2021 年 ê 月圓

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：The Full Moon of 2021
• 影像來源 kah 版權：Soumyadeep Mukherjee
• 台文翻譯：An-Li Tsai (NCU)

[漢羅] 2021 年 ê 月圓

這个天文相片計畫是 kā 2021 年規年 ê 月圓相片鬥做這張合成相片。 這寡相片是咱較熟似 ê 這爿面 ê 月球，in 攏是 tī 月相 上圓上光 ê 時陣翕 ê。 這 月份 是照排 ê，上面頂彼條相 to̍h 是一年 ê 開始。 這相片是 tī 印度 ê Kolkata 市 翕 ê，是用仝一台 kha-mé-lah kah 鏡頭翕 ê。 逐條相片攏是 kā 逐擺 ê 月圓相片按照仝款 ê 像素比例鬥做這張 ê。 這寡一條一條 ê 相片看起來敢若是無排好勢，毋閣這就是欲 kā 你講，月圓 ê 角寸尺是會改變 ê。 這愛看月球 kah 地球 ê 距離是毋是有變。 逐條相片攏有標示講，這是 佗一個月？ 這個月 ê 月圓叫啥物名？ Kah 地球 ê 距離是幾公里？ 角距離是偌濟？ 這个角距離 ê 單位是角分，是一度 ê 1/60。 上大粒 ê 月圓是 tī 近地點附近，是 tī 5 月 kah 地球倚上近 ê 時陣。 上細粒 ê 月圓是 tī 遠地點附近，是 tī 12 月 kah 地球離上遠 ê 時陣。 5 月 kah 11 月 ê 月圓有趨 tùi 地球 ê 烏影下底，就是 2021 年彼兩擺發生月食 ê 時陣。

[POJ] Jī-khòng-jī-it nî ê Goe̍h-îⁿ

Chit-ê thian-bûn siòng-phìⁿ kè-ōe sī kā jī-khòng-jī-it nî kui-nî ê goe̍h-îⁿ siòng-phìⁿ tàu-chò chit-tiuⁿ ha̍p-sêng siòng-phìⁿ. Chit-kóa siòng-phìⁿ sī lán khah se̍k-sāi ê chit-pêng-bīn ê Goe̍h-kiû, in lóng-sī tī goe̍h-siòng siōng-îⁿ siōng-kng ê sî-chūn hip ê. Che goe̍h-hūn sī chiàu-pâi ê, siōng bīn-téng hit-tiâu siòng to̍h sī chi̍t-nî ê khai-sí. Che siòng-phìⁿ sī tī Ìn-tō͘ ê Kolkata chhī hip ê, sī iōng kâng chi̍t-tâi kha-mé-lah kah kiàⁿ-thâu hip ê. Ta̍k tiâu siòng-phìⁿ lóng-sī kā ta̍k-pái ê goe̍h-îⁿ siòng-phìⁿ àn-chiàu kāng-khoán ê siōng-sò͘ pí-lē tàu-chò chit-tiuⁿ ê. Chit-kóa chi̍t-tiâu-chi̍t-tiâu ê siòng-phìⁿ khòaⁿ--khí-lâi ká-ná sī bô pâi hó-sè, m̄-koh che tō-sī beh kā lí kóng, goe̍h-îⁿ ê kak-chhùn-chhioh sī ē kái-piàn ê. Che ài khòaⁿ Goe̍h-kiû kah Tē-kiû ê kū-lî sī-m̄-sī ū piàn. Ta̍k-tiâu siòng-phìⁿ lóng-ū piau-sī kóng, che-sī to̍h-chi̍t-ko-goe̍h? Chit-kò-goe̍h ê goe̍h-îⁿ kiò siáⁿ-mih miâ? Kah Tē-kiû ê kū-lî sī kúi kong-lí? Kak-kū-lî sī gōa-chōe? Chit-ê kak-kū-lî ê tan-ūi sī kak-hun, sī chi̍t-tō͘ ê la̍k-cha̍p-hun-chit-it. Siōng tōa-lia̍p ê goe̍h-îⁿ sī tī kīn-tē-tiám hū-kīn, sī tī gō͘ goe̍h kah Tē-kiû óa siōng-kīn ê sî-chūn. Siōng sè-lia̍p ê goe̍h-îⁿ sī tī oán-tē-tiám hū-kīn, sī tī cha̍p-jī goe̍h lî Tē-kiû siōng-hn̄g ê sî-chūn. Gô͘ goe̍h kah cha̍p-it goe̍h ê goe̍h-îⁿ ū chhu tùi Tē-kiû ê o͘-iáⁿ ē-té, tō-sī jī-khòng-jī-it nî hit nn̄g-pái hoat-seng goe̍h-si̍t ê sî-chūn.

[KIP] Jī-khòng-jī-it nî ê Gue̍h-înn

Tsit-ê thian-bûn siòng-phìnn kè-uē sī kā jī-khòng-jī-it nî kui-nî ê gue̍h-înn siòng-phìnn tàu-tsò tsit-tiunn ha̍p-sîng siòng-phìnn. Tsit-kuá siòng-phìnn sī lán khah si̍k-sāi ê tsit-pîng-bīn ê Gue̍h-kiû, in lóng-sī tī gue̍h-siòng siōng-înn siōng-kng ê sî-tsūn hip ê. Tse gue̍h-hūn sī tsiàu-pâi ê, siōng bīn-tíng hit-tiâu siòng to̍h sī tsi̍t-nî ê khai-sí. Tse siòng-phìnn sī tī Ìn-tōo ê Kolkata tshī hip ê, sī iōng kâng tsi̍t-tâi kha-mé-lah kah kiànn-thâu hip ê. Ta̍k tiâu siòng-phìnn lóng-sī kā ta̍k-pái ê gue̍h-înn siòng-phìnn àn-tsiàu kāng-khuán ê siōng-sòo pí-lē tàu-tsò tsit-tiunn ê. Tsit-kuá tsi̍t-tiâu-tsi̍t-tiâu ê siòng-phìnn khuànn--khí-lâi ká-ná sī bô pâi hó-sè, m̄-koh tse tō-sī beh kā lí kóng, gue̍h-înn ê kak-tshùn-tshioh sī ē kái-piàn ê. Tse ài khuànn Gue̍h-kiû kah Tē-kiû ê kū-lî sī-m̄-sī ū piàn. Ta̍k-tiâu siòng-phìnn lóng-ū piau-sī kóng, tse-sī to̍h-tsi̍t-ko-gue̍h? Tsit-kò-gue̍h ê gue̍h-înn kiò siánn-mih miâ? Kah Tē-kiû ê kū-lî sī kuí kong-lí? Kak-kū-lî sī guā-tsuē? Tsit-ê kak-kū-lî ê tan-uī sī kak-hun, sī tsi̍t-tōo ê la̍k-tsa̍p-hun-tsit-it. Siōng tuā-lia̍p ê gue̍h-înn sī tī kīn-tē-tiám hū-kīn, sī tī gōo gue̍h kah Tē-kiû uá siōng-kīn ê sî-tsūn. Siōng sè-lia̍p ê gue̍h-înn sī tī uán-tē-tiám hū-kīn, sī tī tsa̍p-jī gue̍h lî Tē-kiû siōng-hn̄g ê sî-tsūn. Gôo gue̍h kah tsa̍p-it gue̍h ê gue̍h-înn ū tshu tuì Tē-kiû ê oo-iánn ē-té, tō-sī jī-khòng-jī-it nî hit nn̄g-pái huat-sing gue̍h-si̍t ê sî-tsūn.

[English] The Full Moon of 2021

Every Full Moon of 2021 shines in this year-spanning astrophoto project, a composite portrait of the familiar lunar nearside at each brightest lunar phase. Arranged by moonth, the year progresses in stripes beginning at the top. Taken with the same camera and lens the stripes are from Full Moon images combined at the same pixel scale. The stripes still looked mismatched, but they show that the Full Moon's angular size changes throughout the year depending on its distance from Kolkata, India, planet Earth. The calendar month, a full moon name, distance in kilometers, and angular size is indicated for each stripe. Angular size is in minutes of arc corresponding to 1/60th of a degree. The largest Full Moon is near a perigee or closest approach in May, and the smallest near an apogee, the most distant Full Moon in December. Full moons of May and November also slid into Earth's shadow during 2021's two lunar eclipses.

詞彙學習