有光有聲 ê 哈伯深空視場

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：The Hubble Ultra Deep Field in Light and Sound
• 影像來源：NASA, ESA, Hubble; 聲音化：G. Salvesen (UCSB); 資料：M. Rafelski et al.
• 注意：有一寡瀏覽器可能會無聲，請用 chrome 試看覓 leh，聲音 load 入來愛等一時仔（一分鐘以上），你徙動滑鼠 ê 時陣才會有鋼琴聲出現。
• 這禮拜 ê NASA 是：哈伯 深空週
• 台文翻譯：An-Li Tsai (NCU)

[漢羅] 有光有聲 ê 哈伯深空視場

你敢捌聽過哈伯深空視場？ 毋管你捌抑是毋捌，你可能毋捌 聽過這款 ê。 請你 tī 這幅影像面頂徙動你 ê 滑鼠，來聽看覓 leh！ 哈伯深空視場 (HUDF) 是 2003 到 2004 年開創 ê，是用 哈伯太空望遠鏡 tùi 一个看起來啥物攏無 ê 太空區域長時間感光。 按呢 to̍h 會當看著 tī 這內底遙遠、暗淡 ê 星系。 HUDF 是上有名 ê 一个天文影像之一，tī 遮咱用一个較活潑 ê 方式，聲波距離，來展示予逐家看。 你 kā 滑鼠徙到一个星系，伊 to̍h 會展示 訊息 予你看，內底有伊大概 ê 紅移。 因為 紅移 會 kā 光 ê 頻率徙到較紅 ê 光譜 彼爿去，tī 遮 咱 to̍h 用 kā 音調徙到較低 ê 聲音譜 彼爿來表示。 愈遠 ê 星系，伊 ê 宇宙紅移 to̍h 愈大（to̍h 算講伊看起來是藍色 ê），伊 ê 音調彈--起來 to̍h 會愈低。 HUDF 內底 ê 星系，平均距離是 106 億 光年 遠，聽--起來是 升 F 調。 按呢 tī 遮，你會當揣著 上遠 ê 星系 是佗一个？

[POJ] Ū kng ū siaⁿ ê Ha-peh chhim-khong sī-tiûⁿ

Lí kám bat thiaⁿ-kòe Ha-peh chhim-khong sī-tiûⁿ? M̄-koán lí bat iah-sī m̄-bat, lí khó-lêng m̄-bat thiaⁿ-kòe chit-khoán ê. Chhiáⁿ lí tī chit-pak iáⁿ-siōng bīn-téng sóa-tāng lí ê ku̍t-chhí, lâi thiaⁿ-khòaⁿ-māi leh! Ha-peh chhim-khong sī-tiûⁿ (HUDF) sī jī-khòng-khòng-sam kàu jī-khòng-khòng-sù nî khai-chhòng ê, sī iōng Ha-peh thài-khong bōng-oán-kiàⁿ tùi chi̍t-ê khòaⁿ--khí-lâi siáⁿ-mih lóng-bô ê thài-khong khu-he̍k tn̂g-sî-kan kám-kng. Án-ne to̍h ē-tàng khòaⁿ-tio̍h tī chit lāi-té iâu-oán, àm-tām ê seng-hē. HUDF sī siōng ū-miâ ê chi̍t-ê thian-bûn iáⁿ-siōng chi-it, tī chiah lán iōng chi̍t-ê khah oa̍h-phoat ê hong-sek, siaⁿ-pho kū-lî, lâi tiān-sī hō͘ ta̍k-ke khòaⁿ. Lí kā ku̍t-chhí soa-kàu chi̍t-ê seng-hē, i to̍h ē tiān-sī sìn-sit hō͘ lí khòaⁿ, lāi-té ū i tāi-khài ê ang-î. In-ūi ang-î ē kā kng ê pîn-lu̍t sóa-kàu khah-âng ê kng-phó͘ hit-pêng khì, tī chiah lán to̍h iōng kā im-tiāu sóa-kàu khah-kē ê siaⁿ-im-phó͘ hit-pêng lâi piáu-sī. Lú-hn̄g ê seng-hē, i ê ú-tiū ang-î to̍h lú-tōa (to̍h-sǹg-kóng i khòaⁿ--khí-lâi sī nâ-sek ê), i ê im-tiāu tôaⁿ--khí-lâi to̍h ē khah-kē. HUDF lāi-té ê seng-hē, pêng-kun kū-lî sī chi̍t-pah-khòng-la̍k e̍k kng-nî hn̄g, thiaⁿ--khí-lâi sī seng-F-tiāu. Án-ni tī chiah, lí ē-tàng chhōe-tio̍h siōng-hn̄g ê seng-hē sī tó-chi̍t-ê?

[KIP] Ū kng ū siann ê Ha-peh tshim-khong sī-tiûnn

Lí kám bat thiann-kuè Ha-peh tshim-khong sī-tiûnn? M̄-kuán lí bat iah-sī m̄-bat, lí khó-lîng m̄-bat thiann-kuè tsit-khuán ê. Tshiánn lí tī tsit-pak iánn-siōng bīn-tíng suá-tāng lí ê ku̍t-tshí, lâi thiann-khuànn-māi leh! Ha-peh tshim-khong sī-tiûnn (HUDF) sī jī-khòng-khòng-sam kàu jī-khòng-khòng-sù nî khai-tshòng ê, sī iōng Ha-peh thài-khong bōng-uán-kiànn tuì tsi̍t-ê khuànn-khí-lâi siánn-mih lóng-bô ê thài-khong khu-hi̍k tn̂g-sî-kan kám-kng. Án-ne to̍h ē-tàng khuànn-tio̍h tī tsit lāi-té iâu-uán, àm-tām ê sing-hē. HUDF sī siōng ū-miâ ê tsi̍t-ê thian-bûn iánn-siōng tsi-it, tī tsiah lán iōng tsi̍t-ê khah ua̍h-phuat ê hong-sik, siann-pho kū-lî, lâi tiān-sī hōo ta̍k-ke khuànn. Lí kā ku̍t-tshí sua-kàu tsi̍t-ê sing-hē, i to̍h ē tiān-sī sìn-sit hōo lí khuànn, lāi-té ū i tāi-khài ê ang-î. In-uī ang-î ē kā kng ê pîn-lu̍t suá-kàu khah-âng ê kng-phóo hit-pîng khì, tī tsiah lán to̍h iōng kā im-tiāu suá-kàu khah-kē ê siann-im-phóo hit-pîng lâi piáu-sī. Lú-hn̄g ê sing-hē, i ê ú-tiū ang-î to̍h lú-tuā (to̍h-sǹg-kóng i khuànn-khí-lâi sī nâ-sik ê), i ê im-tiāu tuânn--khí-lâi to̍h ē khah-kē. HUDF lāi-té ê sing-hē, pîng-kun kū-lî sī tsi̍t-pah-khòng-la̍k i̍k kng-nî hn̄g, thiann--khí-lâi sī sing-F-tiāu. Án-ni tī tsiah, lí ē-tàng tshuē-tio̍h siōng-hn̄g ê sing-hē sī tó-tsi̍t-ê?

[English] The Hubble Ultra Deep Field in Light and Sound

Have you heard about the Hubble Ultra-Deep Field? Either way, you've likely not heard about it like this -- please run your cursor over the featured image and listen! The Hubble Ultra-Deep Field (HUDF) was created in 2003-2004 with the Hubble Space Telescope staring for a long time toward near-empty space so that distant, faint galaxies would become visible. One of the most famous images in astronomy, the HUDF is featured here in a vibrant way -- with sonified distances. Pointing to a galaxy will play a note that indicates its approximate redshift. Because redshifts shift light toward the red end of the spectrum of light, they are depicted here by a shift of tone toward the low end of the spectrum of sound. The further the galaxy, the greater its cosmological redshift (even if it appears blue), and the lower the tone that will be played. The average galaxy in the HUDF is about 10.6 billion light years away and sounds like an F#. What's the most distant galaxy you can find?

詞彙學習