影片:木星 ê 爍光

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 影片:木星 ê 爍光

Tī 木星出現爍光矣! 幾若工前,幾若个團隊 leh 監看太陽系 上大粒行星 ê 時陣,注意著 2 秒鐘長 ê 光爆現象。 這款爍光 以前嘛捌看過,是 1994 年彼改足有名 ê 連紲 相碰。 彼改 ê 彗星 Shoemaker-Levy 9 號 ê 彗星屑仔 去碰著木星了後,煞 tī 木星留幾若個月 ê 烏斑木星 上無 有 7 改去 hŏng 碰著 ê 記錄,差不多攏是 業餘天文學家 發現 ê。 Tī 這支影片 內底,因為地球大氣層無穩定,煞予木星影像嘛 爍咧爍咧。 忽然間,有一个爍光出現 tī 中央倒爿遐。 土衛 Io kah 伊 ê 烏影 tī 正爿 看會著。 咱可能 無法度知影 是啥物去挵著 木星。 毋閣若是 ùi 咱已經知影 ê 厝邊 太陽系 來想,to̍h 應該知影彼可能是一塊岩石敆冰。 伊 ê 寸尺 可能 kah 巴士平大台,應該是 ùi 足久以前經過 ê 彗星 抑是 小行星 落 loài ê

[POJ] Iáⁿ-phìⁿ: Bo̍k-chhiⁿ ê sih-kng

Tī Bo̍k-chhiⁿ chhut-hiān sih-kng ah! Kúi-ā-kâng chêng, kúi-ā-ê thoân-tūi leh kàm-khòaⁿ Thài-iông-hē siōng-tōa-lia̍p kiâⁿ-chhiⁿ ê sî-chūn, chù-ì tio̍h nn̄g-bió-cheng tn̂g ê kng-po̍k hiān-siōng. Chit-khoán sih-kng í-chêng mā bat khòaⁿ-kàu, sī i̍t-kiú-kiú-sù nî hit-kái chiok ū-miâ ê liân-sòa sio-pōng. Hit-kái ê hui-chhiⁿ Shoemaker-Levy kàu hō ê hui-chhiⁿ sap-á khì pōng-tio̍h Bo̍k-chhiⁿ liáu-āu, soah tī Bo̍k-chhiⁿ lâu kúi-ā-kò-goe̍h ê o͘-pan. Bo̍k-chhiⁿ siōng-bô ū chhit-kái khì hŏng pōng-tio̍h ê kì-lo̍k, chha-put-to lóng-sī gia̍p-û thian-bûn-ha̍k-ka hoat-hiān ê. Tī chit-ki iáⁿ-phìⁿ lāi-té, in-ūi Tē-kiû tōa-khì-chân bô ún-tēng, soah hō͘ Bo̍k-chhiⁿ iáⁿ-siōng mā sih-leh-sih-leh. Hut-jiân-kan, ū chi̍t-ê sih-kng chhut-hiān tī tiong-ng tò-pêng hiah. Thó͘-ūi Io kah i ê o͘-iáⁿ tī chiàⁿ-pêng khòaⁿ-ē-tio̍h. Lán khó-lêng bô-hoat-tō͘ chai-iáⁿ sī siáⁿ-mih khì lòng-tio̍h Bo̍k-chhiⁿ. M̄-koh nā-sī ùi lán í-keng chai-iáⁿ ê chhù-piⁿ Thài-iông-hē lâi siūⁿ, to̍h eng-kai chai-iáⁿ hē khó-lêng sī chi̍t-tè giâm-chio̍h kap peng. I ê chhùn-chhioh khó-lêng kah pá-sū pêⁿ-tōa-tāi, eng-kai sī ùi chiok-kú í-chêng kéng-kòe ê hui-chhiⁿ iah-sī sió-kiâⁿ-chhiⁿ la̍k-loài ê.

[KIP] Iánn-phìnn: Bo̍k-tshinn ê sih-kng

Tī Bo̍k-tshinn tshut-hiān sih-kng ah! Kuí-ā-kâng tsîng, kuí-ā-ê thuân-tuī leh kàm-khuànn Thài-iông-hē siōng-tuā-lia̍p kiânn-tshinn ê sî-tsūn, tsù-ì tio̍h nn̄g-bió-tsing tn̂g ê kng-po̍k hiān-siōng. Tsit-khuán sih-kng í-tsîng mā bat khuànn-kàu, sī i̍t-kiú-kiú-sù nî hit-kái tsiok ū-miâ ê liân-suà sio-pōng. Hit-kái ê hui-tshinn Shoemaker-Levy kàu hō ê hui-tshinn sap-á khì pōng-tio̍h Bo̍k-tshinn liáu-āu, suah tī Bo̍k-tshinn lâu kuí-ā-kò-gue̍h ê oo-pan. Bo̍k-tshinn siōng-bô ū tshit-kái khì hŏng pōng-tio̍h ê kì-lo̍k, tsha-put-to lóng-sī gia̍p-û thian-bûn-ha̍k-ka huat-hiān ê. Tī tsit-ki iánn-phìnn lāi-té, in-uī Tē-kiû tuā-khì-tsân bô ún-tīng, suah hōo Bo̍k-tshinn iánn-siōng mā sih-leh-sih-leh. Hut-jiân-kan, ū tsi̍t-ê sih-kng tshut-hiān tī tiong-ng tò-pîng hiah. Thóo-uī Io kah i ê oo-iánn tī tsiànn-pîng khuànn-ē-tio̍h. Lán khó-lîng bô-huat-tōo tsai-iánn sī siánn-mih khì lòng-tio̍h Bo̍k-tshinn. M̄-koh nā-sī uì lán í-king tsai-iánn ê tshù-pinn Thài-iông-hē lâi siūnn, to̍h ing-kai tsai-iánn hē khó-lîng sī tsi̍t-tè giâm-tsio̍h kap ping. I ê tshùn-tshioh khó-lîng kah pá-sū pênn-tuā-tāi, ing-kai sī uì tsiok-kú í-tsîng kíng-kuè ê hui-tshinn iah-sī sió-kiânn-tshinn la̍k-luài ê.

[English] Video: Flash on Jupiter

There has been a flash on Jupiter. A few days ago, several groups monitoring our Solar System’s largest planet noticed a two-second long burst of light. Such flashes have been seen before, with the most famous being a series of impactor strikes in 1994. Then, fragments of Comet Shoemaker-Levy 9 struck Jupiter leaving dark patches that lasted for months. Since then, at least seven impacts have been recorded on Jupiter – usually discovered by amateur astronomers. In the featured video, variations in the Earth’s atmosphere cause Jupiter’s image to shimmer when, suddenly, a bright flash appears just left of center. Io and its shadow are visible on the right. What hit Jupiter will likely never be known, but considering what we do know of the nearby Solar System, it was likely a piece of rocky and ice – perhaps the size of a bus – that broke off long-ago from a passing comet or asteroid.

詞彙學習(台語漢字/POJ/KIP/華語漢字/English)

  • 【爍光】sih-kng/sih-kng/閃光/flash
  • 【光爆】kng-po̍k/kng-po̍k/光爆/burst of light
  • 【業餘】gia̍p-û/gia̍p-û/業餘/amateur

  1. 阮嘛有:Podcast面冊InstagramTwitter,會逐工 kā 你提醒有新 ê 翻譯 kah 錄音,緊來追蹤! ↩︎

  2. 本站 ê 介紹 (台語/華語)FAQ (華語) ↩︎

  3. 看無台文?阮讀予你聽!已經錄過 ê 文章 ↩︎

昨昏 ê 圖:北美洲星雲 kah 鵜鶘星雲 明仔載 ê 圖:Rubin ê 星系