地球頭頂 ê JWST 太空望遠鏡

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：James Webb Space Telescope over Earth
• 影像來源：Arianespace, ESA, NASA, CSA, CNES
• APOD ê 相館：發射 JWST 太空望遠鏡
• 台文翻譯：An-Li Tsai (NCU)

[漢羅] 地球頭頂 ê JWST 太空望遠鏡

咱這馬閣有一台新 ê 太空望遠鏡矣！ 這台叫做 JWST 太空望遠鏡，伊毋若比 哈伯太空望遠鏡 ê 鏡面 大 5 倍以上，而且閣會當比 哈伯太空望遠鏡 提著閣較好 ê 紅外線 影像。 這張相片 是昨昏 tī 地球頂懸 ê JWST 太空望遠鏡。 伊才拄 ùi Ariane 五號火箭 ê 頂節火箭擲出來。 這台火箭是 ùi 南美洲 ê 法屬 Guiana 發射 ê。 後個月 JWST 會行到 太陽-地球 系統 ê L2 點 附近，彼是一个會 kah 地球仝步踅太陽 ê 點。 Ùi 這馬開始到紲落來 5 個月 ê 時間，JWST 會沓沓仔 kā 伊 摺起來 ê 鏡面 kah 規組 ê 精密科學 儀器 拍開，看 in 是毋是會當正常運作。 若是無問題，JWST 就會 ùi 2022 年熱天開始，研究 宇宙中 ê 星系 kah 銀河系 內底 ê 系外行星，就是 踅其他恆星 leh 行 ê 行星。

[POJ] Tē-kiû thâu-téng ê JWST Thài-khong bōng-oán-kiàⁿ

Lán chit-má ū chi̍t-tâi sin ê thài-khong bōng-uán-kiànn ah! Chit-tâi kiò-chò JWST thài-khong bōng-uán-kiànn, i m̄-nā pí Ha-peh thài-khong bōng-oán-kiàⁿ ê kiàⁿ-bīn tōa gō͘ pōe í-siōng, jī-cha̍p koh ē-tàng pí Ha-peh thài-khong bōng-oán-kiàⁿ the̍h-tio̍h koh-khah hó ê âng-gōa-sòaⁿ iáⁿ-siōng. Chit-tiuⁿ siòng-phìⁿ sī cha-hng tī Tē-kiû téng-koân ê JWST thài-khong bōng-oán-kiàⁿ. I chiah tú ùi Ariane V hóe-chìⁿ ê téng-chiat hóe-chìⁿ tàn--chhut-lâi. Chit-tâi hóe-chìⁿ sī ùi Lâm-bí-chiu ê Hoat-sio̍k Guiana hoat-siā ê. Āu-kò-goe̍h JWST ē kiâⁿ-kàu Thài-iông-Tē-kiû hē-thóng ê L-two tiám hū-kīn, he sī chi̍t-ê ē kah Tē-kiû kâng-pō͘ se̍h Thài-iông ê tiám. Ùi chit-má khai-sí kàu sòa-lo̍h-lâi gō͘ kò-goe̍h ê sî-kan, JWST ē tau̍h-tau̍h-á kā i chih--khí-lâi ê kiàⁿ-bīn kah kui-cho͘ cheng-bi̍t ê kho-ha̍k gî-khì phah-khui, khòaⁿ in sī-m̄-sī ē-tàng chèng-siông ūn-chok. Nā-sī bô būn-tê, JWST to̍h ē ùi jī-khòng-jī-jī nî joa̍h-thiⁿ khai-sí, gián-kiù ú-tiū tiong ê seng-hē kah Gîn-hô-hē lāi-té ê hē-gōa-kiâⁿ-chhiⁿ, to̍h sī se̍h kî-tha hêng-chhiⁿ leh kiâⁿ ê kiâⁿ-chhiⁿ.

[KIP] Tē-kiû thâu-tíng ê JWST Thài-khong bōng-uán-kiànn

Lán tsit-má ū tsi̍t-tâi sin ê thài-khong bōng-uán-kiànn ah! Tsit-tâi kiò-tsò JWST thài-khong bōng-uán-kiànn, i m̄-nā pí Ha-peh thài-khong bōng-uán-kiànn ê kiànn-bīn tuā gōo puē í-siōng, jī-tsa̍p koh ē-tàng pí Ha-peh thài-khong bōng-uán-kiànn the̍h-tio̍h koh-khah hó ê âng-guā-suànn iánn-siōng. Tsit-tiunn siòng-phìnn sī tsa-hng tī Tē-kiû tíng-kuân ê JWST thài-khong bōng-uán-kiànn. I tsiah tú uì Ariane V hué-tsìnn ê tíng-tsiat hué-tsìnn tàn--tshut-lâi. Tsit-tâi hué-tsìnn sī uì Lâm-bí-tsiu ê Huat-sio̍k Guiana huat-siā ê. Āu-kò-gue̍h JWST ē kiânn-kàu Thài-iông-Tē-kiû hē-thóng ê L-two tiám hū-kīn, he sī tsi̍t-ê ē kah Tē-kiû kâng-pōo se̍h Thài-iông ê tiám. Uì tsit-má khai-sí kàu suà-lo̍h-lâi gōo kò-gue̍h ê sî-kan, JWST ē ta̍uh-ta̍uh-á kā i tsih--khí-lâi ê kiànn-bīn kah kui-tsoo tsing-bi̍t ê kho-ha̍k gî-khì phah-khui, khuànn in sī-m̄-sī ē-tàng tsìng-siông ūn-tsok. Nā-sī bô būn-tê, JWST to̍h ē uì jī-khòng-jī-jī nî jua̍h-thinn khai-sí, gián-kiù ú-tiū tiong ê sing-hē kah Gîn-hô-hē lāi-té ê hē-guā-kiânn-tshinn, to̍h sī se̍h kî-tha hîng-tshinn leh kiânn ê kiânn-tshinn.

[English] James Webb Space Telescope over Earth

There's a big new telescope in space. This one, the James Webb Space Telescope (JWST), not only has a mirror over five times larger than Hubble's in area, but can see better in infrared light. The featured picture shows JWST high above the Earth just after being released by the upper stage of an Ariane V rocket, launched yesterday from French Guiana. Over the next month, JWST will move out near the Sun-Earth L2 point where it will co-orbit the Sun with the Earth. During this time and for the next five months, JWST will unravel its segmented mirror and an array of sophisticated scientific instruments -- and test them. If all goes well, JWST will start examining galaxies across the universe and planets orbiting stars across our Milky Way Galaxy in the summer of 2022.

詞彙學習