水沖 kah 銀河

Page(/daily/2021/11/20211101.md)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 水沖 kah 銀河

這个攝影師有一个夢,to̍h 是欲翕一張仔內底有水沖 kah 銀河 ê 相片。 這上困難 ê 是,愛有袂擺 ê 翕相地點、愛有 tùi 水沖 kah 邊仔山谷 有效 ê 人工照明、愛 kā 前景 kah 背景規个翕入去、愛煩惱 火金蛄、愛保持 kha-mé-lah 焦燥、閣愛細膩莫去踏著毒蛇。 咱來看這个翕出來 ê 結果,這是 tī 七月中 ê 暗暝翕好了後,才用數位拼接 ê 方式鬥做一張闊幅全景圖。 這个水沖是 tī 中國 東爿 羅霄山脈 ê 珠簾水沖。 咱 銀河系 ê 中央帶 迒過天頂,現出足濟 暗塗粉 雲絲 kah 多彩 ê 星雲。 這寡蹛 tī 銀河 ê 明亮天星 kā 天頂照予光,有 夏季大三角、足光 ê 織女星,攏 tī 銀河彎弓 ê 面頂看會著。 攝影師 kah 伊 ê 朋友翕 78 張 欲用來組合 ê 相片了後,to̍h 踮遐 享受這个暗暝,一直到天光。

[POJ] Chúi-chhiâng kah Gîn-hô

Chit-ê liap-iáⁿ-su ū chi̍t-ê bāng, to̍h sī beh hip chi̍t-tiuⁿ-á lāi-té ū chúi-chhiâng kah Gîn-hô ê siòng-phìⁿ. Che siōng khùn-lân ê sī, ài ū bōe-bái ê hip-siòng tē-tiám, ài ū tùi chúi-chhiâng kah piⁿ-á soaⁿ-kok ū-hāu ê jîn-kong chiò-bêng, ài kā chiân-kéng kah pōe-kéng kui-ê hip–ji̍p-khì, ài hoân-ló hóe-kim-ko͘ siuⁿ kim, ài pó-chhî kha-mé-lah ta-sò, koh ài sè-lī mài khì ta̍h-tio̍h to̍k-chôa. Lán lâi khòaⁿ chit-ê hip–chhut-lâi ê kiat-kó, che sī tī chhit goe̍h tiong ê àm-mî hip hó liáu-āu, chiah iōng só͘-ūi pheng-chiap ê hong-sek tàu-chò chit-tiuⁿ khoah-pak choân-kéng-tô͘. Chit-ê chúi-chhiâng sī tī Tiong-kok tang-pêng Lô-siau soaⁿ-me̍h ê Chu-liân chúi-chhiâng. Lán Gîn-hô-hē ê tiong-iong-tòa hāⁿ kòe thiⁿ-téng, hiàn-chhut chiok-chōe àm-thô͘-hún hûn-si kah to-chhái ê seng-hûn. Chit-kóa tī Gîn-hô ê bêng-liōng thiⁿ-chhiⁿ kā thiⁿ-téng chiò hō͘ kng, ū Hā-kùi tōa-saⁿ-kak, chiok-kng ê Chit-lú-chhiⁿ, lóng tī Gîn-hô-oan-kiong ê bīn-téng khòaⁿ-ē-tio̍h. Liap-iáⁿ-su kah i ê pêng-iú hip chhit-cha̍p-peh tiuⁿ beh iōng-lâi cho͘-ha̍p ê siòng-phìⁿ liáu-āu, to̍h tiám hiah hiáng-siū chit-ê àm-mî, it-ti̍t kàu thiⁿ-kng.

[KIP] Tsuí-tshiâng kah Gîn-hô

Tsit-ê liap-iánn-su ū tsi̍t-ê bāng, to̍h sī beh hip tsi̍t-tiunn-á lāi-té ū tsuí-tshiâng kah Gîn-hô ê siòng-phìnn. Tse siōng khùn-lân ê sī, ài ū buē-bái ê hip-siòng tē-tiám, ài ū tuì tsuí-tshiâng kah pinn-á suann-kok ū-hāu ê jîn-kong tsiò-bîng, ài kā tsiân-kíng kah puē-kíng kui-ê hip–ji̍p-khì, ài huân-ló hué-kim-koo siunn kim, ài pó-tshî kha-mé-lah ta-sò, koh ài sè-lī mài khì ta̍h-tio̍h to̍k-tsuâ. Lán lâi khuànn tsit-ê hip–tshut-lâi ê kiat-kó, tse sī tī tshit gue̍h tiong ê àm-mî hip hó liáu-āu, tsiah iōng sóo-uī phing-tsiap ê hong-sik tàu-tsò tsit-tiunn khuah-pak tsuân-kíng-tôo. Tsit-ê tsuí-tshiâng sī tī Tiong-kok tang-pîng Lô-siau suann-me̍h ê Tsu-liân tsuí-tshiâng. Lán Gîn-hô-hē ê tiong-iong-tuà hānn kuè thinn-tíng, hiàn-tshut tsiok-tsuē àm-thôo-hún hûn-si kah to-tshái ê sing-hûn. Tsit-kuá tī Gîn-hô ê bîng-liōng thinn-tshinn kā thinn-tíng tsiò hōo kng, ū Hā-kuì tuā-sann-kak, tsiok-kng ê Tsit-lú-tshinn, lóng tī Gîn-hô-uan-kiong ê bīn-tíng khuànn-ē-tio̍h. Liap-iánn-su kah i ê pîng-iú hip tshit-tsa̍p-peh tiunn beh iōng-lâi tsoo-ha̍p ê siòng-phìnn liáu-āu, to̍h tiám hiah hiáng-siū tsit-ê àm-mî, it-ti̍t kàu thinn-kng.

[English] A Waterfall and the Milky Way

The dream was to capture both the waterfall and the Milky Way together. Difficulties included finding a good camera location, artificially illuminating the waterfall and the surrounding valley effectively, capturing the entire scene with numerous foreground and background shots, worrying that fireflies would be too distracting, keeping the camera dry, and avoiding stepping on a poisonous snake. Behold the result – captured after midnight in mid-July and digitally stitched into a wide-angle panorama. The waterfall is the picturesque Zhulian waterfall in the Luoxiao Mountains in eastern China. The central band of our Milky Way Galaxy crosses the sky and shows numerous dark dust filaments and colorful nebulas. Bright stars dot the sky – all residing in the nearby Milky Way – including the Summer Triangle with bright Vega visible above the Milky Way’s arch. After capturing all 78 component exposures for you to enjoy, the photographer and friends enjoyed the view themselves for the rest of the night.

詞彙學習(台語漢字/POJ/KIP/華語漢字/English)

  • 【水沖】chúi-chhiâng/tsuí-tshiân/瀑布/waterfall
  • 【夏季大三角】Hā-kùi tōa-saⁿ-kak/Hā-kuì tuā-sann-kak/夏季大三角/Summer Triangle
  • 【織女星】Chit-lú-chhiⁿ/Tsit-lú-tshinn/織女星/Vega

  1. 阮嘛有:Podcast面冊InstagramTwitter,會逐工 kā 你提醒有新 ê 翻譯 kah 錄音,緊來追蹤! ↩︎

  2. 本站 ê 介紹 (台語/華語)FAQ (華語) ↩︎

  3. 看無台文?阮讀予你聽!已經錄過 ê 文章 ↩︎

昨昏 ê 圖:模擬宇宙 ê 暗物質 明仔載 ê 圖:超新星安魂曲:到今已經出現三擺 ê 超新星