彗星 Leonard kah 海翁星系

Page(/daily/2021/12/20211203.md)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 彗星 Leonard kah 海翁星系

這張組合相片是 11 月 24 天光進前翕 ê,這陣 ê 彗星 Leonard (C/2021 A1) 掃過 北天兩个星系之間。 青色 ê 彗鬚是彗星 ê 塗粉尾溜,拄仔好射 tī 頂懸彼个 NGC 4631,海翁星系 ê 心臟區。 毋閣 NGC 4631 kah 下底 ê NGC 4656,棍仔球桮星系,是背景星系, tī 2500 萬光年遠 ê 所在。 這工,彗星離咱 ê 地球有 6 光分 ê 距離。 彗星 Leonard 離地球上近 ê 時陣猶未到(而且會離 金星 閣較近),伊會 tī 12 月 ê 時陣變閣較光。 這粒彗星這馬用雙筒望遠鏡 kah 細台望遠鏡 已經看會著矣。 這是伊上尾一擺拜訪內太陽系。 伊 ê 近日點,就是伊上倚太陽彼工,會 tī 1 月 3 號。

[POJ] Hūi-chhiⁿ Leonard kah Hái-ang-seng-hē

Chit-tiuⁿ cho͘-ha̍p siòng-phìⁿ sī cha̍p-it-goe̍h jī-sì thiⁿ-kng chìn-chêng hip ê, chi̍t-chūn ê hūi-chhiⁿ Leonard (C-jī-khòng-jī-it A-one) sàu-kòe pak-thian nn̄g-ê seng-hē chi-kan. Chhiⁿ-sek ê hūi-chhiu sī hūi-chhiⁿ ê thô͘-hún-bóe-liu, tú-á-hó siā tī téng-koân hit-ê NGC sù-lio̍k-sam-it, Hái-ang-seng-hē ê sim-chōng-khu. M̄-koh NGC sù-lio̍k-sam-it kah ē-té ê NGC sù-lio̍k-ngó͘-lio̍k, Kùn-á-kiû-poe seng-hē, sī pōe-kéng-seng-hē, tī nn̄g-chheng-gō͘-pah-bān kng-nî hn̄g ê só͘-chāi. Chi̍t-kang, hūi-chhiⁿ lî lán ê Tē-kiû ū la̍k kng-hun ê kū-lî. Hūi-chhiⁿ Leonard lî Tē-kiû siōng-kīn ê sî-chūn iáu-bōe kàu (jī-cha̍p ē lî Kim-chhiⁿ koh-khah kīn), i ē tī cha̍p-jī goe̍h ê sî-chūn piàn koh-khah kng. Chit-lia̍p hūi-chhiⁿ chit-má iōng siang-tâng bōng-oán-kiàⁿ kah sè-tâi bōng-oán-kiàⁿ í-keng khòaⁿ-ē-tio̍h ah. Che sī i siōng-bóe chi̍t-pái pài-hóng lōe-thài-iông-hē. I ê kīn-tē-tiám, tō-sī i siōng-óa Thài-iông hit-kang, ē tī it goe̍h saⁿ hō.

[KIP] Huī-tshinn Leonard kah Hái-ang-sing-hē

Tsit-tiunn tsoo-ha̍p siòng-phìnn sī tsa̍p-it-gue̍h jī-sì thinn-kng tsìn-tsîng hip ê, tsi̍t-tsūn ê huī-tshinn Leonard (C-jī-khòng-jī-it A-one) sàu-kuè pak-thian nn̄g-ê sing-hē tsi-kan. Tshinn-sik ê huī-tshiu sī huī-tshinn ê thôo-hún-bué-liu, tú-á-hó siā tī tíng-kuân hit-ê NGC sù-lio̍k-sam-it, Hái-ang-sing-hē ê sim-tsōng-khu. M̄-koh NGC sù-lio̍k-sam-it kah ē-té ê NGC sù-lio̍k-ngóo-lio̍k, Kùn-á-kiû-pue sing-hē, sī puē-kíng-sing-hē, tī nn̄g-tshing-gōo-pah-bān kng-nî hn̄g ê sóo-tsāi. Tsi̍t-kang, huī-tshinn lî lán ê Tē-kiû ū la̍k kng-hun ê kū-lî. Huī-tshinn Leonard lî Tē-kiû siōng-kīn ê sî-tsūn iáu-buē kàu (jī-tsa̍p ē lî Kim-tshinn koh-khah kīn), i ē tī tsa̍p-jī gue̍h ê sî-tsūn piàn koh-khah kng. Tsit-lia̍p huī-tshinn tsit-má iōng siang-tâng bōng-uán-kiànn kah sè-tâi bōng-uán-kiànn í-king khuànn-ē-tio̍h ah. Tse sī i siōng-bué tsi̍t-pái pài-hóng luē-thài-iông-hē. I ê kīn-tē-tiám, tō-sī i siōng-uá Thài-iông hit-kang, ē tī it gue̍h sann hō.

[English] Comet Leonard and the Whale Galaxy

Sweeping through northern predawn skies, on November 24 Comet Leonard (C/2021 A1) was caught between two galaxies in this composite telescopic image. Sporting a greenish coma the comet’s dusty tail seems to harpoon the heart of NGC 4631 (top) also known as the Whale Galaxy. Of course NGC 4631 and NGC 4656 (bottom, aka the Hockey Stick) are background galaxies some 25 million light-years away. On that date the comet was about 6 light-minutes from our fair planet. Its closest approach to Earth (and even closer approach to Venus still to come, Comet Leonard will grow brighter in December. Already a good object for binoculars and small telescopes, this comet will likely not return to the inner Solar System. Its perihelion, or closest approach to the Sun, will be on January 3, 2022.

詞彙學習(台語漢字/POJ/KIP/華語漢字/English)

  • 【海翁星系】Hái-ang seng-hē/Hái-ang sing-hē/鯨魚星系/the Whale Galaxy
  • 【彗鬚】hūi-chhiu/huī-tshiu/彗髮/coma
  • 【塗粉尾溜】thô͘-hún-bóe-liu/thôo-hún-bué-liu/灰塵尾/dust tail
  • 【近日點】kīn-ji̍t-tiám/kīn-ji̍t-tiám/近日點/perihelion
  • 【內太陽系】lōe-thài-iông-hē/luē-thài-iông-hē/內太陽系/inner Solar System
  • 【光分】kng-hun/kng-hun/光分/light-minute
  • 【棍仔球桮星系】kùn-á-kiû-poe/kùn-á-kiû-pue/曲棍球星系/the Hockey Stick

  1. 阮嘛有 Podcast面冊InstagramTwitter,會逐工 kā 你提醒有新 ê 翻譯 kah 錄音。閣有 YouTube 頻道,有當時仔會出新 ê 影片,緊來追蹤! ↩︎

  2. 本站 ê 介紹 (台語/華語)FAQ (華語) ↩︎

  3. 看無台文?阮讀予你聽!已經錄過 ê 文章 ↩︎

昨昏 ê 圖:NGC 6822:Barnard 星系 明仔載 ê 圖:彩色 ê 月光