昴宿星團:七姊妹仔星團

Page(/daily/2021/11/20211124.md)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 昴宿星團:七姊妹仔星團

你敢捌看過昴宿星團? 就算你有看過,你可能毋捌看過遮爾大閣遮爾清楚 ê。 昴宿星團 可能是天頂上有名 ê 星團,因為伊內底 ê 恆星足光 ê,光到你免用雙筒望遠鏡,直接用目睭 to̍h 看會著,就算你 tī 光害足嚴重 ê 城市 嘛看會著。 你若是 tī 較暗 ê 所在用較長 ê 時間感光,踅 tī 昴宿 星團 邊仔 ê 塗粉雲 to̍h 會變甲足清楚 ê。 這張 相片 是 tī 美國 Florida 州翕 ê。 這張 tī 天頂 ê 闊度是幾若粒 月娘 ê 大細。 昴宿星團 嘛叫做 七姊妹仔,抑是 M45,伊 to̍h tī 金牛座 ê 方向差不多 400 光年遠 ê 所在。 較 近代 ê 傳說 是講,其中一粒恆星 tī 星團號名了後煞變暗–去,所以干焦賰 6 粒 恆星用目睭看會著。 實際上 昴宿星團 內底,目睭看會著 ê 恆星無一定是 7 粒,可能較濟粒嘛可能較少粒。 主要愛看彼工 ê 天色是毋是 有較暗,嘛愛看觀測者 ê 目睭 有較清有較明 無。

[POJ] Báu-siù-seng-thoân: Chhit-chí-mōe-á seng-thoân

Lí kám-bat khòaⁿ-kòe Báu-siù-seng-thoân? Tō-sǹg lí ū khòaⁿ-kòe, lí khó-lêng m̄-bat khòaⁿ-kòe chiah-nī tōa koh chiah-nī chheng-chhó͘ ê. Báu-siù-seng-thoân khó-lêng sī thiⁿ-téng siōng ū-miâ ê seng-thoân, in-ūi i lāi-té ê hêng-chhiⁿ chiok-kng ê, kng-kàu lí bián iōng siang-tâng-bōng-oán-kiàⁿ, ti̍t-chiap iōng ba̍k-chiu to̍h khòaⁿ-ē-tio̍h, tō-sǹg lí tī kng-hāi chiok giâm-tiōng ê siâⁿ-chhī mā khòaⁿ-ē-tio̍h. Lí nā-sī tī khah-àm ê só͘-chāi iōng khah tn̂g ê sî-kan kám-kng, se̍h tī Báu-siù-seng-thoân piⁿ-á ê thô͘-hún-hûn to̍h ē piàn-kah chiok chheng-chhó͘ ê. Chit-tiuⁿ siòng-phìⁿ sī tī Bí-kok Florida chiu hip ê. Chit-tiuⁿ tī thiⁿ-téng ê khoah-tō͘ sī kúi-ā-lia̍p goe̍h-niû ê tōa-sè. Báu-siù-seng-thoân mā kiò-chò Chhit-chí-mōe-á, iah-sī M-sì-cha̍p-gō͘, i to̍h tī Kim-gû-chō ê hong-hiòng chha-put-to sì-pah kng-nî hn̄g ê só͘-chāi. Khah kīn-tāi ê thoân-soat sī-kóng, kî-tiong chi̍t-lia̍p hêng-chhiⁿ tī seng-thoân hō-miâ liáu-āu soah piàn àm–khì, só͘-í kan-na chhun la̍k-lia̍p hêng-chhiⁿ iōng ba̍k-chiu khòaⁿ-ē-tio̍h. Si̍t-chè-siōng Báu-siù-seng-thoân lāi-té, ba̍k-chiu khòaⁿ-ē-tio̍h ê hêng-chhiⁿ bô-it-tēng sī chhit-lia̍p, khó-lêng khah chōe-lia̍p mā khó-lêng khah chió-lia̍p. Chú-iàu ài khòaⁿ hit-kang ê thiⁿ-sek sī-m̄-sī ū khah-àm, mā ài khòaⁿ koan-chhek-chiá ê ba̍k-chiu ū khah-chheng ū khah-bêng bô

[KIP] Báu-siù-sing-thuân: Tshit-tsí-muē-á sing-thuân

Lí kám-bat khuànn-kuè Báu-siù-sing-thuân? Tō-sǹg lí ū khuànn-kuè, lí khó-lîng m̄-bat khuànn-kuè tsiah-nī tuā koh tsiah-nī tshing-tshóo ê. Báu-siù-sing-thuân khó-lîng sī thinn-tíng siōng ū-miâ ê sing-thuân, in-uī i lāi-té ê hîng-tshinn tsiok-kng ê, kng-kàu lí bián iōng siang-tâng-bōng-uán-kiànn, ti̍t-tsiap iōng ba̍k-tsiu to̍h khuànn-ē-tio̍h, tō-sǹg lí tī kng-hāi tsiok giâm-tiōng ê siânn-tshī mā khuànn-ē-tio̍h. Lí nā-sī tī khah-àm ê sóo-tsāi iōng khah tn̂g ê sî-kan kám-kng, se̍h tī Báu-siù-sing-thuân pinn-á ê thôo-hún-hûn to̍h ē piàn-kah tsiok tshing-tshóo ê. Tsit-tiunn siòng-phìnn sī tī Bí-kok Florida tsiu hip ê. Tsit-tiunn tī thinn-tíng ê khuah-tōo sī kuí-ā-lia̍p gue̍h-niû ê tuā-sè. Báu-siù-sing-thuân mā kiò-tsò Tshit-tsí-muē-á, iah-sī M-sì-tsa̍p-gōo, i to̍h tī Kim-gû-tsō ê hong-hiòng tsha-put-to sì-pah kng-nî hn̄g ê sóo-tsāi. Khah kīn-tāi ê thuân-suat sī-kóng, kî-tiong tsi̍t-lia̍p hîng-tshinn tī sing-thuân hō-miâ liáu-āu suah piàn àm–khì, sóo-í kan-na tshun la̍k-lia̍p hîng-tshinn iōng ba̍k-tsiu khuànn-ē-tio̍h. Si̍t-tsè-siōng Báu-siù-sing-thuân lāi-té, ba̍k-tsiu khuànn-ē-tio̍h ê hîng-tshinn bô-it-tīng sī tshit-lia̍p, khó-lîng khah tsuē-lia̍p mā khó-lîng khah tsió-lia̍p. Tsú-iàu ài khuànn hit-kang ê thinn-sik sī-m̄-sī ū khah-àm, mā ài khuànn kuan-tshik-tsiá ê ba̍k-tsiu ū khah-tshing ū khah-bîng bô

[English] Pleiades: The Seven Sisters Star Cluster

Have you ever seen the Pleiades star cluster? Even if you have, you probably have never seen it as large and clear as this. Perhaps the most famous star cluster on the sky, the bright stars of the Pleiades can be seen without binoculars from even the depths of a light-polluted city. With a long exposure from a dark location, though, the dust cloud surrounding the Pleiades star cluster becomes very evident. The featured exposure, taken from Florida, USA, covers a sky area several times the size of the full moon. Also known as the Seven Sisters and M45, the Pleiades lies about 400 light years away toward the constellation of the Bull Taurus. A common legend with a modern twist is that one of the brighter stars faded since the cluster was named, leaving only six of the sister stars visible to the unaided eye. The actual number of Pleiades stars visible, however, may be more or less than seven, depending on the darkness of the surrounding sky and the clarity of the observer’s eyesight.

詞彙學習(台語漢字/POJ/KIP/華語漢字/English)

  • 【昴宿星團】Báu-siù-seng-thoân/Báu-siù-sing-thuân/昴宿星團/Pleiades
  • 【七姊妹仔星團】Chhit-chí-mōe-á seng-thoân/Tshit-tsí-muē-á sing-thuân/七姊妹仔星團/The Seven Sisters Star Cluster
  • 【金牛座】Kim-gû-chō/Kim-gû-tsō/金牛座/Taurus

  1. 阮嘛有:Podcast面冊InstagramTwitter,會逐工 kā 你提醒有新 ê 翻譯 kah 錄音,緊來追蹤! ↩︎

  2. 本站 ê 介紹 (台語/華語)FAQ (華語) ↩︎

  3. 看無台文?阮讀予你聽!已經錄過 ê 文章 ↩︎

昨昏 ê 圖:NuSTAR X-光太空望遠鏡翕 ê X-光波段 ê 太陽 明仔載 ê 圖:地球烏影 ê 交界