來介紹 Leonard 彗星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Introducing Comet Leonard
• 影像來源 kah 版權：Dan Bartlett
• 拜一 ê 線頂活動：NASA 上讚 ê 太空相片 kah 影片
• 台文翻譯：An-Li Tsai (NCU)

[漢羅] 來介紹 Leonard 彗星

這粒是 Leonard 彗星。 Leonard 彗星 ê 編號是 C/2021 A1，是 tī 2021 年 1 月 離開 火星 ê 時陣，去予人發現 ê。 伊足暗 ê，毋閣伊 ê 軌道 會當 kā 這粒 足大粒 ê 冰雪球 chhōa 來 內太陽系。 伊會 tī 12 月 ê 時陣 ùi 地球 kah 金星 邊仔行過，了後才 tī 2022 年 1 月 ê 時陣傱 tùi 太陽去。 彗星 足歹預測 ê，這件代誌是通人知。 毋閣有人預測講，Leonard 彗星 ê 光度 tī 12 月 ê 時陣，會光到咱 直接用目睭 to̍h 看會著。 一禮拜前去予人翕著 ê Leonard 彗星，已經有 青色 ê 彗鬚 kah 足長 ê 塗粉尾溜 矣。 這張相片是 kā 62 張 ùi 中尺度望遠鏡翕著 ê 影像疊做一張 ê。 這內底有一組是追蹤彗星，另外一組是追蹤背景星。 背景是 tī 美國 加州 六月湖 附近 ê 東 Sierra 山脈 ê 夜空翕 ê。 這粒 tī 北天 ê 彗星 tī 12 月中離開地球了後，會行 tùi 南天去。

[POJ] Lâi kài-siāu Leonard hūi-chhiⁿ

Chit-lia̍p sī Leonard hūi-chhiⁿ. Leonard hūi-chhiⁿ ê pian-hō sī C-jī-khòng-jī-it A-one，sī tī jī-khòng-jī-it nî it goe̍h lī-khui Hóe-chhiⁿ ê sî-chūn, khì hō͘ lâng hoat-hiān ê. I chiok-àm ê, m̄-koh i ê kúi-tō ē-tàng kā chit-lia̍p chiok tōa-lia̍p ê peng-soat-kiû chhōa lâi Lōe-thài-iông-hē. I ē tī cha̍p-jī-goe̍h ê sî-chūn ùi Tē-kiû kah Kim-chhiⁿ piⁿ-á kiâⁿ-kòe, liáu-āu chiah tī jī-khòng-jī-jī nî it goe̍h ê sî-chūn chông tùi Thài-iông khì. Hūi-chhiⁿ chiok phái ū-chhek ê, chit-kiāⁿ tāi-chì sī thong-lâng-chai. M̄-koh ū-lâng ū-chhek kóng, Leonard hūi-chhiⁿ ê kng-tō͘ tī cha̍p-jī goe̍h ê sî-chūn, ē kng kàu lán ti̍t-chiap iōng ba̍k-chiu to̍h khòaⁿ-ē-tio̍h. Chi̍t-lé-pài chêng khì hō͘ lâng hip-tio̍h ê Leonard hūi-chhiⁿ, í-keng ū chhiⁿ-sek ê hūi-chhiu kah chiok-tn̂g ê thô͘-hún bóe-liu ah. Chit-tiuⁿ siòng-phìⁿ sī kā la̍k-cha̍p-jī tiuⁿ ùi tiong-chhioh-tō͘ bōng-oán-kiàⁿ hip-tio̍h ê iáⁿ-siōng tha̍h chò chi̍t-tiuⁿ ê. Che lāi-té ū chi̍t-cho͘ sī tui-chong hūi-chhiⁿ, lēng-gōa chi̍t-cho͘ sī tui-chong pōe-kéng-chhiⁿ. Pōe-kéng sī tī Bí-kok Ka-chiu La̍k-goe̍h-ô͘ hū-kīn ê tang Sierra soaⁿ-me̍h ê iā-khong hip ê. Chit-lia̍p tī pak-thian ê hūi-chhiⁿ tī cha̍p-jī goe̍h-tiong lī-khui Tē-kiû liáu-āu, ē kiâⁿ tùi lâm-thian khì.

[KIP] Lâi kài-siāu Leonard huī-tshinn

Tsit-lia̍p sī Leonard huī-tshinn. Leonard huī-tshinn ê pian-hō sī C-jī-khòng-jī-it A-one，sī tī jī-khòng-jī-it nî it gue̍h lī-khui Hué-tshinn ê sî-tsūn, khì hōo lâng huat-hiān ê. I tsiok-àm ê, m̄-koh i ê kuí-tō ē-tàng kā tsit-lia̍p tsiok tuā-lia̍p ê ping-suat-kiû tshuā lâi Luē-thài-iông-hē. I ē tī tsa̍p-jī-gue̍h ê sî-tsūn uì Tē-kiû kah Kim-tshinn pinn-á kiânn-kuè, liáu-āu tsiah tī jī-khòng-jī-jī nî it gue̍h ê sî-tsūn tsông tuì Thài-iông khì. Huī-tshinn tsiok phái ū-tshik ê, tsit-kiānn tāi-tsì sī thong-lâng-tsai. M̄-koh ū-lâng ū-tshik kóng, Leonard huī-tshinn ê kng-tōo tī tsa̍p-jī gue̍h ê sî-tsūn, ē kng kàu lán ti̍t-tsiap iōng ba̍k-tsiu to̍h khuànn-ē-tio̍h. Tsi̍t-lé-pài tsîng khì hōo lâng hip-tio̍h ê Leonard huī-tshinn, í-king ū tshinn-sik ê huī-tshiu kah tsiok-tn̂g ê thôo-hún bué-liu ah. Tsit-tiunn siòng-phìnn sī kā la̍k-tsa̍p-jī tiunn uì tiong-tshioh-tōo bōng-uán-kiànn hip-tio̍h ê iánn-siōng tha̍h tsò tsi̍t-tiunn ê. Tse lāi-té ū tsi̍t-tsoo sī tui-tsong huī-tshinn, līng-guā tsi̍t-tsoo sī tui-tsong puē-kíng-tshinn. Puē-kíng sī tī Bí-kok Ka-tsiu La̍k-gue̍h-ôo hū-kīn ê tang Sierra suann-me̍h ê iā-khong hip ê. Tsit-lia̍p tī pak-thian ê huī-tshinn tī tsa̍p-jī gue̍h-tiong lī-khui Tē-kiû liáu-āu, ē kiânn tuì lâm-thian khì.

[English] Introducing Comet Leonard

Here comes Comet Leonard. Comet C/2021 A1 (Leonard) was discovered as a faint smudge in January 2021 when it was out past Mars -- but its orbit will take the giant shedding ice-ball into the inner Solar System, passing near both Earth and Venus in December before it swoops around the Sun in early January 2022. Although comets are notoriously hard to predict, some estimations have Comet Leonard brightening to become visible to the unaided eye in December. Comet Leonard was captured just over a week ago already sporting a green-tinged coma and an extended dust tail. The featured picture was composed from 62 images taken through a moderate-sized telescope -- one set of exposures tracking the comet, while another set tracking the background stars. The exposures were taken from the dark skies above the Eastern Sierra Mountains, near June Lake in California, USA. Soon after pasing near the Earth in mid-December, the comet will shift from northern to southern skies.

詞彙學習