強化色彩 ê 冥王星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Pluto in Enhanced Color
• 影像來源：NASA, Johns Hopkins Univ./APL, Southwest Research Inst.
• Kah 冥王星有關 ê 影像 kah in ê 說明：揣 APOD ê Pluto
• 台文翻譯：An-Li Tsai (NCU)

[漢羅] 強化色彩 ê 冥王星

冥王星 ê 色彩是比咱看著 ê 閣較濟。 伊是咱太陽系內底上有名 ê 矮行星。 這張是 2015 年 7 月 新視野號機器人太空船 飛過冥王星 ê 時陣 翕 ê 彩色懸解析度影像資料。 這是用數位合成來 加強色彩 ê 影像，會當 tī 這个古早世界看著異常少年 ê 表面。 這張 強化色彩 ê 影像 毋若干焦 媠 爾爾，嘛有 科學用途。 會當予無仝化學成份 ê 表面看起來無仝。 比論講，這个 tī 正爿下跤淺色心形 ê Tombaugh 區 to̍h 按 無仝地質 分做兩區。 上倒爿彼爿是 Sputnik 高原，看起來是異常光滑。 到冥王星了後，新視野號太空船會繼續駛。 伊 tī 2019 年 行過 Arrokoth 小行星 了後 to̍h 有 夠額 ê 速度完全走離 咱 ê 太陽 系。

[POJ] Kiông-hòa sek-chhái ê Bêng-ông-chhiⁿ

Bêng-ông-chhiⁿ ê sek-chhái sī pí lán khòaⁿ-tio̍h ê koh-khah chōe. I sī lán Thài-iông-hē lāi-té siōng ū-miâ ê é-kiâⁿ-chhiⁿ. Chit-tiuⁿ sī jī-khòng-it-ngó͘ nî chhit goe̍h Sin-sī-iá-hō ke-khì-lâng thài-khong-chûn poe-kòe Bêng-ông-chhiⁿ ê sî-chūn hip ê chhái-sek koân kái-sek-tō͘ iáⁿ-siōng chu-liāu. Che sī iōng só͘-ūi ha̍p-sêng lâi ka-kiông sek-chhái ê iáⁿ-siōng, ē-tàng tī chi̍t-ê kó͘-chá sè-kài khòaⁿ-tio̍h ī-siông siàu-liân ê piáu-bīn. Chit-tiuⁿ kiông-hòa sek-chhái ê iáⁿ-siōng m̄-nā kan-na súi niā-niā, mā ū kho-ha̍k iōng-tô͘. Ē-tàng hō͘ bô-kâng hòa-ha̍k sêng-hūn ê piáu-bīn khòaⁿ–khí-lâi bô-kâng. Pí-lūn-kóng, chit-ê tī chiàⁿ-pêng ē-kha chhián-sek sim-hêng ê Tombaugh khu to̍h àn bô-kâng tē-chit pun-chò nn̄g-khu. Siōng tò-pêng hit-pēng sī Sputnik ko-goân, khòaⁿ–khí-lâi sī ī-siông kng-ku̍t. Kàu Bêng-ông-chhiⁿ liáu-āu, Sin-sī-iá-hō thài-khong-chûn ē kè-sio̍k sái. I tī jī-khòng-i̍t-kiú nî kiâⁿ-kòe Arrokoth sió-kiâⁿ-chhiⁿ liáu-āu to̍h ū kàu-gia̍h ê sok-tō͘ oân-choân chàu-lî lán ê Thài-iông-hē.

[KIP] Kiông-huà sik-tshái ê Bîng-ông-tshinn

Bîng-ông-tshinn ê sik-tshái sī pí lán khuànn-tio̍h ê koh-khah tsuē. I sī lán Thài-iông-hē lāi-té siōng ū-miâ ê é-kiânn-tshinn. Tsit-tiunn sī jī-khòng-it-ngóo nî tshit gue̍h Sin-sī-iá-hō ke-khì-lâng thài-khong-tsûn pue-kuè Bîng-ông-tshinn ê sî-tsūn hip ê tshái-sik kuân kái-sik-tōo iánn-siōng tsu-liāu. Tse sī iōng sóo-uī ha̍p-sîng lâi ka-kiông sik-tshái ê iánn-siōng, ē-tàng tī tsi̍t-ê kóo-tsá sè-kài khuànn-tio̍h ī-siông siàu-liân ê piáu-bīn. Tsit-tiunn kiông-huà sik-tshái ê iánn-siōng m̄-nā kan-na suí niā-niā, mā ū kho-ha̍k iōng-tôo. Ē-tàng hōo bô-kâng huà-ha̍k sîng-hūn ê piáu-bīn khuànn-khí-lâi bô-kâng. Pí-lūn-kóng, tsit-ê tī tsiànn-pîng ē-kha tshián-sik sim-hîng ê Tombaugh khu to̍h àn bô-kâng tē-tsit pun-tsò nn̄g-khu. Siōng tò-pîng hit-pīng sī Sputnik ko-guân, khuànn-khí-lâi sī ī-siông kng-ku̍t. Kàu Bîng-ông-tshinn liáu-āu, Sin-sī-iá-hō thài-khong-tsûn ē kè-sio̍k sái. I tī jī-khòng-i̍t-kiú nî kiânn-kuè Arrokoth sió-kiânn-tshinn liáu-āu to̍h ū kàu-gia̍h ê sok-tōo uân-tsuân tsàu-lî lán ê Thài-iông-hē.

[English] Pluto in Enhanced Color

Pluto is more colorful than we can see. Color data and high-resolution images of our Solar System’s most famous dwarf planet, taken by the robotic New Horizons spacecraft during its flyby in 2015 July, have been digitally combined to give an enhanced-color view of this ancient world sporting an unexpectedly young surface. The featured enhanced color image is not only esthetically pretty but scientifically useful, making surface regions of differing chemical composition visually distinct. For example, the light-colored heart-shaped Tombaugh Regio on the lower right is clearly shown here to be divisible into two regions that are geologically different, with the leftmost lobe Sputnik Planitia also appearing unusually smooth. After Pluto, New Horizons continued on, shooting past asteroid Arrokoth in 2019 and has enough speed to escape our Solar System completely.

詞彙學習（漢羅/POJ/KIP/華語/English）

• 【冥王星】Bêng-ông-chhiⁿ/Bîng-ông-tshinn/冥王星/Pluto
• 【新視野號機器人太空船】Sin-sī-iá-hō ke-khì-lâng thài-khong-chûn/Sin-sī-iá-hō ke-khì-lâng thài-khong-tsûn/新視野號機器人太空船/the robotic New Horizons spacecraft
• 【矮行星】é-kiâⁿ-chhiⁿ/é-kiânn-tshinn/矮行星/dwarf planetwor
• 【小行星】sió-kiâⁿ-chhiⁿ/sió-kiânn-tshinn/小行星/asteroid