三重凌木現象 kah 互食事件

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Triple Transit and Mutual Events
• 影像來源 kah 版權：Christopher Go
• 台文翻譯：An-Li Tsai (NCU)

[漢羅] 三重凌木現象 kah 互食事件

這三張相片是 8 月 15 tī 菲律賓 Cebu 市翕 ê 太陽系 氣態巨行星，木星。 Tī 這工，拄仔好望遠鏡看著 一寡精彩景色 ê 詳細狀況，是木星加利略衛星 ê 凌木現象。 上面頂彼張，是 Io tī 上正爿去予木星 ê 烏影閘去。 毋閣其他三粒大粒 ê 木衛出現 tī 木星 一條一條雲帶盤面 ê 頭前。 較光 ê Europa kah 較暗 ê Ganymede tī 較倚倒爿遐。 In ê 烏影 to̍h 照 tī 氣態巨行星 ê 雲頂。 Callisto tī 木星正爿下跤 ê 邊仔。 三粒衛星 tī 木星表面產生這个三重凌木現象。 中央彼張，Europa kah Ganymede ê 烏影 tī 中央看會著。 毋閣 Ganymede ùi Europa 頭前行過，kā 伊閘牢矣。 下跤彼張，是凌木現象真罕得看著 ê 木衛食。 Ganymede ê 烏影 to̍h 落 tī Europa 面頂。 Ùi 地球 ê 角度來看，加利略衛星會閘來閘去、食來食去。 這款現象 6 年出現一改，差不多是 木星 tī 伊春分附近 ê 時陣 會當看著。

[POJ] Saⁿ-têng lêng-bo̍k-hiān-siōng kah hō͘-si̍t-sū-kiāⁿ

Che saⁿ-tiuⁿ siòng-phìⁿ sī poeh goe̍h cha̍p-gō͘ tī Hui-lu̍t-pin Cebu chhī hip ê Thài-iông-hē khì-thài kū-kiâⁿ-chhiⁿ, Bo̍k-chhiⁿ. Tī chit-kang, tú-á-hó bōng-oán-kiàⁿ khòaⁿ-tio̍h chi̍t-kóa cheng-chhái kéng-sek ê siông-sè-chōng-hóng, sī Bo̍k-chhiⁿ Ka-lī-lio̍h ūi-chhiⁿ ê lêng-bo̍k-hiān-siōng. Siōng bīn-téng hit-tiuⁿ, sī Io tī siōng chiàⁿ-pêng khì hō͘ Bo̍k-chhiⁿ ê o͘-iáⁿ cha̍h-khì. M̄-koh kî-tha saⁿ-lia̍p tōa-lia̍p ê Bo̍k-ūi chhut-hiān tī Bo̍k-chhiⁿ chi̍t-tiâu-chi̍t-tiâu hûn-tòa pôaⁿ-bīn ê thâu-chêng. Khah-kng ê Europa kah khah-àm ê Ganymede tī khah-óa tò-pêng hiah. In ê o͘-iáⁿ to̍h chiò tī khì-thài kū-kiâⁿ-chhiⁿ ê hûn-téng. Callisto tī Bo̍k-chhiⁿ chiàⁿ-pêng ē-kha ê piⁿ-á. Saⁿ-lia̍p ūi-chhiⁿ tī Bo̍k-chhiⁿ piáu-bīn sán-seng chit-ê saⁿ-têng lêng-bo̍k-hiān-siōng. Tiong-ng hit-tiuⁿ, Europa kah Ganymede ê o͘-iáⁿ tī tiong-ng khòaⁿ-ē-tio̍h. M̄-koh Ganymede ùi Europa thâu-chêng kiâⁿ-kòe, kā i cha̍h-tiâu ah. Ē-kha hit-tiuⁿ, sī lêng-bo̍k-hiān-siōng chin hán-tit khòaⁿ-tio̍h ê Bo̍k-ūi-si̍t. Ganymede ê o͘-iáⁿ to̍h lo̍h tī Europa bīn-téng. Ùi Tē-kiû ê kak-tō͘ lâi khòaⁿ, Ka-lī-lio̍h ūi-chhiⁿ ē cha̍h-lâi-cha̍h-khì, chia̍h-lâi-chia̍h-khì. Chit-khoán hiān-siōng la̍k-nî chhut-hiān chi̍t-kái, chha-put-to sī Bo̍k-chhiⁿ tī i chhun-hun hū-kīn ê sî-chūn ē-tàng khòaⁿ-tio̍h.

[KIP] Sann-tîng lîng-bo̍k-hiān-siōng kah hōo-si̍t-sū-kiānn

Tse sann-tiunn siòng-phìnn sī pueh gue̍h tsa̍p-gōo tī Hui-lu̍t-pin Cebu tshī hip ê Thài-iông-hē khì-thài kū-kiânn-tshinn, Bo̍k-tshinn. Tī tsit-kang, tú-á-hó bōng-uán-kiànn khuànn-tio̍h tsi̍t-kuá tsing-tshái kíng-sik ê siông-sè-tsōng-hóng, sī Bo̍k-tshinn Ka-lī-lio̍h uī-tshinn ê lîng-bo̍k-hiān-siōng. Siōng bīn-tíng hit-tiunn, sī Io tī siōng tsiànn-pîng khì hōo Bo̍k-tshinn ê oo-iánn tsa̍h-khì. M̄-koh kî-tha sann-lia̍p tuā-lia̍p ê Bo̍k-uī tshut-hiān tī Bo̍k-tshinn tsi̍t-tiâu-tsi̍t-tiâu hûn-tuà puânn-bīn ê thâu-tsîng. Khah-kng ê Europa kah khah-àm ê Ganymede tī khah-uá tò-pîng hiah. In ê oo-iánn to̍h tsiò tī khì-thài kū-kiânn-tshinn ê hûn-tíng. Callisto tī Bo̍k-tshinn tsiànn-pîng ē-kha ê pinn-á. Sann-lia̍p uī-tshinn tī Bo̍k-tshinn piáu-bīn sán-sing tsit-ê sann-tîng lîng-bo̍k-hiān-siōng. Tiong-ng hit-tiunn, Europa kah Ganymede ê oo-iánn tī tiong-ng khuànn-ē-tio̍h. M̄-koh Ganymede uì Europa thâu-tsîng kiânn-kuè, kā i tsa̍h-tiâu ah. Ē-kha hit-tiunn, sī lîng-bo̍k-hiān-siōng tsin hán-tit khuànn-tio̍h ê Bo̍k-uī-si̍t. Ganymede ê oo-iánn to̍h lo̍h tī Europa bīn-tíng. Uì Tē-kiû ê kak-tōo lâi khuànn, Ka-lī-lio̍h uī-tshinn ē tsa̍h-lâi-tsa̍h-khì, tsia̍h-lâi-tsia̍h-khì. Tsit-khuán hiān-siōng la̍k-nî tshut-hiān tsi̍t-kái, tsha-put-to sī Bo̍k-tshinn tī i tshun-hun hū-kīn ê sî-tsūn ē-tàng khuànn-tio̍h.

[English] Triple Transit and Mutual Events

These three panels feature the Solar System's ruling gas giant Jupiter on August 15 as seen from Cebu City, Phillipines, planet Earth. On that date the well-timed telescopic views detail some remarkable performances, transits and mutual events, by Jupiter's Galilean moons. In the top panel, Io is just disappearing into Jupiter's shadow at the far right, but the three other large Jovian moons appear against the planet's banded disk. Brighter Europa and darker Ganymede are at the far left, also casting their two shadows on the gas giant's cloud tops. Callisto is below and right near the planet's edge, the three moons in a triple transit across the face of Jupiter. Moving to the middle panel, shadows of Europa and Ganymede are still visible near center but Ganymede has occulted or passed in front of Europa. The bottom panel captures a rare view of Jovian moons in eclipse while transiting Jupiter, Ganymede's shadow falling on Europa itself. From planet Earth's perspective, similar mutual events, when Galilean moons occult and eclipse each other, can be seen every six years or so when Jupiter is near its own equinox.

詞彙學習