完美 ê 捲螺仔星系

Page(/daily/2021/08/20210813.md)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 完美 ê 捲螺仔星系

這个 捲螺仔星系 to̍h 算毋是上完美 ê,上無嘛足食相 ê。 M74 這个 華麗 ê 正向星系,是一个有幾十億粒恆星 ê 島宇宙,離咱有 3200 萬光年遠,to̍h tī 雙魚座 ê 方向。 M74 去予分類做 Sc 星系。 伊優美 ê 捲螺仔手骨,是一个 宏偉 ê 設計,會當 ùi 藍光星團 kah 烏暗 ê 宇宙塗粉 帶追蹤著。 這个清楚 ê 組合相片 是 ùi 哈伯太空望遠鏡 ê 先進巡天 kha-mé-lah ê 影像資料建構出來 ê。 M74 ê 盤面差不多有 3 萬光年闊。 這張相片有記錄酸素原子發射 ê 感光,而且紅光嘛 kā 星系 ê 大型恆星形成區標–出來。 M74 比 Messier 星表 內底大部份星系 ê 表面光度較低,所以伊有當時仔嘛叫做 幻影星系

[POJ] Oân-bí ê Kńg-lê-á seng-hē

Chit-ê kńg-lê-á seng-hē to̍h sǹg m̄-sī siōng oân-bí ê, siōng-bô mā chiok chia̍h-siòng ê. M-chhit-cha̍p-sì 一个 hôa-lē ê chiàⁿ-hiòng seng-hē, sī chi̍t-ê ū kúi-cha̍p-ek-lia̍p hêng-chhiⁿ ê tó-ú-tiū, lî lán ū 3200 bān kng-nî hn̄g, to̍h tī Siang-hî-chō ê hong-hiòng. M-chhit-cha̍p-sì khì hō͘ hun-lūi chò Sc seng-hē. I iu-bí ê kńg-lê-á chhiú-kut, sī chi̍t-ê hông-úi ê siat-kè, ē-tàng ùi nâ-kng seng-thoân kah o͘-àm ê ú-tiū thô͘-hún-tòa tui-chong tio̍h. Chit-ê chheng-chhó͘ ê cho͘-ha̍p siòng-phìⁿ sī ùi Ha-peh-thài-khong-bōng-oán-kiàⁿ ê Sian-chìn-sûn-thian kha-mé-lah ê iáⁿ-siōng chu-liāu kiàn-kò͘–chhut-lâi-ê. M-chhit-cha̍p-sì ê pôaⁿ-bīn chha-put-to ū saⁿ-bān kng-nî khoah. Chit-tiuⁿ siòng-phìⁿ ū kì-lo̍k sng-sò͘ goân-chú hoat-siā ê kám-kng, jī-cha̍p âng-kng mā kā seng-hē ê tōa-hêng hêng-chhiⁿ hêng-sêng-khu piau–chhut-lâi. M-chhit-cha̍p-sì pí Messier seng-piáu lāi-té tōa-pō͘-hūn seng-hē ê piáu-bīn kng-tō͘ khah kē, só͘-í i ū-tang-sî-á mā kiò-chò Hoàn-iáⁿ-seng-hē.

[KIP] Uân-bí ê Kńg-lê-á sing-hē

Tsit-ê kńg-lê-á sing-hē to̍h sǹg m̄-sī siōng uân-bí ê, siōng-bô mā tsiok tsia̍h-siòng ê. M-tshit-tsa̍p-sì 一个 huâ-lē ê tsiànn-hiòng sing-hē, sī tsi̍t-ê ū kuí-tsa̍p-ik-lia̍p hîng-tshinn ê tó-ú-tiū, lî lán ū 3200 bān kng-nî hn̄g, to̍h tī Siang-hî-tsō ê hong-hiòng. M-tshit-tsa̍p-sì khì hōo hun-luī tsò Sc sing-hē. I iu-bí ê kńg-lê-á tshiú-kut, sī tsi̍t-ê hông-uí ê siat-kè, ē-tàng uì nâ-kng sing-thuân kah oo-àm ê ú-tiū thôo-hún-tuà tui-tsong tio̍h. Tsit-ê tshing-tshóo ê tsoo-ha̍p siòng-phìnn sī uì Ha-peh-thài-khong-bōng-uán-kiànn ê Sian-tsìn-sûn-thian kha-mé-lah ê iánn-siōng tsu-liāu kiàn-kòo–tshut-lâi-ê. M-tshit-tsa̍p-sì ê puânn-bīn tsha-put-to ū sann-bān kng-nî khuah. Tsit-tiunn siòng-phìnn ū kì-lo̍k sng-sòo guân-tsú huat-siā ê kám-kng, jī-tsa̍p âng-kng mā kā sing-hē ê tuā-hîng hîng-tshinn hîng-sîng-khu piau–tshut-lâi. M-tshit-tsa̍p-sì pí Messier sing-piáu lāi-té tuā-pōo-hūn sing-hē ê piáu-bīn kng-tōo khah kē, sóo-í i ū-tang-sî-á mā kiò-tsò Huàn-iánn-sing-hē.

[English] A Perfect Spiral

If not perfect then this spiral galaxy is at least one of the most photogenic. An island universe of about 100 billion stars, 32 million light-years away toward the constellation Pisces, M74 presents a gorgeous face-on view. Classified as an Sc galaxy, the grand design of M74’s graceful spiral arms are traced by bright blue star clusters and dark cosmic dust lanes. This sharp composite was constructed from image data recorded by the Hubble Space Telescope’s Advanced Camera for Surveys. Spanning about 30,000 light-years across the face of M74, it includes exposures recording emission from hydrogen atoms, highlighting the reddish glow of the galaxy’s large star-forming regions. With a lower surface brightness than most galaxies in the Messier catalog, M74 is sometimes known as the Phantom Galaxy.

詞彙學習(台語漢字/POJ/KIP/華語漢字/English)

  • 【正向星系】chiàⁿ-hiòng seng-hē/tsiànn-hiòng sing-hē/正向星系/face-on galaxy
  • 【捲螺仔星系】kńg-lê-á seng-hē/kńg-lê-á sing-hē/螺旋星系/spiral galaxy
  • 【捲螺仔手骨】kńg-lê-á chhiú-kut/kńg-lê-á tshiú-kut/螺旋手臂、旋臂/spiral arm
  • 【幻影星系】Hoàn-iáⁿ seng-hē/Huàn-iánn sing-hē/幻影星系/Phantom Galaxy
  • 【雙魚座】Siang-hî-chō/Siang-hî-tsō/雙魚座/Pisces

  1. 逐工 ê 圖 ↩︎

  2. 本站 ê 介紹 (台語/華語) ↩︎

  3. FAQ (華語) ↩︎

昨昏 ê 圖:美麗 ê 三裂星雲 明仔載 ê 圖:島宇宙 kah 宇宙沙