愛會記得 NEOWISE 彗星

Page(/daily/2021/07/20210731.md)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 愛會記得 NEOWISE 彗星

這是舊年 7 月才翕 ê。 你若是有看著 北斗星,你 to̍h 會當 tī 你 ê 夜空揣著 NEOWISE 彗星。 日落了後,北方 ê 住民會當用目睭直接看著這粒彗星。 伊 to̍h tī 這塊有名 ê 天頂碗公下底,kah 西北爿 ê 地平線面頂。 這粒彗星看起來敢若是一粒霧霧 ê 恆星拖一條尾溜。 毋閣這條尾溜比頂遍記錄著 ê 較短。 頂遍是 2020 年 7 月 23 彗星倚地球上近彼陣,tī Czech 共和國翕著 ê 難忘天景C/2020 F3 (NEOWISE) ê 相片,定定看會著這粒彗星較闊 ê 塗粉尾溜,kah 較暗、分較開 ê 藍色離子尾溜,湠到 目睭看袂著 ê 所在。 世界各國 ê 觀星者實在是 真歡喜看著 NEOWISE 彗星。 伊是 ùi 別个太陽系來的人客。

[POJ] Ài ē kì-tit NEOWISE hui-chhiⁿ

Che-sī kū-nî chhit-goe̍h chiah hip–ê. Lí nā-sī ū khòaⁿ-tio̍h Pak-táu-chhiⁿ, lí to̍h ē-tàng tī lí ê iā-khong chhōe-tio̍h NEOWISE hui-chhiⁿ. Ji̍t-lo̍h liáu-āu, pak-hong ê chū-bîn ē-tàng iōng ba̍k-chiu ti̍t-chiap khòaⁿ-tio̍h chit-lia̍p hui-chhiⁿ. I to̍h tī chit-tè ū-miâ ê thiⁿ-téng óaⁿ-kong ē-té, kah sai-pak-pêng ê tē-pêng-sòaⁿ bīn-téng. Chit-lia̍p hui-chhiⁿ khòaⁿ-khí-lâi ká-ná sī chi̍t-lia̍p bū-bū ê hêng-chhiⁿ thoa chi̍t-tiâu bóe-liu. M̄-koh chit-tiâu bóe-liu pí téng-piàn kì-lo̍k tio̍h ê khah-té. Téng-piàn sī jī-khòng-jī-khòng nî chhit goe̍h jī-saⁿ hui-chhiⁿ óa Tē-kiû siōng-kīn hit-chūn, tī Czech kiōng-hô-kok hip-tio̍h ê lân-bōng thian-kéng. C/jī-khòng-jī-khòng F-saⁿ (NEOWISE) ê siòng-phìⁿ, tiāⁿ-tiāⁿ khòaⁿ-ē-tio̍h chi̍t-lia̍p hui-chhiⁿ khah-khoa̍h ê thô͘-hún bóe-liu, kah khah-àm, pun khah-khui ê nâ-sek lî-chú bóe-liu, thòaⁿ-kàu ba̍k-chiu khòaⁿ-bōe-tio̍h ê só͘-chāi. Sè-kài kok-kok ê koan-seng-chiá si̍t-chāi sī chin hoaⁿ-hí khòaⁿ-tio̍h NEOWISE hui-chhiⁿ. I sī ùi pa̍t-ê thài-iông-hē lâi ê lâng-kheh.

[KIP] Ài ē kì-tit NEOWISE hui-tshinn

Tse-sī kū-nî tshit-gue̍h tsiah hip–ê. Lí nā-sī ū khuànn-tio̍h Pak-táu-tshinn, lí to̍h ē-tàng tī lí ê iā-khong tshuē-tio̍h NEOWISE hui-tshinn. Ji̍t-lo̍h liáu-āu, pak-hong ê tsū-bîn ē-tàng iōng ba̍k-tsiu ti̍t-tsiap khuànn-tio̍h tsit-lia̍p hui-tshinn. I to̍h tī tsit-tè ū-miâ ê thinn-tíng uánn-kong ē-té, kah sai-pak-pîng ê tē-pîng-suànn bīn-tíng. Tsit-lia̍p hui-tshinn khuànn-khí-lâi ká-ná sī tsi̍t-lia̍p bū-bū ê hîng-tshinn thua tsi̍t-tiâu bué-liu. M̄-koh tsit-tiâu bué-liu pí tíng-piàn kì-lo̍k tio̍h ê khah-té. Tíng-piàn sī jī-khòng-jī-khòng nî tshit gue̍h jī-sann hui-tshinn uá Tē-kiû siōng-kīn hit-tsūn, tī Czech kiōng-hô-kok hip-tio̍h ê lân-bōng thian-kíng. C/jī-khòng-jī-khòng F-sann (NEOWISE) ê siòng-phìnn, tiānn-tiānn khuànn-ē-tio̍h tsi̍t-lia̍p hui-tshinn khah-khua̍h ê thôo-hún bué-liu, kah khah-àm, pun khah-khui ê nâ-sik lî-tsú bué-liu, thuànn-kàu ba̍k-tsiu khuànn-buē-tio̍h ê sóo-tsāi. Sè-kài kok-kok ê kuan-sing-tsiá si̍t-tsāi sī tsin huann-hí khuànn-tio̍h NEOWISE hui-tshinn. I sī uì pa̍t-ê thài-iông-hē lâi ê lâng-kheh.

[English] Remembering NEOWISE

It was just last July. If you could see the stars of the Big Dipper, you could find Comet NEOWISE in your evening sky. After sunset denizens of the north could look for the naked-eye comet below the bowl of that famous celestial kitchen utensil and above the northwestern horizon. The comet looked like a fuzzy ‘star’ with a tail, though probably not so long a tail as in this memorable skyview recorded from the Czech Republic on July 23th, 2020, near the comet’s closest approach to planet Earth. Photographs of C/2020 F3 (NEOWISE) often did show the comet’s broad dust tail and fainter but separate bluish ion tail extending farther than the eye could follow. Skygazers around the world were delighted to witness Comet NEOWISE, surprise visitor from the outer Solar System.

詞彙學習(台語漢字/POJ/KIP/華語漢字/English)

  • 【北斗星】Pak-táu-chhiⁿ/Pak-táu-tshinn/北斗七星/Big Dipper
  • 【Czech 共和國】Czech kiōng-hô-kok/Czech kiōng-hô-kok/Czech 共和國/Czech Republic
  • 【塗粉尾】thô͘-hún-bóe/thôo-hún-bué/灰塵尾/dust tail
  • 【離子尾】lî-chú-bóe/lî-tsú-bué/離子尾/ion tail

  1. 逐工 ê 圖 ↩︎

  2. 本站 ê 介紹 (台語/華語) ↩︎

  3. FAQ (華語) ↩︎

昨昏 ê 圖:土星光下 ê 土衛 Mimas 明仔載 ê 圖:強化色彩 ê 冥王星