聖誕彗星 ê 尾溜

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：The Tail of a Christmas Comet
• 影像來源 kah 版權：Rolando Ligustri (CARA Project, CAST) and Lukas Demetz
• 台文翻譯：An-Li Tsai (NCU)

[漢羅] 聖誕彗星 ê 尾溜

這粒彗星是 12 月 21 tī Namibia 共和國 烏-mì-mà ê 夜空翕著 ê。 伊 ê 尾溜 迒過望遠鏡視野 ê 三度闊。 這粒彗星叫做 Leonard 彗星 (C/2021 A1)，是今年上光 ê 彗星。 幾若工前伊 ê 光度衝足懸 ê，用目睭直接看 to̍h 看會著。 你若是用雙筒望遠鏡來 kā 看，會當看著較大丸，按呢會較好揣。 日頭落山了後，你會當 tī 西爿地平線遐揣著。 這張清楚 ê 影像展示足濟細節 ê。 有青色 ê 彗鬚，閣有 kah 太陽風 ê 磁場產生 交互作用 ê 離子彗尾。 Leonard 彗星 tī 12 月 12 ê 時陣倚地球上近， tī 12 月 18 ê 時陣倚金星上近。 紲落來，Leonard 彗星會行 tùi 近日點去，伊會 tī 明年 1 月 3 號倚太陽上近。 因為 Leonard 彗星 tī 12 月下旬 日頭落山了後 ê 暗暝 出現，所以伊這馬煞變做 2021 年 ê 聖誕彗星矣！

[POJ] Sèng-tàn-hui-chhiⁿ ê bóe-liu

Chit-lia̍p hui-chhiⁿ sī cha̍p-jī goe̍h jī-it tī Namibia kiōng-hô-kok o͘-mì-mà ê iā-khong hip-tio̍h ê. I ê bóe-liu hāⁿ kòe bōng-oán-kiàⁿ sī-iá ê saⁿ tō͘ khoah. Chit-lia̍p hui-chhiⁿ kiò-chòe Leonard hui-chhiⁿ (C/jī-khòng-jī-it A-one), sī kin-nî siōng-kng ê hui-chhiⁿ. Kúi-ā-kang-chêng i ê kng-tō͘ chhèng chiok-koân ê, iōng ba̍k-chiu ti̍t-chiap khòaⁿ to̍h khòaⁿ-ē-tio̍h. Lí nā-sī iōng siang-tâng-bōng-oán-kiàⁿ lâi kā khòaⁿ, ē-tàng khòaⁿ-tio̍h khah tōa-oân, án-ni ē khah-hó chhōe. Ji̍t-thâu lo̍h-soaⁿ liáu-āu, lí ē-tàng tī sai-pêng tē-pêng-sòaⁿ hiah chhōe-toih. Chit-tiuⁿ chheng-chhó͘ ê iáⁿ-siōng tiān-sī chiok-chōe sè-chiat ê。 Ū chhiⁿ-sek ê hūi-chhiu, koh-ū kah Thài-iông-hong ê chû-tiûⁿ sán-seng kau-hō͘-chok-iōng ê lî-chú hūi-bóe. Leonard hui-chhiⁿ tī cha̍p-jī goe̍h cha̍p-jī ê sî-chūn óa Tē-kiû siōng-kīn, tī cha̍p-jī goe̍h cha̍p-poeh ê sî-chūn óa Kim-chhiⁿ siōng-kīn. Sòa-lo̍h-lâi, Leonard hui-chhiⁿ ē kiâⁿ tùi kīn-ji̍t-tiám khì, i ē tī môa-nî i̍t goe̍h saⁿ hō óa Thài-iông siōng-kīn. In-ūi Leonard hui-chhiⁿ tī cha̍p-jī goe̍h hā-sûn ji̍t-thâu lo̍h-soaⁿ liáu-āu ê àm-mî chhut-hiān, só͘-í i chit-má soah piàn-chò jī-khòng-jī-it nî ê Sèng-tàn-hui-chhiⁿ ah!

[KIP] Sìng-tàn-hui-tshinn ê bué-liu

Tsit-lia̍p hui-tshinn sī tsa̍p-jī gue̍h jī-it tī Namibia kiōng-hô-kok oo-mì-mà ê iā-khong hip-tio̍h ê. I ê bué-liu hānn kuè bōng-uán-kiànn sī-iá ê sann tōo khuah. Tsit-lia̍p hui-tshinn kiò-tsuè Leonard hui-tshinn (C/jī-khòng-jī-it A-one), sī kin-nî siōng-kng ê hui-tshinn. Kuí-ā-kang-tsîng i ê kng-tōo tshìng tsiok-kuân ê, iōng ba̍k-tsiu ti̍t-tsiap khuànn to̍h khuànn-ē-tio̍h. Lí nā-sī iōng siang-tâng-bōng-uán-kiànn lâi kā khuànn, ē-tàng khuànn-tio̍h khah tuā-uân, án-ni ē khah-hó tshuē. Ji̍t-thâu lo̍h-suann liáu-āu, lí ē-tàng tī sai-pîng tē-pîng-suànn hiah tshuē-toih. Tsit-tiunn tshing-tshóo ê iánn-siōng tiān-sī tsiok-tsuē sè-tsiat ê。 Ū tshinn-sik ê huī-tshiu, koh-ū kah Thài-iông-hong ê tsû-tiûnn sán-sing kau-hōo-tsok-iōng ê lî-tsú huī-bué. Leonard hui-tshinn tī tsa̍p-jī gue̍h tsa̍p-jī ê sî-tsūn uá Tē-kiû siōng-kīn, tī tsa̍p-jī gue̍h tsa̍p-pueh ê sî-tsūn uá Kim-tshinn siōng-kīn. Suà-lo̍h-lâi, Leonard hui-tshinn ē kiânn tuì kīn-ji̍t-tiám khì, i ē tī muâ-nî i̍t gue̍h sann hō uá Thài-iông siōng-kīn. In-uī Leonard hui-tshinn tī tsa̍p-jī gue̍h hā-sûn ji̍t-thâu lo̍h-suann liáu-āu ê àm-mî tshut-hiān, sóo-í i tsit-má suah piàn-tsò jī-khòng-jī-it nî ê Sìng-tàn-hui-tshinn ah!

[English] The Tail of a Christmas Comet

The tail of a comet streams across this three degree wide telescopic field of view captured under dark Namibian skies on December 21. In outburst only a few days ago and just reaching naked eye visibility Comet Leonard (C/2021 A1) is this year’s brightest comet. Binoculars will make the diffuse comet easier to spot though, close to the western horizon after sunset. Details revealed in the sharp image show the comet’s coma with a greenish tinge, and follow the interaction of the comet’s ion tail with magnetic fields in the solar wind. After passing closest to Earth on December 12 and Venus on December 18, Comet Leonard is heading toward perihelion, its closest approach to the Sun on January 3rd. [Appearing in][Appearing in] late December’s beautiful evening skies after sunset, Comet Leonard has also become known as 2021’s Christmas Comet.

詞彙學習（漢羅/POJ/KIP/華語/English）

• 【聖誕彗星】Sèng-tàn-hui-chhiⁿ/Sìng-tàn-hui-tshinn/聖誕彗星/Christmas Comet
• 【彗鬚】hūi-chhiu/huī-tshiu/彗髮/comet’s coma
• 【彗尾】hūi-bóe/huī-bué/彗尾/comet’s tail
• 【近日點】kīn-ji̍t-tiám/kīn-ji̍t-tiám/近日點/perihelion
• 【衝】chhèng/tshìng/衝/outburst
• 【地平線】tē-pêng-sòaⁿ/tē-pîng-suànn/地平線/horizon
• 【太陽風】Thài-iông-hong/Thài-iông-hong/太陽風/solar wind
• 【磁場】chû-tiûⁿ/tsû-tiûnn/磁場/magnetic field
• 【交互作用】kāu-hō͘-chok-iōng/kāu-hōo-tsok-iōng/交互作用/interaction
• 【下旬】hā-sûn/hā-sûn/下旬/late third of the month