土星環外口 ê 衛星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Moons Beyond Rings at Saturn
• 影像來源：NASA, ESA, JPL, Cassini Imaging Team
• 探索宇宙：APOD 亂數產生器
• 台文翻譯：An-Li Tsai (NCU)

[漢羅] 土星環外口 ê 衛星

土星 ê 衛星是去予人按怎矣？ 免緊張啦！土衛五 Rhea 是去予土星環閘著一部份 niă 啦。 2020 年，有一台 Cassini 機器人太空船踅土星 leh 行。 伊 ùi 太陽系 內底 上有名 ê 土星環 邊仔，翕著 這个角度 ê 相片。 你看--著 ê 土星環，較外口 ê 是較薄 ê F 環，較內底 ê 是較厚 ê A 環 kah B 環。 雖罔講 土衛十 Janus 看起來敢若是 浮 tī 土星環面頂，毋閣其實伊是 tī 土星環 ê 外口。 伊 是土衛內底較細粒 ê 衛星，干焦 180 公里闊爾爾。 離 kha-mé-lah 較遠 ê 彼粒是 土衛五 Rhea，有 1500 公里闊，伊面頂有足濟隕石坑。 土衛五 Rhea ê 頭頂干焦有法度 ùi 土星環 ê 環溝仔 看著。 Cassini 太空船 經過 10 外冬 ê 探索 kah 研究，tī 2017 年 ê 時陣 kā 伊 ê 燃料用煞 矣。 伊落尾 飛入去土星 ê 大氣層，to̍h 按呢 熔--去 矣。

[POJ] Thó͘-chhiⁿ-khoân gōa-kháu ê ūi-chhiⁿ

Thó͘-chhiⁿ ê ūi-chhiⁿ sī khì hō͘ lâng án-ná ah? Bián kín-tiuⁿ lah! Thó͘-ūi-gō͘ Rhea sī khì hō͘ Thó͘-chhiⁿ-khoân cha̍h-tio̍h chi̍t-pō͘-hūn niă lah! Jī-khòng-jī-khòng nî, ū chi̍t-tâi Cassini ke-khì-lâng thài-khong-chûn se̍h Thó͘-chhiⁿ leh kiâⁿ. I ùi Thài-iông-hē lāi-té siōng ū-miâ ê Thó͘-chhiⁿ-khoân piⁿ-á, hip-tio̍h chit-ê kak-tō͘ ê siòng-phìⁿ. Lí khòaⁿ--tio̍h ê Thó͘-chhiⁿ-khoân, khah gōa-kháu ê sī khah-po̍h ê F khoân, khah lāi-té ê sī khah-kāu ê A khoân kah B khoân. Sui-bóng-kóng Thó͘-ūi-cha̍p Janus khòaⁿ--khí-lâi ká-ná sī phû tī Thó͘-chhiⁿ-khoân bīn-téng, m̄-koh kî-si̍t sī tī Thó͘-chhiⁿ-khoân ê gōa-kháu. I sī Thó͘-ūi lāi-té khah sè-lia̍p ê ūi-chhiⁿ, kan-na chi̍t-pah-poeh-cha̍p kong-lí khoah niā-niā. Lî kha-mé-lah khah-hn̄g ê hit-lia̍p sī Thó͘-ūi-gō͘ Rhea, ū chi̍t-chheng-gō͘-pah kong-lí khoah, i bīn-téng ū chiok-chōe ún-se̍k-kheⁿ。 Thó͘-ūi-gō͘ Rhea ê thâu-téng kan-na ū-hoat-tō͘ ùi Thó͘-chhiⁿ-khoân ê khoân-kau-á khòaⁿ-tio̍h. Cassini Thài-khong-chûn kéng-kòe cha̍p-gōa tang ê thàm-soh kah gián-kiù, tī jī-khòng-it-chhit nî ê sî-chūn kā i ê jiân-liāu iōng soah ah. I lo̍h-bóe poe ji̍p-khì Thó͘-chhiⁿ ê tōa-khì-chân, to̍h án-ne iûⁿ--khì ah.

[KIP] Thóo-tshinn-khuân guā-kháu ê uī-tshinn

Thóo-tshinn ê uī-tshinn sī khì hōo lâng án-ná ah? Bián kín-tiunn lah! Thóo-uī-gōo Rhea sī khì hōo Thóo-tshinn-khuân tsa̍h-tio̍h tsi̍t-pōo-hūn niă lah! Jī-khòng-jī-khòng nî, ū tsi̍t-tâi Cassini ke-khì-lâng thài-khong-tsûn se̍h Thóo-tshinn leh kiânn. I uì Thài-iông-hē lāi-té siōng ū-miâ ê Thóo-tshinn-khuân pinn-á, hip-tio̍h tsit-ê kak-tōo ê siòng-phìnn. Lí khuànn--tio̍h ê Thóo-tshinn-khuân, khah guā-kháu ê sī khah-po̍h ê F khuân, khah lāi-té ê sī khah-kāu ê A khuân kah B khuân. Sui-bóng-kóng Thóo-uī-tsa̍p Janus khuànn--khí-lâi ká-ná sī phû tī Thóo-tshinn-khuân bīn-tíng, m̄-koh kî-si̍t sī tī Thóo-tshinn-khuân ê guā-kháu. I sī Thóo-uī lāi-té khah sè-lia̍p ê uī-tshinn, kan-na tsi̍t-pah-pueh-tsa̍p kong-lí khuah niā-niā. Lî kha-mé-lah khah-hn̄g ê hit-lia̍p sī Thóo-uī-gōo Rhea, ū tsi̍t-tshing-gōo-pah kong-lí khuah, i bīn-tíng ū tsiok-tsuē ún-si̍k-khenn。 Thóo-uī-gōo Rhea ê thâu-tíng kan-na ū-huat-tōo uì Thóo-tshinn-khuân ê khuân-kau-á khuànn-tio̍h. Cassini Thài-khong-tsûn kíng-kuè tsa̍p-guā tang ê thàm-soh kah gián-kiù, tī jī-khòng-it-tshit nî ê sî-tsūn kā i ê jiân-liāu iōng suah ah. I lo̍h-bué pue ji̍p-khì Thóo-tshinn ê tuā-khì-tsân, to̍h án-ne iûnn--khì ah.

[English] Moons Beyond Rings at Saturn

What's happened to that moon of Saturn? Nothing -- Saturn's moon Rhea is just partly hidden behind Saturn's rings. In 2010, the robotic Cassini spacecraft then orbiting Saturn took this narrow-angle view looking across the Solar System's most famous rings. Rings visible in the foreground include the thin F ring on the outside and the much wider A and B rings just interior to it. Although it seems to be hovering over the rings, Saturn's moon Janus is actually far behind them. Janus is one of Saturn's smaller moons and measures only about 180 kilometers across. Farther out from the camera is the heavily cratered Rhea, a much larger moon measuring 1,500 kilometers across. The top of Rhea is visible only through gaps in the rings. After more than a decade of exploration and discovery, the Cassini spacecraft ran low on fuel in 2017 and was directed to enter Saturn's atmosphere, where it surely melted.

詞彙學習