予徛鵝有夠歡喜 ê 日食

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Ecstatic Solar Eclipse
• 影像來源 kah 版權：Annie Schmidt (Point Blue Conservation Science)
• 上新消息：來看安搭 JWST 太空望遠鏡 ê 狀況
• 台文翻譯：An-Li Tsai (NCU)

[漢羅] 予徛鵝有夠歡喜 ê 日食

2021 年 12 月 4 號是 2021 年上尾改 ê 日食。 有一隻公 ê Adelie 徛鵝歡喜甲吱吱叫，才有這張剪影相片。 是講這款叫聲是有較特別，一般來講是公 ê 徛鵝欲佔地盤抑是欲 宣佈大代誌 ê 時陣才會按呢。 這寡徛鵝 ê 地盤是 tī 南極洲 ê Cape Crozier，是 Adelie 徛鵝上大 ê 住所。 這个所在已經 予研究人員研究 25 冬矣。 舊年 12 月 ê 日食，tī 地球 上南爿 ê 大陸 去予 月球烏影閘著 上濟 ê 時陣，有 80 葩遐爾濟。

[POJ] Hō͘ khiā-gô ū-kàu hoaⁿ-hí ê Ji̍t-si̍t

Jī-khòng-jī-it nî cha̍p-jī goe̍h sì hō sī jī-khòng-jī-it nî siōng-bóe-kái ê ji̍t-si̍t. Ū chi̍t-chiah kang ê Adelie khiā-gô hoaⁿ-hí kah ki-ki-kiò, chiah-ū chit-tiuⁿ chián-iáⁿ siòng-phìⁿ. Sī-kóng chit-khoán kiò-siaⁿ sī ū khah te̍k-pia̍t, it-poaⁿ lâi-kóng sī kang ê khiā-gô beh chiàm tē-pôaⁿ iah-sī beh soan-pò͘ tōa-tāi-chì ê sì-chheng chiah-ē án-ne. Chit-kóa khiā-gô ê tē-pôaⁿ sī tī Lâm-ke̍k-chiu ê Cape Crozier, sī Adelie khiā-gô siōng-tōa ê chū-só͘. Chit-ê só͘-chāi í-keng hō͘ gián-kiù-jîn-goân gián-kiù jī-cha̍p-gō͘ tang ah. Kū-nî cha̍p-jī goe̍h ê ji̍t-si̍t, tī Tē-kiû siōng lâm-pêng ê tāi-lio̍k khì hō͘ goe̍h-kiû o͘-iáⁿ cha̍h-tio̍h siōng-chōe ê sì-chheng, ū peh-cha̍p pha hiah-nī chōe.

[KIP] Hōo khiā-gô ū-kàu huann-hí ê Ji̍t-si̍t

Jī-khòng-jī-it nî tsa̍p-jī gue̍h sì hō sī jī-khòng-jī-it nî siōng-bué-kái ê ji̍t-si̍t. Ū tsi̍t-tsiah kang ê Adelie khiā-gô huann-hí kah ki-ki-kiò, tsiah-ū tsit-tiunn tsián-iánn siòng-phìnn. Sī-kóng tsit-khuán kiò-siann sī ū khah ti̍k-pia̍t, it-puann lâi-kóng sī kang ê khiā-gô beh tsiàm tē-puânn iah-sī beh suan-pòo tuā-tāi-tsì ê sì-tshing tsiah-ē án-ne. Tsit-kuá khiā-gô ê tē-puânn sī tī Lâm-ki̍k-tsiu ê Cape Crozier, sī Adelie khiā-gô siōng-tuā ê tsū-sóo. Tsit-ê sóo-tsāi í-king hōo gián-kiù-jîn-guân gián-kiù jī-tsa̍p-gōo tang ah. Kū-nî tsa̍p-jī gue̍h ê ji̍t-si̍t, tī Tē-kiû siōng lâm-pîng ê tāi-lio̍k khì hōo gue̍h-kiû oo-iánn tsa̍h-tio̍h siōng-tsuē ê sì-tshing, ū peh-tsa̍p pha hiah-nī tsuē.

[English] Ecstatic Solar Eclipse

A male Adelie penguin performed this Ecstatic Vocalization in silhouette during the December 4 solar eclipse, the final eclipse of 2021. Of course his Ecstatic Vocalization is a special display that male penguins use to claim their territory and advertise their condition. This penguin's territory, at Cape Crozier Antarctica, is located in one of the largest Adelie penguin colonies. The colony has been studied by researchers for over 25 years. From there, last December's eclipse was about 80 percent total when seen at its maximum phase as the Moon's shadow crossed planet Earth's southernmost continent.

詞彙學習