一冬 ê 日出記錄

Page(/daily/2022/01/20220105)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 一冬 ê 日出記錄

日頭敢會一直 tī 仝一个方向 peh–起來?袂呢! 其實逐個月日頭 peh-起來 ê 方向攏無仝。 這張影像 是 2021 年 tī 加拿大 Alberta 省 Edmonton 市 逐個月日頭 peh–起來 ê 方向。 翕相 ê kha-mé-lah 攏 tùi 東爿翕,倒爿是北爿,正爿是南爿。 你若是 同齊看這支影片 to̍h 知,上面頂彼張是 2020 年 12 月翕 ê,上下底彼張是 2021 年 12 月翕 ê。 雖罔講 日頭總是 ùi 東爿 peh–起來,毋過伊會 tī 12 月 ê 冬節 peh-到東爿上南彼位,tī 6 月 ê 夏節 peh-到 東爿上北彼位。 Tùi 真濟國家來講,冬節 是官方換季 ê 日子。 比論講,若是 較倚北爿 ê 國家,冬節就是寒天 ê 頭一工。 寒天 ê 時陣,若是欲 tī 地球表面 kah 大氣層 利用太陽能 kā 加溫,抑是欲 kā 太陽能儉–起來,攏足無效率 ê,所以 寒天 才會遮爾冷。

[POJ] Chi̍t-tang ê ji̍t-chhut kì-lo̍k

Ji̍t-thâu kám-ē it-ti̍t tī kāng-chi̍t-ê hong-hiòng peh–khí-lâi? Bōe neh! Kî-si̍t ta̍k-kò-goe̍h ji̍t-thâu peh–khí-lâi ê hong-hiòng lóng bô-kâng. Chit-tiuⁿ iáⁿ-siōng sī jī-khòng-jī-it nî tī Ka-ná-tà Alberta séng Edmonton chhī ta̍k-kò-goe̍h ji̍t-thâu peh–khí-lâi ê hong-hiòng. Hip-siòng ê kha-mé-lah lóng tùi tang-pêng hip, tò-pêng sī pak-pêng, chiàⁿ-pêng sī lâm-pêng. Lí nā-sī tâng-chê khòaⁿ chit-ki iáⁿ-phìⁿ to̍h chai, siōng bīn-téng hit-tiuⁿ sī jī-khòng-jī-khòng nî cha̍p-jī goe̍h hip ê, siōng ē-té hit-tiuⁿ sī jī-khòng-jī-it nî cha̍p-jī goe̍h hip ê. Sui-bóng-kóng ji̍t-thâu chóng-sī ùi tang-pêng peh–khí-lâi, m̄-koh i ē tī cha̍p-jī goe̍h ê tang-cheh peh-kàu tang-pêng siōng lâm hit-ūi, tī la̍k goe̍h ê hā-cheh peh-kàu tang-pêng siōng pak hit-ūi. Tùi chin-chōe kok-ka lâi-kóng, tang-cheh sī koaⁿ-hong ōaⁿ-kùi ê ji̍t-chí. Pí-lūn kóng, nā-sī khah óa pak-pêng ê kok-ka, tang-cheh tō-sī kôaⁿ-thiⁿ ê thâu-chi̍t-kang. Kôaⁿ-thiⁿ ê sî-chūn, nā-sī beh tī Tē-kiû piáu-bīn kah tōa-khì-chân lī-iōng thài-iông-lêng kā ka-ūn, iah-sī beh kā thài-iông-lêng khiām–khí-lâi, lóng chiok bô hāu-lu̍t ê, só͘-í kôaⁿ-thiⁿ chiah-ē chiah-nī léng.

[KIP] Tsi̍t-tang ê ji̍t-tshut kì-lo̍k

Ji̍t-thâu kám-ē it-ti̍t tī kāng-tsi̍t-ê hong-hiòng peh–khí-lâi? Buē neh! Kî-si̍t ta̍k-kò-gue̍h ji̍t-thâu peh–khí-lâi ê hong-hiòng lóng bô-kâng. Tsit-tiunn iánn-siōng sī jī-khòng-jī-it nî tī Ka-ná-tà Alberta síng Edmonton tshī ta̍k-kò-gue̍h ji̍t-thâu peh–khí-lâi ê hong-hiòng. Hip-siòng ê kha-mé-lah lóng tuì tang-pîng hip, tò-pîng sī pak-pîng, tsiànn-pîng sī lâm-pîng. Lí nā-sī tâng-tsê khuànn tsit-ki iánn-phìnn to̍h tsai, siōng bīn-tíng hit-tiunn sī jī-khòng-jī-khòng nî tsa̍p-jī gue̍h hip ê, siōng ē-té hit-tiunn sī jī-khòng-jī-it nî tsa̍p-jī gue̍h hip ê. Sui-bóng-kóng ji̍t-thâu tsóng-sī uì tang-pîng peh–khí-lâi, m̄-koh i ē tī tsa̍p-jī gue̍h ê tang-tseh peh-kàu tang-pîng siōng lâm hit-uī, tī la̍k gue̍h ê hā-tseh peh-kàu tang-pîng siōng pak hit-uī. Tuì tsin-tsuē kok-ka lâi-kóng, tang-tseh sī kuann-hong uānn-kuì ê ji̍t-tsí. Pí-lūn kóng, nā-sī khah uá pak-pîng ê kok-ka, tang-tseh tō-sī kuânn-thinn ê thâu-tsi̍t-kang. Kuânn-thinn ê sî-tsūn, nā-sī beh tī Tē-kiû piáu-bīn kah tuā-khì-tsân lī-iōng thài-iông-lîng kā ka-ūn, iah-sī beh kā thài-iông-lîng khiām–khí-lâi, lóng tsiok bô hāu-lu̍t ê, sóo-í kuânn-thinn tsiah-ē tsiah-nī líng.

[English] A Year of Sunrises

Does the Sun always rise in the same direction? No. As the months change, the direction toward the rising Sun changes, too. The featured image shows the direction of sunrise every month during 2021 as seen from the city of Edmonton, Alberta, Canada. The camera in the image is always facing due east, with north toward the left and south toward the right. As shown in an accompanying video, the top image was taken in 2020 December, while the bottom image was captured in 2021 December, making 13 images in total. Although the Sun always rises in the east in general, it rises furthest to the south of east on the December solstice, and furthest north of east on the June solstice. In many countries, the December Solstice is considered an official change in season: for example the first day of winter in the North. Solar heating and stored energy in the Earth’s surface and atmosphere are near their lowest during winter, making the winter season the coldest of the year.

詞彙學習(漢羅/POJ/KIP/華語/English)

  • 【冬節】tang-cheh/tang-tseh/冬節/December Solstice
  • 【夏節】hā-cheh/hā-tseh/夏節/June solstice

  1. 阮嘛有 Podcast面冊InstagramTwitter,會逐工 kā 你提醒有新 ê 翻譯 kah 錄音。閣有 YouTube 頻道,有當時仔會出新 ê 影片,緊來追蹤! ↩︎

  2. 本站 ê 介紹 (台語/華語)FAQ (華語) ↩︎

  3. 看無台文?阮讀予你聽!已經錄過 ê 文章 ↩︎

昨昏 ê 圖:土星環外口 ê 衛星 明仔載 ê 圖:金星 做 暗頭仔星 ê 上尾一工