土星光下 ê 土衛一 Mimas

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Mimas in Saturnlight
• 影像來源：Cassini Imaging Team, SSI, JPL, ESA, NASA
• 台文翻譯：An-Li Tsai (NCU)

[漢羅] 土星光下 ê 土衛一 Mimas

有半爿面一直面對土星 ê 土衛一 Mimas，to̍h ùi 烏影彼爿 kā 咱睨。 伊 to̍h tī 差不多全烏 ê 世界內底，產生這个 戲劇性、反射太陽光 ê 月眉形影。 這个拼鬥影像是 tī 2017 年 1 月 30，Cassini 太空船上尾一改 倚近伊 ê 時陣翕 ê。 Cassini ê kha-mé-lah 囥 tī 面對太陽 ê 方向，離 Mimas 干焦 45000 公里近 ê 所在。 這是其中一个上懸解析度 ê 影像，是一个冷冰冰、隕石坑滿滿是、直徑 400 公里闊 ê 衛星。 有半爿一直面對土星，是因為伊 kah 土星同步自轉 ê 結果。 有一个強化影像會當看著這半爿，是土星反射太陽 ê 光去照著 Mimas ê 影像。 為著欲看著這个影像，你會當 tī 這張影像面頂徙動你 ê 滑鼠（抑是 點這个連結）。 其他 Mimas ê Cassini 影像，閣有 tī 這粒細粒衛星面頂較大 ê、不祥 ê Herschel 隕石坑。

[POJ] Thó͘-chhiⁿ kng hā ê Thó͘-ūi-it Mimas

Ū pòaⁿ-pêng-bīn it-ti̍t bīn-tùi Thó͘-chhiⁿ ê Thó͘-ūi-it Mimas, to̍h ùi o͘-iáⁿ hit-pêng kā lán gîn. I to̍h tī chha-put-to choán-o͘ ê sè-kài lāi-té, sán-seng chit-ê hì-kio̍k-sèng, hoán-siā thài-iông-kng ê goe̍h-bâi hêng-iáⁿ. Chit-ê pheng-tàu-iáⁿ-siōng sī tī jī-khòng-it-chhit nî it goe̍h saⁿ-cha̍p, Cassini thài-khong-chûn siōng-bóe chi̍t-kái óa-kīn i ê sî-chūn hip ê. Cassini ê kha-mé-lah khǹg tī bīn-tùi thài-iông ê hong-hiòng, lî Mimas kan-na sì-bān-gō͘-chheng kong-lí kīn ê só͘-chāi. Che-sī kî-tiong chi̍t-ê siōng-koân kái-sek-tō͘ ê iáⁿ-siōng, sī chi̍t-ê léng-peng-peng, ún-se̍k-kheⁿ boán-boán-sī, ti̍t-kèng sì-pah kong-lí khoah ê ūi-chhiⁿ. Ū pòaⁿ-pêng it-ti̍t bīn-tùi Thó͘-chhiⁿ, sī in-ūi i kah Thó͘-chhiⁿ tóng-pō͘-chū-choán ê kiat-kó. Ū chi̍t-ê kiông-hòa iáⁿ-siōng ē-tàng khòaⁿ-tio̍h chit pòaⁿ-pêng, sī Thó͘-chhiⁿ hoán-siā thài-iông ê kng khì chiò-tio̍h Mimas ê iáⁿ-siōng. Ūi-tio̍h beh khòaⁿ-tio̍h chit-ê iáⁿ-siōng, lí ē-tàng tī chit-tiuⁿ iáⁿ-siōng bīn-téng sóa-tāng lí ê ku̍t-chhí (iah-sī tiám chit-ê liân-kiat). Kî-tha Mimas ê Cassini iáⁿ-siōng, koh-ū tī chit-lia̍p sè-lia̍p ūi-chhiⁿ bīn-téng khah-tōa ê, put-siông ê Herschel ún-se̍k-kheⁿ.

[KIP] Thóo-tshinn kng hā ê Thóo-uī-it Mimas

Ū puànn-pîng-bīn it-ti̍t bīn-tuì Thóo-tshinn ê Thóo-uī-it Mimas, to̍h uì oo-iánn hit-pîng kā lán gîn. I to̍h tī tsha-put-to tsuán-oo ê sè-kài lāi-té, sán-sing tsit-ê hì-kio̍k-sìng, huán-siā thài-iông-kng ê gue̍h-bâi hîng-iánn. Tsit-ê phing-tàu-iánn-siōng sī tī jī-khòng-it-tshit nî it gue̍h sann-tsa̍p, Cassini thài-khong-tsûn siōng-bué tsi̍t-kái uá-kīn i ê sî-tsūn hip ê. Cassini ê kha-mé-lah khǹg tī bīn-tuì thài-iông ê hong-hiòng, lî Mimas kan-na sì-bān-gōo-tshing kong-lí kīn ê sóo-tsāi. Tse-sī kî-tiong tsi̍t-ê siōng-kuân kái-sik-tōo ê iánn-siōng, sī tsi̍t-ê líng-ping-ping, ún-si̍k-khenn buán-buán-sī, ti̍t-kìng sì-pah kong-lí khuah ê uī-tshinn. Ū puànn-pîng it-ti̍t bīn-tuì Thóo-tshinn, sī in-uī i kah Thóo-tshinn tóng-pōo-tsū-tsuán ê kiat-kó. Ū tsi̍t-ê kiông-huà iánn-siōng ē-tàng khuànn-tio̍h tsit puànn-pîng, sī Thóo-tshinn huán-siā thài-iông ê kng khì tsiò-tio̍h Mimas ê iánn-siōng. Uī-tio̍h beh khuànn-tio̍h tsit-ê iánn-siōng, lí ē-tàng tī tsit-tiunn iánn-siōng bīn-tíng suá-tāng lí ê ku̍t-tshí (iah-sī tiám tsit-ê liân-kiat). Kî-tha Mimas ê Cassini iánn-siōng, koh-ū tī tsit-lia̍p sè-lia̍p uī-tshinn bīn-tíng khah-tuā ê, put-siông ê Herschel ún-si̍k-khenn.

[English] Mimas in Saturnlight

Peering from the shadows, the Saturn-facing hemisphere of Mimas lies in near darkness alongside a dramatic sunlit crescent. The mosaic was captured near the Cassini spacecraft’s final close approach on January 30, 2017. Cassini’s camera was pointed in a nearly sunward direction only 45,000 kilometers from Mimas. The result is one of the highest resolution views of the icy, crater-pocked, 400 kilometer diameter moon. An enhanced version better reveals the Saturn-facing hemisphere of the synchronously rotating moon lit by sunlight reflected from Saturn itself. To see it, slide your cursor over the image (or follow this link). Other Cassini images of Mimas include the small moon’s large and ominous Herschel Crater.

詞彙學習（漢羅/POJ/KIP/華語/English）

• 【土衛】Thó͘-ūi/Thóo-uī/土衛/Saturn’s Moon
• 【滑鼠】ku̍t-chhí/ku̍t-tshí/滑鼠/mouse
• 【拼鬥影像】pheng-tàu-iáⁿ-siōng/phing-tàu-iánn-siōng/馬賽克影像/mosaic
• 【解析度】kái-sek-tō͘/kái-sik-tōo/解析度/resolution
• 【同步自轉】tóng-pō͘-chū-choán/tóng-pōo-tsū-tsuán/同步自轉/synchronously rotating