天頂 ê Leonard 彗星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Comet Leonard from Space
• 影像來源 kah 版權：Zhuoxiao Wang, Yangwang-1 Space Telescope, Origin.Space
• 台文翻譯：An-Li Tsai (NCU)

[漢羅] 天頂 ê Leonard 彗星

Leonard 彗星 tī 天頂看起來是按怎？ 今仔日 ê 相片是 中國 ê 起源太空公司 ê 仰望一號 太空望遠鏡 翕 ê。 伊毋若翕著 足光 ê 彗星，嘛翕幾若个 太空現象。 這是用光學 kah 紫外線 波段翕 ê 彗星 C/2021 A1 (Leonard 彗星)。 你會當 tī 相片中央看著 5 工前開始 to̍h 出現 ê 長長 ê 尾溜。 地球 to̍h tī 正爿下底遐，伊 ê 大氣層 發出 ê 光是 ùi 倒爿下底到正爿頂懸。 遠方有足濟天星，毋閣 tī 倒爿頂懸遐看會著有 兩條衛星軌跡。 正爿下跤到倒爿頂懸 較暗 ê 光帶是 極光。 這張相片閣有翕著 流星 ê 軌跡，to̍h tī 大氣層 氣輝 遐。 你若是想欲 tī 煞落來幾若工 tī 地球 看著 Leonard 彗星，你 to̍h 愛 tī 日頭落山了後、抑是日頭出來進前，向西爿 ê 地平線看才看會著。

[POJ] Thiⁿ-téng ê Leonard hūi-chhiⁿ

Leonard hūi-chhiⁿ tī thiⁿ-téng khòaⁿ--khí-lâi sī án-ná? Kin-á-ji̍t ê siòng-phìⁿ sī Tiong-kok ê Khí-goân thài-khong-kong-si ê Gióng-bōng-it-hō thài-khong-bōng-oán-kiàⁿ hip ê. I m̄-nā hip-tio̍h chiok-kng ê hūi-chhiⁿ, mā hip-tio̍h kúi-ā-ê thài-khong hiān-siōng. Che sī iōng kng-ha̍k kah chí-gōa-sòaⁿ pho-tōaⁿ hip ê hūi-chhiⁿ C/jī-khòng-jī-it A-one (Leonard hūi-chhiⁿ). Lí ē-tàng tī siòng-phìⁿ tiong-ng khòaⁿ-tio̍h gō͘ kang chêng khai-sí to̍h chhut-hiān ê tn̂g-tn̂g ê bóe-liu. Tē-kiû to̍h tī chiàⁿ-pêng ē-té hiah, i ê tōa-khì-chân hoat--chhut ê kng sī ùi tò-pêng ē-té kàu chiàⁿ-pêng téng-koân. Oán-hong ū chiok-chōe thiⁿ-chhiⁿ, m̄-koh tī tò-pêng téng-koân hiah khòaⁿ-ē-tio̍h ū nn̄g-tiâu ūi-chhiⁿ kúi-jiah. Chiàⁿ-pêng ē-kha kàu tò-pêng téng-koân khah-àm ê kng-tòa sī ke̍k-kng. Chit-tiuⁿ siòng-phìⁿ koh ū hip-tio̍h liû-chhiⁿ ê kúi-jiah, to̍h tī tōa-khì-chân khì-hui hiah. Lí nā-sī siūⁿ-beh tī soa̍h-lo̍h-lâi kúi-ā-kang tī Tē-kiû khòaⁿ-tio̍h Leonard hūi-chhiⁿ, lí to̍h ài tī ji̍t-thâu lo̍h-soaⁿ liáu-āu, iah-sī ji̍t-thâu chhut-lâi chìn-chêng, hiòng sai-pêng ê tē-pêng-sòaⁿ khòaⁿ chiah khòaⁿ-ē-tio̍h.

[KIP] Thinn-tíng ê Leonard huī-tshinn

Leonard huī-tshinn tī thinn-tíng khuànn--khí-lâi sī án-ná? Kin-á-ji̍t ê siòng-phìnn sī Tiong-kok ê Khí-guân thài-khong-kong-si ê Gióng-bōng-it-hō thài-khong-bōng-uán-kiànn hip ê. I m̄-nā hip-tio̍h tsiok-kng ê huī-tshinn, mā hip-tio̍h kuí-ā-ê thài-khong hiān-siōng. Tse sī iōng kng-ha̍k kah tsí-guā-suànn pho-tuānn hip ê huī-tshinn C/jī-khòng-jī-it A-one (Leonard huī-tshinn). Lí ē-tàng tī siòng-phìnn tiong-ng khuànn-tio̍h gōo kang tsîng khai-sí to̍h tshut-hiān ê tn̂g-tn̂g ê bué-liu. Tē-kiû to̍h tī tsiànn-pîng ē-té hiah, i ê tuā-khì-tsân huat--tshut ê kng sī uì tò-pîng ē-té kàu tsiànn-pîng tíng-kuân. Uán-hong ū tsiok-tsuē thinn-tshinn, m̄-koh tī tò-pîng tíng-kuân hiah khuànn-ē-tio̍h ū nn̄g-tiâu uī-tshinn kuí-jiah. Tsiànn-pîng ē-kha kàu tò-pîng tíng-kuân khah-àm ê kng-tuà sī ki̍k-kng. Tsit-tiunn siòng-phìnn koh ū hip-tio̍h liû-tshinn ê kuí-jiah, to̍h tī tuā-khì-tsân khì-hui hiah. Lí nā-sī siūnn-beh tī sua̍h-lo̍h-lâi kuí-ā-kang tī Tē-kiû khuànn-tio̍h Leonard huī-tshinn, lí to̍h ài tī ji̍t-thâu lo̍h-suann liáu-āu, iah-sī ji̍t-thâu tshut-lâi tsìn-tsîng, hiòng sai-pîng ê tē-pîng-suànn khuànn tsiah khuànn-ē-tio̍h.

[English] Comet Leonard from Space

What does Comet Leonard look like from space? Today's featured image from Origin.Space's Yangwang-1 space telescope shows not only the currently bright comet -- but several other space delights as well. Taken in optical and ultraviolet light, C/2021 A1 (Leonard) is visible with an extended tail near the image center as it appeared five days ago. The Earth is visible on the lower right, while layers of the Earth's atmosphere glow diagonally from the lower left to the upper right. The trails of two satellites can be seen in front of a myriad of distant stars that dot the background on the upper left. The faint bands of light running diagonally from the lower right to the upper left are auroras. Finally, the image also caught a meteor streaking just below the airglow. To see Comet Leonard yourself from the Earth's surface during the next few days, look toward the western horizon just after sunset or just before sunrise.

詞彙學習