隕石坑 Tycho kah Clavius

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Tycho and Clavius
• 影像來源 kah 版權：Eduardo Schaberger Poupeau
• 台文翻譯：An-Li Tsai (NCU)

[漢羅] 隕石坑 Tycho kah Clavius

這張詳細 ê 望遠鏡影像，是月球南部彎彎曲曲 ê 高地。 面頂是月球 ê 南部。 這是 7 月 20 翕 ê。 這張月景 ê 特色是，有少年 kah 老 ê 大隕石坑 Tycho kah Clavius。 Tycho 才差不多 1 億歲爾爾，伊是中央附近直徑 85 公里闊、有較尖 ê 坑仔墘 ê 隕石坑。 隕石坑中央 2 公里懸 ê 山頭，有一半去予太陽照予光，有一半 去予烏影閘去。 這是衝擊事件造成 ê Tycho 隕石坑。 伊噴--出來 ê 石屑仔，到今猶是會當予這个隕石坑 tī 十五暝彼陣，變甲遮爾 出眾。 這是因為這个時陣會造成明顯 ê 輻射光巡系統，tī 月球向咱這爿，湠到規半爿。 阿波羅 17 號 ê 降落地點，差不多離 Tycho 隕石坑 有 2000 公里遠。 實際上，一寡 tī 遮收集 ê 標本，可能是 ùi Tycho 隕石坑來 ê。 月球向咱這爿，有一个上老上大 ê 隕石坑 Clavius。 伊 ê 直徑是 225 公里闊，to̍h tī Tycho ê 正南爿（面頂）。 Clavius 隕石坑 家己 ê 輻射系統，是 ùi 伊本底 ê 衝擊事件產生 ê，毋閣足久以前 to̍h 已經變無去矣。 這个較老 ê 隕石坑，伊 ui--去 ê 坑仔墘 kah 光滑 ê 山跤，已經予較細 ê 隕石坑崁--去。 這寡較細 ê 隕石坑，是 Clavius 隕石坑形成了後 ê 衝擊事件才產生 ê。 紅外線平流層天文台 tī 2020 年發表 ê 觀測結果表示，伊 tī Clavius 隕石坑揣著水。 是講少年 ê Tycho 隕石坑 kah 老 ê Clavius 隕石坑，攏是科幻史詩「2001 太空漫遊」內底 ê 月球地點。

[POJ] Ún-se̍k-kheⁿ Tycho kah Clavius

Chit-tiuⁿ siông-sè ê bōng-oán-kiàⁿ iáⁿ-siōng, sī Goe̍h-kiû lâm-pō͘ oan-oan-khiau-khiau ê ko-tē. Bīn-téng sī Goe̍h-kiû ê lâm-pō͘. Che sī chhit-goe̍h jī-cha̍p hip--ê. Chit-tiuⁿ goe̍h-kéng ê te̍k-sek sī, ū siàu-liân kah lâu ê tōa-ún-se̍k-kheⁿ Tycho kah Clavius. Tycho chiah chha-put-to chi̍t-ek-hòe niā-niā, i sī tiong-ng hū-kūn ti̍t-kèng poeh-cha̍p-gō͘ kong-lí khoah, ū khah-chiam ê kheⁿ-á-kîⁿ ê ún-se̍k-kheⁿ. Ún-se̍k-kheⁿ tiong-ng nn̄g kong-lí koân ê soaⁿ-thâu, ū chi̍t-pòaⁿ khì hō thài-iông chiò hō͘ kng, ū chi̍t-pòaⁿ khì hō͘ o͘-iáⁿ cha̍h--khì. Che sī chhiong-kek-sū-kiāⁿ chō-sêng ê Tycho ún-se̍k-kheⁿ. I phùn--chhut-lâi ê chio̍h-sap-á, kàu-taⁿ iáu-sī ē-tàng hō͘ chi̍t-ê ún-se̍k-kheⁿ tī cha̍p-gō͘-mê hit-chūn, piàn kah chiah-nī chhut-chiòng. Che sī in-ūi chit-ê sî-chūn ē chō-sêng bêng-hián ê hok-siā kng-sûn hē-thóng, tī Goe̍h-kiû hiòng lán chit-pêng, thòaⁿ kàu kui-pòaⁿ-pêng. A-pho-lô cha̍p-chhit hō ê kàng-lo̍h-tē-tiám, chha-put-to lî Tycho ún-se̍k-kheⁿ ū nn̄g-chheng kong-lí hn̄g. Si̍t-chè-siōng, chi̍t-kóa tī chia siu-chi̍p ê piau-pún, khó-lêng sī ùi Tycho ún-se̍k-kheⁿ lâi--ê. Goe̍h-kiû hiòng lán chit-pêng, ū chi̍t-ê siōng-lâu siōng-tōa ê ún-se̍k-kheⁿ Clavius. I ê ti̍t-kèng sī nn̄g-pah-jī-cha̍p-gō͘ kong-lí khoah, to̍h tī Tycho ê chiàⁿ-lâm-pêng (bīn-téng). Clavius ún-se̍k-kheⁿ ka-tī ê hok-siā hē-thóng, sī ùi i pún-tē ê chhiong-kek-sū-kiāⁿ sán-seng ê, m̄-koh chiok-kú í-chêng to̍h í-keng piàn bô--khì ah. Chit-ê khah-lāu ê ún-se̍k-kheⁿ, i ui--khì ê kheⁿ-á-kîⁿ kah kng-ku̍t ê soaⁿ-kha, í-keng hō͘ khah-sè ê ún-se̍k-kheⁿ khàm--khì. Chit-kóa khah-sè ê ún-se̍k-kheⁿ, sī Clavius ún-se̍k-kheⁿ hêng-sêng liáu-āu ê chhiong-kek-sū-kiāⁿ chiah sán-seng ê. Âng-gōa-sòaⁿ pêng-liû-chân thian-bûn-tâi tī jī-khòng-jī-khòng nî hoat-pió ê koan-chhek kiat-kó piáu-sī, i tī Clavius ún-se̍k-kheⁿ chhōe-tio̍h chúi. Sī-kóng siàu-liân ê Tycho ún-se̍k-kheⁿ kah lāu ê Clavius ún-se̍k-kheⁿ, lóng-sī kho-hoàn sú-si "jī-khòng-khòng-it Thài-khong bān-iû" lāi-té ê Goe̍h-kiû tē-tiám.

[KIP] Ún-si̍k-khenn Tycho kah Clavius

Tsit-tiunn siông-sè ê bōng-uán-kiànn iánn-siōng, sī Gue̍h-kiû lâm-pōo uan-uan-khiau-khiau ê ko-tē. Bīn-tíng sī Gue̍h-kiû ê lâm-pōo. Tse sī tshit-gue̍h jī-tsa̍p hip--ê. Tsit-tiunn gue̍h-kíng ê ti̍k-sik sī, ū siàu-liân kah lâu ê tuā-ún-si̍k-khenn Tycho kah Clavius. Tycho tsiah tsha-put-to tsi̍t-ik-huè niā-niā, i sī tiong-ng hū-kūn ti̍t-kìng pueh-tsa̍p-gōo kong-lí khuah, ū khah-tsiam ê khenn-á-kînn ê ún-si̍k-khenn. Ún-si̍k-khenn tiong-ng nn̄g kong-lí kuân ê suann-thâu, ū tsi̍t-puànn khì hō thài-iông tsiò hōo kng, ū tsi̍t-puànn khì hōo oo-iánn tsa̍h--khì. Tse sī tshiong-kik-sū-kiānn tsō-sîng ê Tycho ún-si̍k-khenn. I phùn--tshut-lâi ê tsio̍h-sap-á, kàu-tann iáu-sī ē-tàng hōo tsi̍t-ê ún-si̍k-khenn tī tsa̍p-gōo-mê hit-tsūn, piàn kah tsiah-nī tshut-tsiòng. Tse sī in-uī tsit-ê sî-tsūn ē tsō-sîng bîng-hián ê hok-siā kng-sûn hē-thóng, tī Gue̍h-kiû hiòng lán tsit-pîng, thuànn kàu kui-puànn-pîng. A-pho-lô tsa̍p-tshit hō ê kàng-lo̍h-tē-tiám, tsha-put-to lî Tycho ún-si̍k-khenn ū nn̄g-tshing kong-lí hn̄g. Si̍t-tsè-siōng, tsi̍t-kuá tī tsia siu-tsi̍p ê piau-pún, khó-lîng sī uì Tycho ún-si̍k-khenn lâi--ê. Gue̍h-kiû hiòng lán tsit-pîng, ū tsi̍t-ê siōng-lâu siōng-tuā ê ún-si̍k-khenn Clavius. I ê ti̍t-kìng sī nn̄g-pah-jī-tsa̍p-gōo kong-lí khuah, to̍h tī Tycho ê tsiànn-lâm-pîng (bīn-tíng). Clavius ún-si̍k-khenn ka-tī ê hok-siā hē-thóng, sī uì i pún-tē ê tshiong-kik-sū-kiānn sán-sing ê, m̄-koh tsiok-kú í-tsîng to̍h í-king piàn bô--khì ah. Tsit-ê khah-lāu ê ún-si̍k-khenn, i ui--khì ê khenn-á-kînn kah kng-ku̍t ê suann-kha, í-king hōo khah-sè ê ún-si̍k-khenn khàm--khì. Tsit-kuá khah-sè ê ún-si̍k-khenn, sī Clavius ún-si̍k-khenn hîng-sîng liáu-āu ê tshiong-kik-sū-kiānn tsiah sán-sing ê. Âng-guā-suànn pîng-liû-tsân thian-bûn-tâi tī jī-khòng-jī-khòng nî huat-pió ê kuan-tshik kiat-kó piáu-sī, i tī Clavius ún-si̍k-khenn tshuē-tio̍h tsuí. Sī-kóng siàu-liân ê Tycho ún-si̍k-khenn kah lāu ê Clavius ún-si̍k-khenn, lóng-sī kho-huàn sú-si "jī-khòng-khòng-it Thài-khong bān-iû" lāi-té ê Gue̍h-kiû tē-tiám.

[English] Tycho and Clavius

South is up in this detailed telescopic view across the Moon's rugged southern highlands. Captured on July 20, the lunar landscape features the Moon's young and old, the large craters Tycho and Clavius. About 100 million years young, Tycho is the sharp-walled 85 kilometer diameter crater near center, its 2 kilometer tall central peak in bright sunlight and dark shadow. Debris ejected during the impact that created Tycho still make it the stand out lunar crater when the Moon is near full, producing a highly visible radiating system of light streaks, bright rays that extend across much of the lunar near side. In fact, some of the material collected at the Apollo 17 landing site, about 2,000 kilometers away, likely originated from the Tycho impact. One of the oldest and largest craters on the Moon's near side, 225 kilometer diameter Clavius is due south (above) of Tycho. Clavius crater's own ray system resulting from its original impact event would have faded long ago. The old crater's worn walls and smooth floor are now overlayed by smaller craters from impacts that occurred after Clavius was formed. Observations by the Stratospheric Observatory for Infrared Astronomy (SOFIA) published in 2020 found water at Clavius. Of course both young Tycho and old Clavius craters are lunar locations in the science fiction epic 2001: A Space Odyssey.

詞彙學習