彗星 CG 面頂足懸 ê 斷崖

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：A High Cliff on Comet Churyumov-Gerasimenko
• 影像來源 kah 許可：ESA, Rosetta spacecraft, NAVCAM; Additional Processing: Stuart Atkinson
• 台文翻譯：An-Li Tsai (NCU)

[漢羅] 彗星 CG 面頂足懸 ê 斷崖

這个遮爾懸 ê 斷崖毋是 tī 行星，毋是 tī 月球，是 tī 彗星。 這是太空船 Rosetta tī 彗星 CG 較暗核心 ê 一个所在發現 ê。 Rosetta 是歐洲 ESA 發射 ê 機器人太空船，計畫 tī 2014 年 kah 踅太陽 ê 彗星相會。 這个 斷崖 to̍h 是 tī 2014 年翕 ê。 雖然講這有 1 公里遐爾懸，毋閣 彗星 CG ê 表面重力有較低，所以講若是 欲 peh--去-lih 是無蓋困難，甚至你 ùi 面頂 跳 loài 嘛無代誌。 Tī 斷崖下底是較平 ê 地表，塗跤有幾若粒 大岩石，差不多有 20 公尺大。 Ùi Rosetta 提著 ê 資料表示，彗星 CG 面頂 ê 水冰，kah 地球海洋 ê 水比--起來，有較無仝款 ê 氘 比例。 這表示講 in 兩个 ê 來源可能無仝。 Rosetta tī 2016 年 ê 時陣 結束伊 ê 任務。 伊上尾 ê 任務是去挵彗星 CG。 彗星 CG 無偌久進前才拄仔 kah 地球相倚，用細台望遠鏡 猶看會著。

[POJ] Hūi-chhiⁿ CG bīn-téng chiok-koân ê toān-gâi

Chit-ê chiah-nī koân ê toān-gâi m̄-sī tī kiâⁿ-chhiⁿ, m̄-sī tī Goe̍h-kiû, sī tī hūi-chhiⁿ. Che sī thài-khong-chûn Rosetta tī hūi-chhiⁿ CG khah-àm he̍k-sim ê chi̍t-ê só͘-chāi hoat-hiān ê. Rosetta sī Au-chiu ESA hoat-siā ê ke-khì-lâng thài-khong-chûn, kè-ōe tī jī-khòng-it-sù nî kah se̍h Thài-iông ê hūi-chhiⁿ siong-hōe. Chit-ê toān-gâi to̍h sī tī jī-khòng-it-sù nî hip ê. Sui-jiân-kóng che ū chi̍t-kong-lí hiah-nī koân, m̄-koh hūi-chhiⁿ CG ê piáu-bīn-tiōng-le̍k ū khah-kē, só͘-í kóng nā-sī beh peh--khì-lih sī bô kài khùn-lân, sīm-chì lí ùi bīn-téng thiāu loài mā bô-tāi-chì. Tī toān-gâi ē-té sī khah-pêⁿ ê tē-piáu, thô͘-kha ū kúi-ā-lia̍p tōa-giâm-chio̍h, chha-put-to ū jī-cha̍p kong-chhioh tōa. Ùi Rosetta the̍h-tio̍h ê chu-liāu piáu-sī, hūi-chhiⁿ CG bīn-téng ê chúi-peng, kah Tē-kiû hái-iûⁿ ê chúi pí--khí-lâi, ū khah bô-kâng-khoán ê to pí-lē. Che piáu-sī-kóng in nn̄g-ê ê lâi-goân khó-lêng bô-kâng. Rosetta tī jī-khòng-it-lio̍k nî ê sî-chūn kiat-sok i ê jīm-bū. I siōng-bóe ê jīm-bū sī khì lòng hūi-chhiⁿ CG. Hūi-chhiⁿ CG bô gōa-kú chìn-chêng chiah tú-á kah Tē-kiû sio-óa, iōng sè-tâi bōng-oán-kiàⁿ iáu khòaⁿ-ē-tio̍h.

[KIP] Huī-tshinn CG bīn-tíng tsiok-kuân ê tuān-gâi

Tsit-ê tsiah-nī kuân ê tuān-gâi m̄-sī tī kiânn-tshinn, m̄-sī tī Gue̍h-kiû, sī tī huī-tshinn. Tse sī thài-khong-tsûn Rosetta tī huī-tshinn CG khah-àm hi̍k-sim ê tsi̍t-ê sóo-tsāi huat-hiān ê. Rosetta sī Au-tsiu ESA huat-siā ê ke-khì-lâng thài-khong-tsûn, kè-uē tī jī-khòng-it-sù nî kah se̍h Thài-iông ê huī-tshinn siong-huē. Tsit-ê tuān-gâi to̍h sī tī jī-khòng-it-sù nî hip ê. Sui-jiân-kóng tse ū tsi̍t-kong-lí hiah-nī kuân, m̄-koh huī-tshinn CG ê piáu-bīn-tiōng-li̍k ū khah-kē, sóo-í kóng nā-sī beh peh--khì-lih sī bô kài khùn-lân, sīm-tsì lí uì bīn-tíng thiāu luài mā bô-tāi-tsì. Tī tuān-gâi ē-té sī khah-pênn ê tē-piáu, thôo-kha ū kuí-ā-lia̍p tuā-giâm-tsio̍h, tsha-put-to ū jī-tsa̍p kong-tshioh tuā. Uì Rosetta the̍h-tio̍h ê tsu-liāu piáu-sī, huī-tshinn CG bīn-tíng ê tsuí-ping, kah Tē-kiû hái-iûnn ê tsuí pí--khí-lâi, ū khah bô-kâng-khuán ê to pí-lē. Tse piáu-sī-kóng in nn̄g-ê ê lâi-guân khó-lîng bô-kâng. Rosetta tī jī-khòng-it-lio̍k nî ê sî-tsūn kiat-sok i ê jīm-bū. I siōng-bué ê jīm-bū sī khì lòng huī-tshinn CG. Huī-tshinn CG bô guā-kú tsìn-tsîng tsiah tú-á kah Tē-kiû sio-uá, iōng sè-tâi bōng-uán-kiànn iáu khuànn-ē-tio̍h.

[English] A High Cliff on Comet Churyumov-Gerasimenko

This high cliff occurs not on a planet, not on a moon, but on a comet. It was discovered to be part of the dark nucleus of Comet Churyumov-Gerasimenko (CG) by Rosetta, a robotic spacecraft launched by ESA that rendezvoused with the Sun-orbiting comet in 2014. The ragged cliff, as featured here, was imaged by Rosetta in 2014. Although towering about one kilometer high, the low surface gravity of [Comet CG][Comet CG1 ] would likely make it an accessible climb -- and even a jump from the cliff survivable. At the foot of the cliff is relatively smooth terrain dotted with boulders as large as 20 meters across. Data from Rosetta indicates that the ice in Comet CG has a significantly different deuterium fraction -- and hence likely a different origin -- than the water in Earth's oceans. Rosetta ended its mission with a controlled impact onto Comet CG in 2016. Comet CG has just competed another close approach to Earth and remains visible through a small telescope.

詞彙學習