仙女座星系 ê 紫外光影像

Page(/daily/2021/07/20210718.md)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 仙女座星系 ê 紫外光影像

仙女座星系 tī 紫外光看起來是啥款? 伊 ê 星系中心主要是少年藍色恆星 leh 踅。 仙女座星系 離咱干焦 250 萬光年爾爾,伊嘛叫做 M31,伊真正是咱厝邊 ê大星系。 這个星系有 23 萬光年 。 這張華麗 ê 影像,是 NASA ê 星系演化探索計畫 (GALEX) 衛星太空望遠鏡 tī 2003 年翕 ê。 這是 捲螺仔星系 ê 紫外光影像。 仙女座 ê 捲螺仔手骨 tī 可見光影像 足明顯 ê。 毋閣伊 tī 紫外光看起來較成是一个環。 這个環內底有足強 ê 恆星形成活動。 這應該是仙女座星系 kah 伊較細粒 ê 厝邊星系,長株圓星系 M32,tī 2 億年前相碰 ê 證據。 仙女座星系 kah 咱 ê 銀河系 攏是 本底星系團 內底上大質量 ê 成員。 閣幾若十億年了後,in 可能 to̍h 會相碰。 彼 ê 時陣,咱 ê 太陽 大氣會脹大kā 地球食去

[POJ] Sian-lú-chō seng-hē ê Chí-gōa-kng iáⁿ-siōng

Sian-lú-chō seng-hē tī chí-gōa-kng khòaⁿ-khí-lâi sī siáⁿ-khoán? I ê seng-hē tiong-sim chú-iàu sī siàu-liân nâ-sek hêng-chhiⁿ leh se̍h. Sian-lú-chō seng-hē lî lán kan-na nn̄g-pah-gō͘-cha̍p bān kng-nî niā-niā, i mā kiò-chò M-saⁿ-cha̍p-it, i chin-chiàⁿ sī lán chhù-piⁿ ê tōa-seng-hē. Chi̍t-ê seng-hē ū jī-cha̍p-saⁿ bān kng-nî khoah. Chit-tiuⁿ hôa-lē ê iáⁿ-siōng, sī NASA ê seng-hē ián-hòa thàm-soh kè-ōe (GALEX) ūi-chhiⁿ thài-khong bōng-oán-kiàⁿ tī jī-khòng-khòng-saⁿ nî hip–ê. Che sī kńg-lê-á seng-hē ê chí-gōa-kng iáⁿ-siōng. Sian-lú-chō ê kńg-lê-á chhiú-kut tī khó-kiàn-kng iáⁿ-siōng chiok bêng-hián ê. M̄-koh i tī chí-gōa-kng khòaⁿ-khí-lâi khah sêng sī chi̍t-ê khoân. Chi̍t-ê khoân lāi-té ū chiok kiông ê hêng-chhiⁿ hêng-sêng oa̍h-tōng. Che eng-kai sī Sian-lú-chō seng-hē kah i khah sè-lia̍p ê chhù-piⁿ seng-hē, tn̂g-tu-îⁿ seng-hē M-saⁿ-cha̍p-jī, tī nn̄g-ek nî chêng sio-pōng ê chèng-kù. Sian-lú-chō seng-hē kah lán ê Gîn-hô-hē lóng-sī Pún-té Seng-hē-thoân lāi-té siōng-tōa chit-liōng ê sêng-goân. Koh kúi-nā cha̍p-ek nî liáu-āu, in khó-lêng to̍h ē sio-pōng. Hit ê sî-chūn, lán-ê thài-iông tōa-khì ē tiùⁿ-tōa kàu kā Tē-kiû chia̍h-khì.

[KIP] Sian-lú-tsō sing-hē ê Tsí-guā-kng iánn-siōng

Sian-lú-tsō sing-hē tī tsí-guā-kng khuànn-khí-lâi sī siánn-khuán? I ê sing-hē tiong-sim tsú-iàu sī siàu-liân nâ-sik hîng-tshinn leh se̍h. Sian-lú-tsō sing-hē lî lán kan-na nn̄g-pah-gōo-tsa̍p bān kng-nî niā-niā, i mā kiò-tsò M-sann-tsa̍p-it, i tsin-tsiànn sī lán tshù-pinn ê tuā-sing-hē. Tsi̍t-ê sing-hē ū jī-tsa̍p-sann bān kng-nî khuah. Tsit-tiunn huâ-lē ê iánn-siōng, sī NASA ê sing-hē ián-huà thàm-soh kè-uē (GALEX) uī-tshinn thài-khong bōng-uán-kiànn tī jī-khòng-khòng-sann nî hip–ê. Tse sī kńg-lê-á sing-hē ê tsí-guā-kng iánn-siōng. Sian-lú-tsō ê kńg-lê-á tshiú-kut tī khó-kiàn-kng iánn-siōng tsiok bîng-hián ê. M̄-koh i tī tsí-guā-kng khuànn-khí-lâi khah sîng sī tsi̍t-ê khuân. Tsi̍t-ê khuân lāi-té ū tsiok kiông ê hîng-tshinn hîng-sîng ua̍h-tōng. Tse ing-kai sī Sian-lú-tsō sing-hē kah i khah sè-lia̍p ê tshù-pinn sing-hē, tn̂g-tu-înn sing-hē M-sann-tsa̍p-jī, tī nn̄g-ik nî tsîng sio-pōng ê tsìng-kù. Sian-lú-tsō sing-hē kah lán ê Gîn-hô lóng-sī Pún-té Sing-hē-thuân lāi-té siōng-tuā tsit-liōng ê sîng-guân. Koh kuí-nā tsa̍p-ik nî liáu-āu, in khó-lîng to̍h ē sio-pōng. Hit ê sî-tsūn, lán-ê thài-iông tuā-khì ē tiùnn-tuā kàu kā Tē-kiû tsia̍h-khì.

[English] The Andromeda Galaxy in Ultraviolet

What does the Andromeda galaxy look like in ultraviolet light? Young blue stars circling the galactic center dominate. A mere 2.5 million light-years away, the Andromeda Galaxy, also known as M31, really is just next door as large galaxies go. Spanning about 230,000 light-years, it took 11 different image fields from NASA’s Galaxy Evolution Explorer (GALEX) satellite telescope to produce this gorgeous portrait of the spiral galaxy in ultraviolet light in 2003. While its spiral arms stand out in visible light images, Andromeda’s arms look more like rings in ultraviolet. The rings are sites of intense star formation and have been interpreted as evidence that Andromeda collided with its smaller neighboring elliptical galaxy M32 more than 200 million years ago. The Andromeda galaxy and our own comparable Milky Way galaxy are the most massive members of the Local Group of galaxies and are projected to collide in several billion years – perhaps around the time that our Sun’s atmosphere will expand to engulf the Earth.

詞彙學習(台語漢字/POJ/KIP/華語漢字/English)

  • 【仙女座星系】Sian-lú-chō/Sian-lú-tsō/仙女座星系/Andromeda Galaxy
  • 【捲螺仔星系】kńg-lê-á seng-hē/kńg-lê-á sing-hē/螺旋星系/spiral galaxy
  • 【捲螺仔手骨】kńg-lê-á chhiú-kut/kńg-lê-á tshiú-kut/螺旋手臂、旋臂/spiral arm
  • 【長株圓星系】tn̂g-tu-îⁿ seng-hē/tn̂g-tu-îⁿ sing-hē/橢圓星系/elliptical galaxy
  • 【本底星系團】Pún-té Seng-hē-thoân/Pún-té Sing-hē-thuân/本底星系團/the Local Group

  1. 逐工 ê 圖 ↩︎

  2. 本站 ê 介紹 (台語/華語) ↩︎

  3. FAQ (華語) ↩︎

昨昏 ê 圖:Alphonsus kah Arzachel 明仔載 ê 圖:樹林仔內底 ê 夜景:銀河 ê 窗仔門