土星 ê 暗暝

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Saturn at Night
• 影像來源：NASA, JPL-Caltech, Space Science Institute, Mindaugas Macijauskas
• 台文翻譯：An-Li Tsai (NCU)

[漢羅] 土星 ê 暗暝

土星 tī 地球 ê 夜空 猶是遮爾光。 伊美麗 ê 望遠鏡景色 kah 美麗 ê 土星環定定予伊 tī 天星晚會 內底成做主角。 毋閣這个遮爾美麗 ê 土星環 kah 土星暗暝，是無可能 tī 倚太陽這爿 ê 望遠鏡翕著，是愛 ùi 另外彼爿才有法度翕。 因為倚太陽這爿干焦有法度看著 土星 ê 日時。 事實上，這張土星影像是 Cassini 太空船 翕 ê。 這是土星去予薄薄 ê 太陽光照甲親像新月 kah 無照著光 ê 土星暗暝。 In ê 烏影 to̍h 投射 tī 闊 koh 複雜 ê 土星環系統。 Cassini 是地球送去 ê 機器人太空船，伊踅土星 13 冬了後，tī 2017 年 9 月 15 駛入去這粒氣態巨行星 ê 大氣層。 這張宏偉 ê 拼鬥影像是 kā Cassini 闊幅 kha-mé-lah tī 伊 落入去土星 進前 2 工記錄 ê 相片組合起來 ê。 咱無機會閣看著土星 ê 暗暝矣，除非閣有 另外一台 ùi 地球送去 ê 太空船 踅土星 leh 行。

[POJ] Thó͘-chhiⁿ ê àm-mî

Thó͘-chhiⁿ tī Tē-kiû ê iā-khong iáu-sī chiah-nī kng. I bí-lē ê bōng-oán-kiàⁿ kéng-sek kah bí-lē ê Thó͘-chhiⁿ-khoân tiāⁿ-tiāⁿ hō͘ i tī thiⁿ-chhiⁿ boán-hōe lāi-té chiâⁿ-chò chú-kak. M̄-koh chit-ê chiah-nī bí-lē ê Thó͘-chhiⁿ-khoân kah Thó͘-chhiⁿ àm-mî, sī bô-khó-lêng tī óa thài-iông chit-pêng ê bōng-oán-kiàⁿ hip-tio̍h, sī ài ùi lēng-gōa hit-pêng chiah ū-hoat-tō͘ hip. In-ūi óa thài-iông chit-pêng kan-na ū-hoat-tō͘ khòaⁿ-tio̍h Thó͘-chhiⁿ ê ji̍t--sî. Sū-si̍t-siōng, chit-tiuⁿ Thó͘-chhiⁿ iáⁿ-siōng sī Cassini thài-khong-chûn hip--ê. Che sī Thó͘-chhiⁿ khì hō͘ po̍h-po̍h ê thài-iông-kng chiò-kah chhiⁿ-chhiūⁿ sin-goe̍h kah bô chiò-tio̍h-kng ê Thó͘-chhiⁿ àm-mî. In ê o͘-iáⁿ to̍h tâu-siā tī khoah koh ho̍k-cha̍p ê Thó͘-chhiⁿ-khoân hē-thóng. Cassini sī Tē-kiû sàng--khì ê ke-khì-lâng thài-khong-chûn, i se̍h Thó͘-chhiⁿ cha̍p-saⁿ tang liáu-āu, tī jī-khòng-it-chhit nî káu goe̍h cha̍p-gō͘ sái-ji̍p-khì chit-lia̍p khì-thài kū-kiâⁿ-chhiⁿ ê tōa-khì-chân. Chit-tiuⁿ hông-úi ê pheng-tàu-iáⁿ-siōng sī kā Cassini khoah-pak kha-mé-lah tī i la̍k-ji̍p-khì Thó͘-chhiⁿ chìn-chêng nn̄g-kang kì-lo̍k ê siòng-phìⁿ cho͘-ha̍p--khí-lâi ê. Lán bô ki-hōe koh khòaⁿ-tio̍h Thó͘-chhiⁿ ê àm-mî ah, tî-hui koh ū lēng-gōa chi̍t-tâi ùi Tē-kiû sàng--khì ê thài-khong-chûn se̍h Thó͘-chhiⁿ leh kiâⁿ.

[KIP] Thóo-tshinn ê àm-mî

Thóo-tshinn tī Tē-kiû ê iā-khong iáu-sī tsiah-nī kng. I bí-lē ê bōng-uán-kiànn kíng-sik kah bí-lē ê Thóo-tshinn-khuân tiānn-tiānn hōo i tī thinn-tshinn buán-huē lāi-té tsiânn-tsò tsú-kak. M̄-koh tsit-ê tsiah-nī bí-lē ê Thóo-tshinn-khuân kah Thóo-tshinn àm-mî, sī bô-khó-lîng tī uá thài-iông tsit-pîng ê bōng-uán-kiànn hip-tio̍h, sī ài uì līng-guā hit-pîng tsiah ū-huat-tōo hip. In-uī uá thài-iông tsit-pîng kan-na ū-huat-tōo khuànn-tio̍h Thóo-tshinn ê ji̍t--sî. Sū-si̍t-siōng, tsit-tiunn Thóo-tshinn iánn-siōng sī Cassini thài-khong-tsûn hip--ê. Tse sī Thóo-tshinn khì hōo po̍h-po̍h ê thài-iông-kng tsiò-kah tshinn-tshiūnn sin-gue̍h kah bô tsiò-tio̍h-kng ê Thóo-tshinn àm-mî. In ê oo-iánn to̍h tâu-siā tī khuah koh ho̍k-tsa̍p ê Thóo-tshinn-khuân hē-thóng. Cassini sī Tē-kiû sàng--khì ê ke-khì-lâng thài-khong-tsûn, i se̍h Thóo-tshinn tsa̍p-sann tang liáu-āu, tī jī-khòng-it-tshit nî káu gue̍h tsa̍p-gōo sái-ji̍p-khì tsit-lia̍p khì-thài kū-kiânn-tshinn ê tuā-khì-tsân. Tsit-tiunn hông-uí ê phing-tàu-iánn-siōng sī kā Cassini khuah-pak kha-mé-lah tī i la̍k-ji̍p-khì Thóo-tshinn tsìn-tsîng nn̄g-kang kì-lo̍k ê siòng-phìnn tsoo-ha̍p--khí-lâi ê. Lán bô ki-huē koh khuànn-tio̍h Thóo-tshinn ê àm-mî ah, tî-hui koh ū līng-guā tsi̍t-tâi uì Tē-kiû sàng--khì ê thài-khong-tsûn se̍h Thóo-tshinn leh kiânn.

[English] Saturn at Night

Still bright in planet Earth's night skies, good telescopic views of Saturn and its beautiful rings often make it a star at star parties. But this stunning view of Saturn's rings and night side just isn't possible from telescopes closer to the Sun than the outer planet. They can only bring Saturn's day into view. In fact, this image of Saturn's slender sunlit crescent with night's shadow cast across its broad and complex ring system was captured by the Cassini spacecraft. A robot spacecraft from planet Earth, Cassini called Saturn orbit home for 13 years before it was directed to dive into the atmosphere of the gas giant on September 15, 2017. This magnificent mosaic is composed of frames recorded by Cassini's wide-angle camera only two days before its grand final plunge. Saturn's night will not be seen again until another spaceship from Earth calls.

詞彙學習