火星岩石 Rochette

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Mars Rock Rochette
• 影像來源：NASA, JPL-Caltech
• 台文翻譯：An-Li Tsai (NCU)

[漢羅] 火星岩石 Rochette

這張清楚 ê 影像，是火星任務第 180 工火星日（8 月 22）用毅力號探測車 ê 避障 kha-mé-lah 翕外口 Jezero 隕石坑內底落甲規四界 ê 岩石。 相片倒爿下跤彼个，是探測車會翻頭 ê 頭前輪，伊 ê 直徑是 52.5 公分。 中央彼个是 外號叫做 Rochette ê 大岩石。 毋閣，設計任務 ê 人，拄著 Rochette 是無欲閃。 毅力號顛倒去予指示講，愛 kā 伊 2 公尺長 ê 機器手骨伸--出去，kā 岩石表面研研咧。 看是毋是會當用探測車 ê 鑽仔，提著比鉛筆較厚 ê、品質穩定 ê 標本。 毅力號收集 ê 標本，未來會有新 ê 火星任務 kā in 提--轉來。

[POJ] Hóe-chhiⁿ giâm-chio̍h Rochette

Chit-tiuⁿ chheng-chhó͘ ê iáⁿ-siōng, sī Hóe-chhiⁿ jīm-bū tē chi̍t-pah-poeh-cha̍p kang Hóe-chhiⁿ-ji̍t (poeh goe̍h jī-jī) iōng Ge̍k-le̍k-hō thàm-chhek-chhia ê Phiah-chiòng kha-mé-lah hip gōa-kháu Jezero ún-se̍k-kheⁿ lāi-té lak-kah kui-sì-kè ê giâm-chio̍h. Siòng-phìⁿ tò-pêng ē-kha hit-ê, sī thàm-chhek-chhia ē hoan-thâu ê thâu-chêng-lián, i ê ti̍t-kèng sī gō͘-cha̍p-jī-tiám-gō͘ kong-hun. Tiong-ng hit-ê sī gōa-hō kiò-chò Rochette ê tōa-giâm-chio̍h. M̄-koh, siat-kè jīm-bū ê lâng, tú-tio̍h Rochette sī bô-beh siám. Gē-le̍k-hō tian-tò khì hō͘ chí-sī kóng, ài kā i nn̄g-kong-chhioh tn̂g ê ke-khì-chhiú-kut chhun--chhut-khì, kā giâm-chio̍h piáu-bīn géng-géng-leh. Khòaⁿ sī-m̄-sī ē-tàng iōng thàm-chhek-chhia ê chǹg-á, the̍h-tio̍h pí iân-pit khah-kāu ê, phín-chit ún-tēng ê piau-pún. Gē-le̍k-hō siu-chi̍p ê piau-pún, bī-lâi ē ū sin--ê Hóe-chhiⁿ-jīm-bū kā in the̍h--tńg-lâi.

[KIP] Hué-tshinn giâm-tsio̍h Rochette

Tsit-tiunn tshing-tshóo ê iánn-siōng, sī Hué-tshinn jīm-bū tē tsi̍t-pah-pueh-tsa̍p kang Hué-tshinn-ji̍t (pueh gue̍h jī-jī) iōng Gi̍k-li̍k-hō thàm-tshik-tshia ê Phiah-tsiòng kha-mé-lah hip guā-kháu Jezero ún-si̍k-khenn lāi-té lak-kah kui-sì-kè ê giâm-tsio̍h. Siòng-phìnn tò-pîng ē-kha hit-ê, sī thàm-tshik-tshia ē huan-thâu ê thâu-tsîng-lián, i ê ti̍t-kìng sī gōo-tsa̍p-jī-tiám-gōo kong-hun. Tiong-ng hit-ê sī guā-hō kiò-tsò Rochette ê tuā-giâm-tsio̍h. M̄-koh, siat-kè jīm-bū ê lâng, tú-tio̍h Rochette sī bô-beh siám. Gē-li̍k-hō tian-tò khì hōo tsí-sī kóng, ài kā i nn̄g-kong-tshioh tn̂g ê ke-khì-tshiú-kut tshun--tshut-khì, kā giâm-tsio̍h piáu-bīn gíng-gíng-leh. Khuànn sī-m̄-sī ē-tàng iōng thàm-tshik-tshia ê tsǹg-á, the̍h-tio̍h pí iân-pit khah-kāu ê, phín-tsit ún-tīng ê piau-pún. Gē-li̍k-hō siu-tsi̍p ê piau-pún, bī-lâi ē ū sin--ê Hué-tshinn-jīm-bū kā in the̍h--tńg-lâi.

[English] Mars Rock Rochette

Taken on mission sol 180 (August 22) this sharp image from a Hazard Camera on the Perseverance rover looks out across a rock strewn floor of Jezero crater on Mars. At 52.5 centimeters (21 inches) in diameter, one of the rover's steerable front wheels is at lower left in the frame. Near center is a large rock nicknamed Rochette. Mission planners don't want to avoid Rochette though. Instead Perseverance will be instructed to reach out with its 2 meter long robotic arm and abrade the rock's surface, to determine whether it has a consistency suitable for obtaining a sample, slightly thicker than a pencil, using the rover's coring bit. Samples collected by Perseverance would be returned to Earth by a future Mars mission.

詞彙學習