HH 666 天體：龍骨座 ê 塗粉雲柱 kah 噴流

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：HH 666: Carina Dust Pillar with Jet
• 影像來源：NASA, ESA, Hubble; 資料處理 kah 版權：Mehmet Hakan Özsaraç
• 開放資源：Browse 2,600+ codes in the Astrophysics Source Code Library
• 台文翻譯：An-Li Tsai (NCU)

[漢羅] HH 666 天體：龍骨座 ê 塗粉柱 kah 噴流

Tùi 一寡人來講，這看起來可能有成一个 蜂岫。 毋閣實際上，這張相片 是 哈伯 太空望遠鏡翕 ê 宇宙塗粉柱。 伊有 2 光年 長，to̍h tī HH 666 天體 ê 內底。 這个天體是一个少年 ê 恆星，伊 當-leh 發射能量足強 ê 噴流。 這个結構是 tī 咱銀河系上大 ê 恆星形成區，龍骨座星雲 ê 內底。 伊 tī 南天爍咧爍咧，離咱有 7500 光年遠。 這个 塗粉柱 ê 外形是去予 龍骨座星雲內底較少年、較高溫、較大質量恆星 ê 恆星風 kah 輻射 kā 雕出來 ê。 是講 tī 這个恆星形成區內底，有一寡新 ê 恆星猶閣 leh 做。 用 紅外線 來 kā 看，to̍h 會當 迵過塗粉來看 較詳細 leh。 按呢 to̍h 會當看著 兩个較狹 ê、能量較強 ê 噴流，ùi 猶藏 tī 塗粉內底、拄生出來 ê 恆星嬰仔噴出來。

[POJ] HH lio̍k-lio̍k-lio̍k thian-thé: Lêng-kut-chō ê thô͘-hún-thiāu kah phùn-liû

Tùi chi̍t-kóa-lâng lâi-kóng, che khòaⁿ--khí-lâi khó-lêng ū sêng chi̍t-ê phang-siū. M̄-koh si̍t-chè-siōng, chit-tiuⁿ siòng-phìⁿ sī Ha-peh-thài-khong-bōng-oán-kiàⁿ hip ê ú-tiū thô͘-hún-thiāu. I ū nn̄g kng-nî tn̂g, to̍h tī HH lio̍k-lio̍k-lio̍k thian-thé ê lāi-té. Chit-ê thian-thé sī chi̍t-ê siàu-liân ê hêng-chhiⁿ, i tng-leh hoat-siā lêng-liōng chiok-kiông ê phùn-liû. Chit-ê kiat-kò͘ sī tī lán Gîn-hô-hē siōng-tōa ê hêng-chhiⁿ hêng-sêng-khu, Lêng-kut-chō seng-hûn ê lāi-té. I tī lâm-thian sih-leh-sih-leh, lî lán ū chhit-chheng-gō͘-pah kng-nî hn̄g. Chit-ê thô͘-hún-thiāu ê gōa-hêng sī khì hō͘ Lêng-kut-chō seng-hûn lāi-té khah siàu-liân, khah ko-un, khah tōa-chit-liōng hêng-chhiⁿ ê hêng-chhiⁿ-hong kah hok-siā kā tiau--chhut-lâi ê. Sī-kóng tī chit-ê hêng-chhiⁿ hêng-sêng-khu lāi-té, ū chi̍t-kóa sin ê hêng-chhiⁿ iáu-koh leh chò. Iōng âng-gōa-sòaⁿ lâi kā khòaⁿ, to̍h ē-tàng thàng-kòe thô͘-hún lâi khòaⁿ khah siông-sè leh. Án-ni to̍h ē-tàng khòaⁿ-tio̍h nn̄g-ê khah-e̍h ê, lêng-liōng khah-kiông ê phùn-liû, ùi iáu chhàng tī thô͘-hún lāi-té, tú siⁿ--chhut-lâi ê hêng-chhiⁿ îⁿ-á phùn--chhut-lâi.

[KIP] HH lio̍k-lio̍k-lio̍k thian-thé: Lîng-kut-tsō ê thôo-hún-thiāu kah phùn-liû

Tuì tsi̍t-kuá-lâng lâi-kóng, tse khuànn--khí-lâi khó-lîng ū sîng tsi̍t-ê phang-siū. M̄-koh si̍t-tsè-siōng, tsit-tiunn siòng-phìnn sī Ha-peh-thài-khong-bōng-uán-kiànn hip ê ú-tiū thôo-hún-thiāu. I ū nn̄g kng-nî tn̂g, to̍h tī HH lio̍k-lio̍k-lio̍k thian-thé ê lāi-té. Tsit-ê thian-thé sī tsi̍t-ê siàu-liân ê hîng-tshinn, i tng-leh huat-siā lîng-liōng tsiok-kiông ê phùn-liû. Tsit-ê kiat-kòo sī tī lán Gîn-hô-hē siōng-tuā ê hîng-tshinn hîng-sîng-khu, Lîng-kut-tsō sing-hûn ê lāi-té. I tī lâm-thian sih-leh-sih-leh, lî lán ū tshit-tshing-gōo-pah kng-nî hn̄g. Tsit-ê thôo-hún-thiāu ê guā-hîng sī khì hōo Lîng-kut-tsō sing-hûn lāi-té khah siàu-liân, khah ko-un, khah tuā-tsit-liōng hîng-tshinn ê hîng-tshinn-hong kah hok-siā kā tiau--tshut-lâi ê. Sī-kóng tī tsit-ê hîng-tshinn hîng-sîng-khu lāi-té, ū tsi̍t-kuá sin ê hîng-tshinn iáu-koh leh tsò. Iōng âng-guā-suànn lâi kā khuànn, to̍h ē-tàng thàng-kuè thôo-hún lâi khuànn khah siông-sè leh. Án-ni to̍h ē-tàng khuànn-tio̍h nn̄g-ê khah-e̍h ê, lîng-liōng khah-kiông ê phùn-liû, uì iáu tshàng tī thôo-hún lāi-té, tú sinn--tshut-lâi ê hîng-tshinn înn-á phùn--tshut-lâi.

[English] HH 666: Carina Dust Pillar with Jet

To some, it may look like a beehive. In reality, the featured image from the Hubble Space Telescope captures a cosmic pillar of dust, two-light years long, inside of which is Herbig-Haro 666 -- a young star emitting powerful jets. The structure lies within one of our galaxy's largest star forming regions, the Carina Nebula, shining in southern skies at a distance of about 7,500 light-years. The pillar's layered outline are shaped by the winds and radiation of Carina's young, hot, massive stars, some of which are still forming inside the nebula. A dust-penetrating view in infrared light better shows the two, narrow, energetic jets blasting outward from a still hidden infant star.

詞彙學習