西 Virginia 州 ê 火虹

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：A Fire Rainbow over West Virginia
• 影像來源：Christa Harbig
• 台文翻譯：An-Li Tsai (NCU)

[漢羅] 西 Virginia 州 ê 火虹

這个雲是發生啥物代誌？ 遠方捲雲 ê 冰晶 to̍h 親像是浮 tī 天頂 ê 細片 稜鏡。 伊 ê 環地平線弧 kah 地平線 平行，外形敢若是火舌仝款，所以有人私底下 kā 叫做 火虹。 若是欲看著 環地平線弧，太陽 上無愛 tī 天頂 58 度懸、捲雲愛 tī 下跤，to̍h 親像是這幅圖內底 ê 毛捲雲按呢。 足濟扁扁 ê、六角形 ê 冰晶是組成捲雲 ê 原料。 In 愛 照水平方向排好勢，才會當用仝款 ê 方式好好仔 反射太陽光。 所以這款 環地平線 弧 較罕得 看著。 這个火虹 是這個月初 tī 美國 西 Virginia 州 ê North Fork 山 附近 翕 ê。

[POJ] Sai Virginia chiu ê Hóe-khēng

Chit-ê hûn sī hoat-seng siáⁿ-mih tāi-chì? Oán-hong kńg-hûn ê peng-chiⁿ to̍h chhiⁿ-chhiūⁿ sī phû tī thiⁿ-téng ê sè-phìⁿ lêng-kiàⁿ. I ê khoân-tē-pêng-sòaⁿ-hô͘ kah tē-pêng-sòaⁿ pêng-hêng, gōa-hêng ká-ná sī hóe-chi̍h kāng-khoán, só͘-í ū-lâng su-té-hā kā kiò-chò hóe-khēng. Nā-sī beh khòaⁿ-tio̍h khoân-tē-pêng-sòaⁿ-hô͘, thài-iông siōng-bô ài tī thiⁿ-téng gō͘-cha̍p-poeh tō͘ koân, kńg-hûn ài tī ē-kha, to̍h chhiⁿ-chhiūⁿ sī chit-pak-tô͘ lāi-té ê mo͘-kńg-hûn án-ne. Chiok-chōe píⁿ-píⁿ ê, la̍k-kak-hêng ê peng-chiⁿ sī cho͘-sêng kńg-hûn ê goân-liāu. In ài chiàu chúi-pêng hong-hiòng pâi hó-sè, chiah ē-tàng iōng kāng-khoán ê hong-sek hó-hó-á hoán-siā thài-iông-kng. Só͘-í chit-khoán khoân-tē-pêng-sòaⁿ-hô͘ khah hán-tit khòaⁿ-tio̍h. Chit-ê hóe-khēng sī chit-kò-goe̍h-chhoe tī Bí-kok sai Virginia chiu ê North Fork soaⁿ hū-kīn hip--ê.

[KIP] Sai Virginia tsiu ê Hué-khīng

Tsit-ê hûn sī huat-sing siánn-mih tāi-tsì? Uán-hong kńg-hûn ê ping-tsinn to̍h tshinn-tshiūnn sī phû tī thinn-tíng ê sè-phìnn lîng-kiànn. I ê khuân-tē-pîng-suànn-hôo kah tē-pîng-suànn pîng-hîng, guā-hîng ká-ná sī hué-tsi̍h kāng-khuán, sóo-í ū-lâng su-té-hā kā kiò-tsò hué-khīng. Nā-sī beh khuànn-tio̍h khuân-tē-pîng-suànn-hôo, thài-iông siōng-bô ài tī thinn-tíng gōo-tsa̍p-pueh tōo kuân, kńg-hûn ài tī ē-kha, to̍h tshinn-tshiūnn sī tsit-pak-tôo lāi-té ê moo-kńg-hûn án-ne. Tsiok-tsuē pínn-pínn ê, la̍k-kak-hîng ê ping-tsinn sī tsoo-sîng kńg-hûn ê guân-liāu. In ài tsiàu tsuí-pîng hong-hiòng pâi hó-sè, tsiah ē-tàng iōng kāng-khuán ê hong-sik hó-hó-á huán-siā thài-iông-kng. Sóo-í tsit-khuán khuân-tē-pîng-suànn-hôo khah hán-tit khuànn-tio̍h. Tsit-ê hué-khīng sī tsit-kò-gue̍h-tshue tī Bí-kok sai Virginia tsiu ê North Fork suann hū-kīn hip--ê.

[English] A Fire Rainbow over West Virginia

What's happening to this cloud? Ice crystals in a distant cirrus cloud are acting like little floating prisms. Known informally as a fire rainbow for its flame-like appearance, a circumhorizon arc appears parallel to the horizon. For a circumhorizontal arc to be visible, the Sun must be at least 58 degrees high in a sky where cirrus clouds present below -- in this case cirrus fibrates. The numerous, flat, hexagonal ice-crystals that compose the cirrus cloud must be aligned horizontally to properly refract sunlight in a collectively similar manner. Therefore, circumhorizontal arcs are somewhat unusual to see. The featured fire rainbow was photographed earlier this month near North Fork Mountain in West Virginia, USA.

詞彙學習