環星系 AM 0644-741

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Ring Galaxy AM 0644-741
• 影像來源：NASA, ESA, Hubble, HLA; Processing: Jonathan Lodge
• 台文翻譯：An-Li Tsai (NCU)

[漢羅] 環星系 AM 0644-741

正爿 ê 大型藍色星系外沿彼輾是一个 直徑 15 萬 光年 闊 ê 巨型環形結構。 伊內底有新形成、足光 ê 大質量恆星。 AM 0644-741 嘛叫做 環星系。 這个環是 kah 巨型 ê 星系相碰產生 ê。 兩个 星系相碰 ê 時陣，in 會互相迵過，毋閣內底 ê 恆星真罕得相拄。 大型星系 ê 環型結構，是較細 ê 入侵星系迵過了後，產生 重力破壞 ê 結果。 Tī 這个時陣，星際氣體 kah 塗粉會壓縮，產生 恆星形成 ê 衝擊波，ùi 衝擊點向外送出去，to̍h 親像水池仔表面行過 ê 水痕仝款。 這幅圖內底 ê 其他星系是背景星系，kah AM 0644-741 無交葛。 前景較光 ê 恆星是 tī 咱 ê 銀河系內底。 毋閣 tī AM 0644-741 ê 正爿面頂，有一个去予伊 ê 引力掠牢、較細 ê 入侵星系，to̍h tī 這幅 哈伯太空望遠鏡 影像 ê 頂懸。 環星系 AM 0644-741 離咱有 3 億光年遠，to̍h tī 南天星座飛魚座 ê 方向。

[POJ] Khoân-seng-hē AM khòng-lio̍k-sù-sù kiám chhit-sù-it

Chiàⁿ-pêng ê tōa-hêng nâ-sek seng-hē gōa-iân hit-liàn sī chi̍t-ê ti̍t-kèng cha̍p-gō͘-bān kng-nî khoah ê kū-hêng khoân-hêng kiat-kò͘. I la-it ū sin hêng-sêng, chiok-kng, ê tōa-chit-liōng hêng-chhiⁿ. AM khòng-lio̍k-sù-sù kiám chhit-sù-it mā kiò-chò Khoân-seng-hē. Chit-ê sī kah kū-hêng ê seng-hē sio-pōng sán-seng ê. Nn̄g-ê seng-hē sio-pōng ê sî-chūn, in ē hō͘-siong thàng–kòe, m̄-koh lāi-té ê hêng-chhiⁿ chin hán-tit sio-tú. Tōa-hêng seng-hē ê khoân-hêng kiat-kò͘, sī khah-sè ê ji̍p-chhim seng-hē thàng–kòe liáu-āu, sán-seng tiōng-le̍k phò-hoāi ê kiat-kó. Tī chit-ê sî-chūn, seng-chè-khì-thé kah thô͘-hún ē ap-sok, sán-seng hêng-chhiⁿ hêng-sêng ê chhiong-kek-phō, ùi chhiong-kek-tiàm hiòng gōa sàng–chhut-khì, to̍h chhin-chhiūⁿ chúi-tî-á piáu-bīn kiâⁿ-kòe ê chúi-hūn kâng-khóaⁿ. Chit-pak-tô͘ lāi-té ê kî-tha seng-hē sī pōe-kéng seng-hē, kah AM khòng-lio̍k-sù-sù kiám chhit-sù-it bô kau-kat. Chiân-kéng khah-kng ê hêng-chhiⁿ sī tī lán ê Gîn-hô-hē lāi-té. M̄-koh tī AM khòng-lio̍k-sù-sù kiám chhit-sù-it ê chiàⁿ-pêng bīn-téng, ū chi̍t-ê khì hō͘ i ê ín-le̍k lia̍h-tiâu, khah-sè ê ji̍p-chhim-seng-hē, to̍h tī chit-pak Ha-peh thài-khong bōng-oán-kiàⁿ iáⁿ-siōng ê téng-koân. Khoân-seng-hē AM khòng-lio̍k-sù-sù kiám chhit-sù-it lî lán ū saⁿ-ek kng-nî hn̄g, to̍h tī lâm-thian seng-chō Poe-hî-chō ê hong-hiòng.

[KIP] Khuân-sing-hē AM khòng-lio̍k-sù-sù kiám tshit-sù-it

Tsiànn-pîng ê tuā-hîng nâ-sik sing-hē guā-iân hit-liàn sī tsi̍t-ê ti̍t-kìng tsa̍p-gōo-bān kng-nî khuah ê kū-hîng khuân-hîng kiat-kòo. I la-it ū sin hîng-sîng, tsiok-kng, ê tuā-tsit-liōng hîng-tshinn. AM khòng-lio̍k-sù-sù kiám tshit-sù-it mā kiò-tsò Khuân-sing-hē. Tsit-ê sī kah kū-hîng ê sing-hē sio-pōng sán-sing ê. Nn̄g-ê sing-hē sio-pōng ê sî-tsūn, in ē hōo-siong thàng–kuè, m̄-koh lāi-té ê hîng-tshinn tsin hán-tit sio-tú. Tuā-hîng sing-hē ê khuân-hîng kiat-kòo, sī khah-sè ê ji̍p-tshim sing-hē thàng–kuè liáu-āu, sán-sing tiōng-li̍k phò-huāi ê kiat-kó. Tī tsit-ê sî-tsūn, sing-tsè-khì-thé kah thôo-hún ē ap-sok, sán-sing hîng-tshinn hîng-sîng ê tshiong-kik-phō, uì tshiong-kik-tiàm hiòng guā sàng–tshut-khì, to̍h tshin-tshiūnn tsuí-tî-á piáu-bīn kiânn-kuè ê tsuí-hūn kâng-khuánn. Tsit-pak-tôo lāi-té ê kî-tha sing-hē sī puē-kíng sing-hē, kah AM khòng-lio̍k-sù-sù kiám tshit-sù-it bô kau-kat. Tsiân-kíng khah-kng ê hîng-tshinn sī tī lán ê Gîn-hô-hē lāi-té. M̄-koh tī AM khòng-lio̍k-sù-sù kiám tshit-sù-it ê tsiànn-pîng bīn-tíng, ū tsi̍t-ê khì hōo i ê ín-li̍k lia̍h-tiâu, khah-sè ê ji̍p-tshim-sing-hē, to̍h tī tsit-pak Ha-peh thài-khong bōng-uán-kiànn iánn-siōng ê tíng-kuân. Khuân-sing-hē AM khòng-lio̍k-sù-sù kiám tshit-sù-it lî lán ū sann-ik kng-nî hn̄g, to̍h tī lâm-thian sing-tsō Pue-hî-tsō ê hong-hiòng.

[English] Ring Galaxy AM 0644-741

The rim of the large blue galaxy at the right is an immense ring-like structure 150,000 light years in diameter composed of newly formed, extremely bright, massive stars. AM 0644-741 is known as a ring galaxy and was caused by an immense galaxy collision. When galaxies collide, they pass through each other and their individual stars rarely come into contact. The large galaxy’s ring-like shape is the result of the gravitational disruption caused by a small intruder galaxy passing through it. When this happens, interstellar gas and dust become compressed, causing a wave of star formation to move out from the impact point like a ripple across the surface of a pond. Other galaxies in the field of view are background galaxies, not interacting with AM 0644-741. Foreground spiky stars are within our own Milky Way. But the smaller intruder galaxy is caught above and right, near the top of the frame taken by the Hubble Space Telescope. Ring galaxy AM 0644-741 lies about 300 million light years away toward the southern constellation Volans.

詞彙學習（漢羅/POJ/KIP/華語/English）

• 【環星系】Khoân-chhim seng-hē/Khuân-sing-hē/環星系/Ring galaxy
• 【直徑】ti̍t-kèng/ti̍t-kìng/直徑/diameter
• 【入侵星系】ji̍p-chhim-seng-hē/ji̍p-tshim-sing-hē/入侵星系/intruder galaxy
• 【星際氣體】seng-chè-khì-thé/sing-tsè-khì-thé/星際氣體/interstellar gas
• 【飛魚座】Poe-hî-chō/Pue-hî-tsō/飛魚座/Volans