環形星雲 ê 環

Page(/daily/2021/08/20210818.md)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 環形星雲 ê 環

環形星系 (M57) 比你 ùi 細台望遠鏡看著 ê 閣較複雜。 上明顯 ê 中央環 差不多有 1 光年 闊。 毋閣這張 足長時間感光 ê 影像,是 ùi 三台無仝 ê 大型望遠鏡影像資料組合–起來 ê,欲 探索星雲 中央 ê 恆星足遠 ê 發光氣體 ê 環形雲絲。 這个 組合影像 有 ùi 酸素發–出 ê 紅光,tī 可見光 kah 紅外線 攏有。 這个環形星雲是搝長 ê 行星形星雲,是像 太陽 ê 恆星 tī 演化過程 kā 外層大氣擲–出去,落尾變做 白矮星。 這个 環形星雲 離咱 2500 光年遠,to̍h tī 音樂星座 天琴座 遐。

[POJ] Khoân-hêng-seng-hûn ê khoân

Khoân-hêng-seng-hûn (M-gō͘-cha̍p-chhit) pí lí ùi sè-tâi bōng-oán-kiàⁿ khòaⁿ-tio̍h ê koh-khah hop-cha̍p. Siōng bêng-hián ê tiong-ng-khoân chha-put-to ū chi̍t kng-nî khoah. M̄-koh chit-tiuⁿ chiok tn̂g-sî-kan kám-kng ê iáⁿ-siōng, sī ùi saⁿ-tâi bô-kâng ê tōa-hêng bōng-oán-kiàⁿ iáⁿ-siōng chu-liāu cho͘-ha̍p–khí-lâi-ê, beh thàm-soh lî seng-hûn tiong-ng ê hêng-chhiⁿ chiok-hn̄g ê hoat-kng khì-thé ê khoân-hêng hûn-si. Chit-ê cho͘-ha̍p iáⁿ-siōng ū ùi sng-sò͘ hoat–chhut ê âng-kng, tī khó-kiàn-kng kah âng-gōa-sòaⁿ lóng ū. Chit-ê Khoân-hêng-seng-hûn sī giú-tn̄g ê kiâⁿ-chhiⁿ-hêng-seng-hûn, sī chhiūⁿ thài-iông ê hêng-chhiⁿ tī ián-hòa-kòe-têng kā gōa-chàn tōa-khì tàn–chhut-khì, lo̍h-bóe piàn-chò pe̍h-é-chhiⁿ. Chit-ê Khoân-hêng-seng-hûn lî lán nn̄g-chheng-gō͘-pah kng-nî hn̄g, to̍h tī im-ga̍k seng-chō Thian-khîm-chō hiah.

[KIP] Khuân-hîng-sing-hûn ê khuân

Khuân-hîng-sing-hûn (M-gōo-tsa̍p-tshit) pí lí uì sè-tâi bōng-uán-kiànn khuànn-tio̍h ê koh-khah hop-tsa̍p. Siōng bîng-hián ê tiong-ng-khuân tsha-put-to ū tsi̍t kng-nî khuah. M̄-koh tsit-tiunn tsiok tn̂g-sî-kan kám-kng ê iánn-siōng, sī uì sann-tâi bô-kâng ê tuā-hîng bōng-uán-kiànn iánn-siōng tsu-liāu tsoo-ha̍p–khí-lâi-ê, beh thàm-soh lî sing-hûn tiong-ng ê hîng-tshinn tsiok-hn̄g ê huat-kng khì-thé ê khuân-hîng hûn-si. Tsit-ê tsoo-ha̍p iánn-siōng ū uì sng-sòo huat–tshut ê âng-kng, tī khó-kiàn-kng kah âng-guā-suànn lóng ū. Tsit-ê Khuân-hîng-sing-hûn sī giú-tn̄g ê kiânn-tshinn-hîng-sing-hûn, sī tshiūnn thài-iông ê hîng-tshinn tī ián-huà-kuè-tîng kā guā-tsàn tuā-khì tàn–tshut-khì, lo̍h-bué piàn-tsò pe̍h-é-tshinn. Tsit-ê Khuân-hîng-sing-hûn lî lán nn̄g-tshing-gōo-pah kng-nî hn̄g, to̍h tī im-ga̍k sing-tsō Thian-khîm-tsō hiah.

[English] Rings Around the Ring Nebula

The Ring Nebula (M57), is more complicated than it appears through a small telescope. The easily visible central ring is about one light-year across, but this remarkably deep exposure - a collaborative effort combining data from three different large telescopes - explores the looping filaments of glowing gas extending much farther from the nebula’s central star. This composite image includes red light emitted by hydrogen as well as visible and infrared light. The Ring Nebula is an elongated planetary nebula, a type of nebula created when a Sun-like star evolves to throw off its outer atmosphere to become a white dwarf star. The Ring Nebula is about 2,500 light-years away toward the musical constellation Lyra.

詞彙學習(台語漢字/POJ/KIP/華語漢字/English)

  • 【行星形星雲】kiâⁿ-chhiⁿ-hêng-seng-hûn/kiânn-tshinn-hîng-sing-hûn/行星狀星雲/planetary nebula
  • 【環形星雲】Khoân-hêng-seng-hûn/Khuân-hîng-sing-hûn/環狀星雲/the Ring Nebula
  • 【白矮星】pe̍h-é-chhiⁿ/pe̍h-é-tshinn/白矮星/white dwarf star
  • 【天琴座】Thian-khîm-chō/Thian-khîm-tsō/天琴座/Lyra

  1. 逐工 ê 圖 ↩︎

  2. 本站 ê 介紹 (台語/華語) ↩︎

  3. FAQ (華語) ↩︎

昨昏 ê 圖:M57:哈伯翕 ê 環形星雲 明仔載 ê 圖:足光 ê 流星 kah 恆星滿滿 ê 夜空