土星 kah 伊 ê 六粒衛星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Saturn and Six Moons
• 影像來源 kah 版權：Mohammad Ranjbaran; MR Thanks: Amir Ehteshami
• 台文翻譯：An-Li Tsai (NCU)

[漢羅] 土星 kah 伊 ê 六粒衛星

土星有幾粒衛星？ 這馬已經揣著 82 粒矣。 上細粒 ê 根本無夠一公里闊。 這幅圖內底有上大粒 ê 六粒 衛星，是 13 張 tùi 較光 ê 行星短時間感光，kah 13 張 tùi 較光 ê 衛星長時間感光 ê 組合圖。 這是頂個月 開 兩禮拜 ê 時間翕 ê。 In 比月球較大，嘛比 金星 閣較大淡薄仔。 土星上大粒 ê 衛星，土衛六 Titan ê 直徑是 5150 公里闊。 伊踅土星這粒 有環母行星 ê 完整運行軌道，差不多攏有翕著。 土星第一粒予人知影 ê 衛星是 Titan，伊是 1655 年 荷蘭天文學家 Christiaan Huygens 發現 ê。 毋閣 最近發現 ê 幾若粒新 ê 衛星 是 tī 2019 年發現 ê。 Tī 軌道上正爿彼粒是土星第三大 ê 衛星，土衛八 Iapetus。 畫出來 ê Iapetus 軌道半徑實在是足大 ê，所以 tī 遮干焦看會著一部份爾爾。 這個月 土星會 chhōa 木星 行過夜空，tī 日頭落山了後 ùi 東南爿 peh--起來，到 天光 進前攏看會著。

[POJ] Thó͘-chhiⁿ kah i ê la̍k-lia̍p ūi-chhiⁿ

Thó͘-chhiⁿ ū kúi-lia̍p ūi-chhiⁿ? Chit-má í-keng chhōe-tio̍h poeh-cha̍p-jī lia̍p ah. Siōng-sè-lia̍p ê kin-pún bô-kàu chi̍t-kong-lí khoah. Chit-pak-tô͘ lāi-té ū tōa-lia̍p ê la̍k-lia̍p ūi-chhiⁿ, sī cha̍p-saⁿ tiuⁿ tùi khah-kng ê kiâⁿ-chhiⁿ té sî-kan kám-kng, kah cha̍p-saⁿ tiuⁿ tùi khah-kng ê ūi-chhiⁿ tn̂g sî-kan kám-kng ê cho͘-ha̍p-tô͘. Che sī téng-kò-goe̍h khai nn̄g-lé-pài ê sî-kan hip--ê. In pí Goe-kiú khah-tōa, mā pí Kim-chhiⁿ koh-khah tōa tām-po̍h-á. Thó͘-chhiⁿ siōng tōa-lia̍p ê ūi-chhiⁿ, Thó͘-ūi-la̍k Titan ê ti̍t-kèng sī gō͘-chheng-gō͘-pah kong-lí khoah. I se̍h Thó͘-chhiⁿ chit-lia̍p ū-khoân bú-kiâⁿ-chhiⁿ ê oân-chéng ūn-hêng kúi-tō, chha-put-to lóng-ū hip-tio̍h. Thó͘-chhiⁿ tē-it-lia̍p hō͘ lâng chai-iáⁿ ê ūi-chhiⁿ sī Titan, i sī it-lio̍k-ngó͘-ngó͘ nî Hô-lân thian-bûn-ha̍k-ka Christiaan Huygens hoat-hiān--ê. M̄-koh chòe-kīn hoat-hiān ê kúi-ā-lia̍p sin--ê ūi-chhiⁿ sī tī jī-khòng-i̍t-kiú nî hoat-hiān--ê. Tī kúi-tō siōng chiàⁿ-pêng hit-lia̍p sī Thó͘-chhiⁿ tē-saⁿ-tōa ê ūi-chhiⁿ, Thó͘-ūi-poeh Iapetus. Ōe--chhut-lâi ê Iapetus kúi-tō pòaⁿ-kèng si̍t-chāi sī chiok-tōa--ê, só͘-í tī chiah kan-na khòaⁿ-ē-tio̍h chi̍t-pō͘-hūn niā-niā. Chi̍t-kò-goe̍h Thó͘-chhiⁿ ē chhōa Bo̍k-chhiⁿ kiâⁿ-kòe iā-khong, tī ji̍t-thâu lo̍h-soaⁿ liáu-āu ùi tang-lâm-pêng peh--khí-lâi, kàu thiⁿ-khì chìn-chêng lóng khòaⁿ-ē-tio̍h.

[KIP] Thóo-tshinn kah i ê la̍k-lia̍p uī-tshinn

Thóo-tshinn ū kuí-lia̍p uī-tshinn? Tsit-má í-king tshuē-tio̍h pueh-tsa̍p-jī lia̍p ah. Siōng-sè-lia̍p ê kin-pún bô-kàu tsi̍t-kong-lí khuah. Tsit-pak-tôo lāi-té ū tuā-lia̍p ê la̍k-lia̍p uī-tshinn, sī tsa̍p-sann tiunn tuì khah-kng ê kiânn-tshinn té sî-kan kám-kng, kah tsa̍p-sann tiunn tuì khah-kng ê uī-tshinn tn̂g sî-kan kám-kng ê tsoo-ha̍p-tôo. Tse sī tíng-kò-gue̍h khai nn̄g-lé-pài ê sî-kan hip--ê. In pí Gue-kiú khah-tuā, mā pí Kim-tshinn koh-khah tuā tām-po̍h-á. Thóo-tshinn siōng tuā-lia̍p ê uī-tshinn Titan ê ti̍t-kìng sī gōo-tshing-gōo-pah kong-lí khuah. I se̍h Thóo-tshinn tsit-lia̍p ū-khuân bú-kiânn-tshinn ê uân-tsíng ūn-hîng kuí-tō, tsha-put-to lóng-ū hip-tio̍h. Thóo-tshinn tē-it-lia̍p hōo lâng tsai-iánn ê uī-tshinn sī Titan, i sī it-lio̍k-ngóo-ngóo nî Hô-lân thian-bûn-ha̍k-ka Tsristiaan Huygens huat-hiān--ê. M̄-koh tsuè-kīn huat-hiān ê kuí-ā-lia̍p sin--ê uī-tshinn sī tī jī-khòng-i̍t-kiú nî huat-hiān--ê. Tī kuí-tō siōng tsiànn-pîng hit-lia̍p sī Thóo-tshinn tē-sann-tuā ê uī-tshinn, Iapetus. Uē--tshut-lâi ê Iapetus kuí-tō puànn-kìng si̍t-tsāi sī tsiok-tuā--ê, sóo-í tī tsiah kan-na khuànn-ē-tio̍h tsi̍t-pōo-hūn niā-niā. Tsi̍t-kò-gue̍h Thóo-tshinn ē tshuā Bo̍k-tshinn kiânn-kuè iā-khong, tī ji̍t-thâu lo̍h-suann liáu-āu uì tang-lâm-pîng peh--khí-lâi, kàu thinn-khì tsìn-tsîng lóng khuànn-ē-tio̍h.

[English] Saturn and Six Moons

How many moons does Saturn have? So far 82 have been confirmed, the smallest being only a fraction of a kilometer across. Six of its largest satellites can be seen here in a composite image with 13 short exposure of the bright planet, and 13 long exposures of the brightest of its faint moons, taken over two weeks last month. Larger than Earth's Moon and even slightly larger than Mercury, Saturn's largest moon Titan has a diameter of 5,150 kilometers and was captured making nearly a complete orbit around its ringed parent planet. Saturn's first known natural satellite, Titan was discovered in 1655 by Dutch astronomer Christiaan Huygens, in contrast with several newly discovered moons announced in 2019. The trail on the far right belongs to Iapetus, Saturn's third largest moon. The radius of painted Iapetus' orbit is so large that only a portion of it was captured here. Saturn leads Jupiter across the night sky this month, rising soon after sunset toward the southeast, and remaining visible until dawn.

詞彙學習