青色爍光 ê 影片

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Video of a Green Flash
• 影片來源 kah 版權：Paolo Lazzarotti
• 天文探索 kah 科普教育：支援 APOD ê 博士班學程
• 台文翻譯：An-Li Tsai (NCU)

[漢羅] 青色爍光 ê 影片

逐家攏叫是講，這是一个 神話。 嘛有一寡人想講這是真 ê，毋閣毋知影這个現象是按怎來 ê。 探險家若是看--著，是會 感覺足驕傲 ê。 這其實是 ùi 太陽來 ê 青色爍光。 青色爍光 確實是真 ê，咱嘛知影這个爍光是按怎來 ê。 日頭 落去到完全消失進前，會 tī 上尾爍一擺足強 ê 青光。 毋閣這款現象干焦會 tī 足低、足遠 ê 地平線出現一目𥍉。 青色爍光 嘛有法度 tī 日出 彼陣看著，毋閣愛有閣較好 ê 時機才看有。 這个 青色爍光 ê 影片是頂個月 tī 意大利 Tuscany ê Ligurian 海邊仔 日頭欲落海 ê 時陣翕著 ê。 第二段 影片 ê 青色爍光 是正常速度，第一段影片是加速版，第三段影片是 慢速版。 太陽 袂變做青色 ê，這是 地球大氣層 ê 稜鏡 效應造成 ê。

[POJ] Chhiⁿ-sek sih-kng ê iáⁿ-phìⁿ

Ta̍k-ke lóng kiò-sī kóng, che sī chi̍t-ê sîn-ōe. Mā ū chi̍t-kóa-lâng siūⁿ-kóng che sī chin ê, m̄-koh m̄-chai chit-ê hiān-siōng sī án-ná lâi ê. Thàm-hiám-ka nā-sī khòaⁿ--tio̍h, sī ē kám-kak chiok kiau-ngō͘ ê. Che kî-si̍t sī ùi Thài-iông lâi ê chhiⁿ-sek sih-kng. Chhiⁿ-sek sih-kng khak-si̍t sī chin ê, lán mā chai-iáⁿ chit-ê sih-kng sī án-ná lâi ê. Ji̍t-thâu lo̍h-khì kàu oân-choân siau-sit chìn-chêng, ē tī siōng-bóe sih chi̍t-pái chiok kiông ê chhiⁿ-kng. M̄-koh chit-khoán hiān-siōng kan-na ē tī chiok kē, chiok hn̄g ê tē-pêng-sòaⁿ chhut-hiān chi̍t-ba̍k-nih. Chhiⁿ-sek sih-kng mā ū-hoat-tō͘ tī ji̍t-chhut hit-chūn khòaⁿ-tio̍h, m̄-koh ài ū koh-khah hó ê sî-ki chiah khòaⁿ-ū. Chit-ê chhiⁿ-sek sih-kng ê iáⁿ-phìⁿ sī téng-kò-goe̍h tī I-tá-lī Tuscany ê Ligurian hái-piⁿ-á ji̍t-thâu beh lo̍h-hái ê sî-chūn hip-tio̍h ê. Tē-jī-tōaⁿ iáⁿ-phìⁿ ê chhiⁿ-sek sih-kng sī chèng-siông sok-tō͘, tē-it-tōaⁿ ê iáⁿ-phìⁿ sī ka-sok-pán, tē-saⁿ-tōaⁿ iáⁿ-phìⁿ sī bān-sok-pán. Thài-iông bōe piàn-chò chhiⁿ-sek ê, che sī Tē-kiû tōa-khì-chân ê lêng-kiàⁿ hāu-èng chō-sêng ê.

[KIP] Tshinn-sik sih-kng ê iánn-phìnn

Ta̍k-ke lóng kiò-sī kóng, tse sī tsi̍t-ê sîn-uē. Mā ū tsi̍t-kuá-lâng siūnn-kóng tse sī tsin ê, m̄-koh m̄-tsai tsit-ê hiān-siōng sī án-ná lâi ê. Thàm-hiám-ka nā-sī khuànn--tio̍h, sī ē kám-kak tsiok kiau-ngōo ê. Tse kî-si̍t sī uì Thài-iông lâi ê tshinn-sik sih-kng. Tshinn-sik sih-kng khak-si̍t sī tsin ê, lán mā tsai-iánn tsit-ê sih-kng sī án-ná lâi ê. Ji̍t-thâu lo̍h-khì kàu uân-tsuân siau-sit tsìn-tsîng, ē tī siōng-bué sih tsi̍t-pái tsiok kiông ê tshinn-kng. M̄-koh tsit-khuán hiān-siōng kan-na ē tī tsiok kē, tsiok hn̄g ê tē-pîng-suànn tshut-hiān tsi̍t-ba̍k-nih. Tshinn-sik sih-kng mā ū-huat-tōo tī ji̍t-tshut hit-tsūn khuànn-tio̍h, m̄-koh ài ū koh-khah hó ê sî-ki tsiah khuànn-ū. Tsit-ê tshinn-sik sih-kng ê iánn-phìnn sī tíng-kò-gue̍h tī I-tá-lī Tuscany ê Ligurian hái-pinn-á ji̍t-thâu beh lo̍h-hái ê sî-tsūn hip-tio̍h ê. Tē-jī-tuānn iánn-phìnn ê tshinn-sik sih-kng sī tsìng-siông sok-tōo, tē-it-tuānn ê iánn-phìnn sī ka-sok-pán, tē-sann-tuānn iánn-phìnn sī bān-sok-pán. Thài-iông buē piàn-tsò tshinn-sik ê, tse sī Tē-kiû tuā-khì-tsân ê lîng-kiànn hāu-ìng tsō-sîng ê.

[English] Video of a Green Flash

Many think it is just a myth. Others think it is true but its cause isn't known. Adventurers pride themselves on having seen it. It's a green flash from the Sun. The truth is the green flash does exist and its cause is well understood. Just as the setting Sun disappears completely from view, a last glimmer appears startlingly green. The effect is typically visible only from locations with a low, distant horizon, and lasts just a few seconds. A green flash is also visible for a rising Sun, but takes better timing to spot. A dramatic green flash was caught on video last month as the Sun set beyond the Ligurian Sea from Tuscany, Italy. The second sequence in the featured video shows the green flash in real time, while the first is sped up and the last is in slow motion. The Sun itself does not turn partly green -- the effect is caused by layers of the Earth's atmosphere acting like a prism.

詞彙學習