe-kīn it-ti̍t leh iōng Ha-peh thài-khong-bōng-oán-kiàⁿ kàm-khòaⁿ chit-ê hong-pō. Chit-tiuⁿ Ha-peh OPAL iáⁿ-siōng sī jī-khòng-it-lio̍k nî ê Bo̍k-chhiⁿ, m̄-koh sek-tiāu ū chhú-lí kòe, chiah-ē hō͘ âng-sek piàn khah bêng-hián. Lán ùi hiān-tāi Tōa-âng-pan chu-liāu chai-iáⁿ, hong-pō-khu sī lú-lâi lú-sè, m̄-koh i mā tī thán-khiā hong-hiòng piàn khah-koân tām-po̍h-á. Bô-lâng chai-iáⁿ chit-lia̍p Tōa-âng-pan bī-lâi ē piàn án-ná, mā m̄-chai sī-m̄-sī ē kè-sio̍k piàn koh-khah sè. Nā-sī án-ne, Tōa-âng-pan ū chi̍t-kang khó-lêng ē oân-choân piàn bô–khì.

[KIP] Ha-peh iánn-siōng: Bo̍k-tshinn kah piàn sè-lia̍p ê Tuā-âng-pan

Bo̍k-tshinn ê Tuā-âng-pan ē piàn-tsò siánn-khuán? Bo̍k-tshinn tsit-lia̍p Khì-thài kū-kiânn-tshinn sī Thài-iông-hē lāi-té siōng tuā-lia̍p ê kiânn-tshinn. I ê tsit-liōng sī Tē-kiû ê sann-pah-jī-tsa̍p pue tuā. Bo̍k-tshinn sī bo̍k-tsîng lán tsai-iánn Thài-iông-hē lāi-té ū siōng-tuā, siōng-kú hong-pō hē-thóng ê kiânn-tshinn. Tō-sī tò-pîng lí khuànn–tio̍h ê hit-lia̍p Tuā-âng-pan. Tuā-âng-pan tuā kàu pí Tē-kiû koh-khah tuā, tō-sǹg kóng i tsit-má piàn khah sè-lia̍p ah, iáu-sī khah-tuā. Nā-sī kah li̍k-sú kì-lo̍k pí–khí-lâi, tsit-ê hong-pō kan-na tsi̍t-pah-gōo-tsa̍p nî-tsîng ê sann-hun-tsi-it tuā niā-niā. NASA ê Guā-kiânn-tshinn Tuā-khì Uî-sán (OPAL) kè-uē, tsuè-kīn it-ti̍t leh iōng Ha-peh thài-khong-bōng-uán-kiànn kàm-khuànn tsit-ê hong-pō. Tsit-tiunn Ha-peh OPAL iánn-siōng sī jī-khòng-it-lio̍k nî ê Bo̍k-tshinn, m̄-koh sik-tiāu ū tshú-lí kuè, tsiah-ē hōo âng-sik piàn khah bîng-hián. Lán uì hiān-tāi Tuā-âng-pan tsu-liāu tsai-iánn, hong-pō-khu sī lú-lâi lú-sè, m̄-koh i mā tī thán-khiā hong-hiòng piàn khah-kuân tām-po̍h-á. Bô-lâng tsai-iánn tsit-lia̍p Tuā-âng-pan bī-lâi ē piàn án-ná, mā m̄-tsai sī-m̄-sī ē kè-sio̍k piàn koh-khah sè. Nā-sī án-ne, Tuā-âng-pan ū tsi̍t-kang khó-lîng ē uân-tsuân piàn bô–khì.

[English] Hubble’s Jupiter and the Shrinking Great Red Spot

What will become of Jupiter’s Great Red Spot? Gas giant Jupiter is the solar system’s largest world with about 320 times the mass of planet Earth. Jupiter is home to one of the largest and longest lasting storm systems known, the Great Red Spot (GRS), visible to the left. The GRS is so large it could swallow Earth, although it has been shrinking. Comparison with historical notes indicate that the storm spans only about one third of the exposed surface area it had 150 years ago. NASA’s Outer Planets Atmospheres Legacy (OPAL) program has been monitoring the storm more recently using the Hubble Space Telescope. The featured Hubble OPAL image shows Jupiter as it appeared in 2016, processed in a way that makes red hues appear quite vibrant. Modern GRS data indicate that the storm continues to constrict its surface area, but is also becoming slightly taller, vertically. No one knows the future of the GRS, including the possibility that if the shrinking trend continues, the GRS might one day even do what smaller spots on Jupiter have done – disappear completely.

詞彙學習(台語漢字/POJ/KIP/華語漢字/English)

  • 【大紅斑】Tōa-âng-pan/Tuā-âng-pan/大紅斑/Great Red Spot
  • 【氣態巨行星】Khì-thài kū-kiâⁿ-chhiⁿ/Khì-thài kū-kiânn-tshinn/氣巨行星/Gas giant
  • 【外行星大氣遺產計畫】Gōa-kiâⁿ-chhiⁿ Tōa-khì Ûi-sán Kè-ōe/Guā-kiânn-tshinn Tuā-khì Uî-sán Kè-uē/外行星大氣遺產計畫/Outer Planets Atmospheres Legacy (OPAL) program
  • 【坦徛】thán-khiā/thán-khiā/垂直/vertical

  1. 阮嘛有 Podcast面冊InstagramTwitter,會逐工 kā 你提醒有新 ê 翻譯 kah 錄音。閣有 YouTube 頻道,有當時仔會出新 ê 影片,緊來追蹤! ↩︎

  2. 本站 ê 介紹 (台語/華語)FAQ (華語) ↩︎

  3. 看無台文?阮讀予你聽!已經錄過 ê 文章 ↩︎

昨昏 ê 圖:北方 ê 四分儀座流星雨 明仔載 ê 圖:Leonard 彗星 ê 尾溜 搖咧搖咧