來介紹 Leonard 彗星

Page(/daily/2021/11/20211121.md)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 來介紹 Leonard 彗星

這粒是 Leonard 彗星。 Leonard 彗星 ê 編號是 C/2021 A1,是 tī 2021 年 1 月 離開 火星 ê 時陣,去予人發現 ê。 伊足暗 ê,毋閣伊 ê 軌道 會當 kā 這粒 足大粒 ê 冰雪球 chhōa 來 內太陽系。 伊會 tī 12 月 ê 時陣 ùi 地球 kah 金星 邊仔行過,了後才 tī 2022 年 1 月 ê 時陣傱 tùi 太陽去。 彗星 足歹預測 ê,這件代誌是通人知。 毋閣有人預測講,Leonard 彗星 ê 光度 tī 12 月 ê 時陣,會光到咱 直接用目睭 to̍h 看會著。 一禮拜前去予人翕著 ê Leonard 彗星,已經有 青色 ê 彗鬚 kah 足長 ê 塗粉尾溜 矣。 這張相片是 kā 62 張 ùi 中尺度望遠鏡翕著 ê 影像疊做一張 ê。 這內底有一組是追蹤彗星,另外一組是追蹤背景星。 背景是 tī [美國][USAA] 加州 六月湖 附近 ê 東 Sierra 山脈 ê 夜空翕 ê。 這粒 tī 北天 ê 彗星 tī 12 月中離開地球了後,會行 tùi 南天去。

[POJ] Lâi kài-siāu Leonard hui-chhiⁿ

Chit-lia̍p sī Leonard hui-chhiⁿ. Leonard hui-chhiⁿ ê pian-hō sī C-jī-khòng-jī-it A-one,sī tī jī-khòng-jī-it nî it goe̍h lī-khui Hóe-chhiⁿ ê sî-chūn, khì hō͘ lâng hoat-hiān ê. I chiok-àm ê, m̄-koh i ê kúi-tō ē-tàng kā chit-lia̍p chiok tōa-lia̍p ê peng-soat-kiû chhōa lâi Lōe-thài-iông-hē. I ē tī cha̍p-jī-goe̍h ê sî-chūn ùi Tē-kiû kah Kim-chhiⁿ piⁿ-á kiâⁿ-kòe, liáu-āu chiah tī jī-khòng-jī-jī nî it goe̍h ê sî-chūn chông tùi Thài-iông khì. Hui-chhiⁿ chiok phái ū-chhek ê, chit-kiāⁿ tāi-chì sī thong-lâng-chai. M̄-koh ū-lâng ū-chhek kóng, Leonard hui-chhiⁿ ê kng-tō͘ tī cha̍p-jī goe̍h ê sî-chūn, ē kng kàu lán ti̍t-chiap iōng ba̍k-chiu to̍h khòaⁿ-ē-tio̍h. Chi̍t-lé-pài chêng khì hō͘ lâng hip-tio̍h ê Leonard hui-chhiⁿ, í-keng ū chhiⁿ-sek ê hūi-chhiu kah chiok-tn̂g ê thô͘-hún bóe-liu ah. Chit-tiuⁿ siòng-phìⁿ sī kā la̍k-cha̍p-jī tiuⁿ ùi tiong-chhioh-tō͘ bōng-oán-kiàⁿ hip-tio̍h ê iáⁿ-siōng tha̍h chò chi̍t-tiuⁿ ê. Che lāi-té ū chi̍t-cho͘ sī tui-chong hui-chhiⁿ, lēng-gōa chi̍t-cho͘ sī tui-chong pōe-kéng-chhiⁿ. Pōe-kéng sī tī Bí-kok Ka-chiu La̍k-goe̍h-ô͘ hū-kīn ê tang Sierra soaⁿ-me̍h ê iā-khong hip ê. Chit-lia̍p tī pak-thian ê hui-chhiⁿ tī cha̍p-jī goe̍h-tiong lī-khui Tē-kiû liáu-āu, ē kiâⁿ tùi lâm-thian khì.

[KIP] Lâi kài-siāu Leonard hui-tshinn

Tsit-lia̍p sī Leonard hui-tshinn. Leonard hui-tshinn ê pian-hō sī C-jī-khòng-jī-it A-one,sī tī jī-khòng-jī-it nî it gue̍h lī-khui Hué-tshinn ê sî-tsūn, khì hōo lâng huat-hiān ê. I tsiok-àm ê, m̄-koh i ê kuí-tō ē-tàng kā tsit-lia̍p tsiok tuā-lia̍p ê ping-suat-kiû tshuā lâi Luē-thài-iông-hē. I ē tī tsa̍p-jī-gue̍h ê sî-tsūn uì Tē-kiû kah Kim-tshinn pinn-á kiânn-kuè, liáu-āu tsiah tī jī-khòng-jī-jī nî it gue̍h ê sî-tsūn tsông tuì Thài-iông khì. Hui-tshinn tsiok phái ū-tshik ê, tsit-kiānn tāi-tsì sī thong-lâng-tsai. M̄-koh ū-lâng ū-tshik kóng, Leonard hui-tshinn ê kng-tōo tī tsa̍p-jī gue̍h ê sî-tsūn, ē kng kàu lán ti̍t-tsiap iōng ba̍k-tsiu to̍h khuànn-ē-tio̍h. Tsi̍t-lé-pài tsîng khì hōo lâng hip-tio̍h ê Leonard hui-tshinn, í-king ū tshinn-sik ê huī-tshiu kah tsiok-tn̂g ê thôo-hún bué-liu ah. Tsit-tiunn siòng-phìnn sī kā la̍k-tsa̍p-jī tiunn uì tiong-tshioh-tōo bōng-uán-kiànn hip-tio̍h ê iánn-siōng tha̍h tsò tsi̍t-tiunn ê. Tse lāi-té ū tsi̍t-tsoo sī tui-tsong hui-tshinn, līng-guā tsi̍t-tsoo sī tui-tsong puē-kíng-tshinn. Puē-kíng sī tī Bí-kok Ka-tsiu La̍k-gue̍h-ôo hū-kīn ê tang Sierra suann-me̍h ê iā-khong hip ê. Tsit-lia̍p tī pak-thian ê hui-tshinn tī tsa̍p-jī gue̍h-tiong lī-khui Tē-kiû liáu-āu, ē kiânn tuì lâm-thian khì.

[English] Introducing Comet Leonard

Here comes Comet Leonard. Comet C/2021 A1 (Leonard) was discovered as a faint smudge in January 2021 when it was out past Mars – but its orbit will take the giant shedding ice-ball into the inner Solar System, passing near both Earth and Venus in December before it swoops around the Sun in early January 2022. Although comets are notoriously hard to predict, some estimations have Comet Leonard brightening to become visible to the unaided eye in December. Comet Leonard was captured just over a week ago already sporting a green-tinged coma and an extended dust tail. The featured picture was composed from 62 images taken through a moderate-sized telescope – one set of exposures tracking the comet, while another set tracking the background stars. The exposures were taken from the dark skies above the Eastern Sierra Mountains, near June Lake in California, USA. Soon after pasing near the Earth in mid-December, the comet will shift from northern to southern skies.

詞彙學習(台語漢字/POJ/KIP/華語漢字/English)

  • 【內太陽系】Lōe-thài-iông-hē/Luē-thài-iông-hē/內太陽系/inner solar system
  • 【彗鬚】hūi-chhiu/huī-tshiu/彗髮/coma
  • 【塗粉尾溜】thô͘-hún bóe-liu/thôo-hún bué-liu/灰塵尾/dust tail

  1. 阮嘛有:Podcast面冊InstagramTwitter,會逐工 kā 你提醒有新 ê 翻譯 kah 錄音,緊來追蹤! ↩︎

  2. 本站 ê 介紹 (台語/華語)FAQ (華語) ↩︎

  3. 看無台文?阮讀予你聽!已經錄過 ê 文章 ↩︎

昨昏 ê 圖:99 葩 ê 月全食 明仔載 ê 圖:摩天大樓面頂 ê 月食