紙月娘 ê 日食

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：A Paper Moon Solar Eclipse
• 影像來源 kah 版權：Wang Letian (Eyes at Night)
• 台文翻譯：An-Li Tsai (NCU)

[漢羅] 紙月娘 ê 日食

這看起來敢若是 紙糊 ê 月娘 ùi 帆布做 ê 日頭頭前駛過。 毋閣彼毋是紙枋做 ê 雲。 這 毋是假 ê 景色。 這張相片 ê 柑仔色天色 是真 ê。 是這個月初發生 [日食][solar eclipse] ê 時陣，kā 兩張無仝感光 ê 相片，數位組合起來 ê。 第一擺 ê 感光 是用一般望遠鏡翕ê。 翕著過分感光 ê 日頭 kah 無夠分感光 ê 月娘。 第二擺 ê 影像是用 [太陽望遠鏡][solar telescope t] 翕 ê。 翕著背景太陽 ê 色球層 ê 詳細狀況。 這个 親像帆布布料 ê 太陽是 ùi 水素 發射 ê 一个足 特殊 ê 紅影 顯影來 ê。 幾若个日珥會使 tī 太陽外沿看著。 這張影像是 tī 中國 內蒙古 Xilingol 日頭落山進前翕 ê。 實際上，月球 是足密 ê 岩石做 ê，太陽 是足燒 ê 氣體做 ê，雲 是 浮 tī 天頂 ê 水滴 kah 冰滴做 ê。

[POJ] Chóa Goe̍h-niû ê Ji̍t-si̍t

Che khòaⁿ–khí-lâi ká-ná sī chóa kô͘–ê Goe̍h-niû ùi phâng-pò͘ chòe–ê Ji̍t-thâu thâu-chêng sái–kòe. M̄-koh he m̄-sī chóa-pang chòe–ê hûn. Che m̄-sī ké–ê kéng-sek. Chit-tiuⁿ siòng-phìⁿ ê kam-á-sek thiⁿ-sek sī chin–ê. Sī chi̍t-ko-goe̍h-chhoe hoat-seng ji̍t-si̍t ê sî-chūn, kā nn̄g-tiuⁿ bô-kâng kám-kng ê siòng-phìⁿ, só͘-ūi cho͘-ha̍p–khí-lâi-ê. Tē-it-pái ê kám-kng sī iōng it-poaⁿ bōng-oán-kiàⁿ hip–ê. Hip-tio̍h kòe-hun kám-kng ê ji̍t-thâu kah bô-kàu-hun kám-kng ê Goe̍h-niû. Tē-jī-pái ê iáⁿ-siōng sī iōng thài-iông bōng-oán-kiàⁿ hip–ê. Hip-tio̍h pōe-kéng Thài-iông ê sek-kiû-chân ê siông-sè chōng-hóng. Chit-ê chhin-chhiūⁿ phâng-pò͘ pò͘-liāu ê thài-iông sī ùi chúi-sò͘ hoat-siā ê chi̍t-ê te̍k-sû ê âng-iáⁿ hián-iáⁿ lâi–ê. Kúi-nā-ê ji̍t-jíⁿ ē-sái tī thài-iông gōa-iân khòaⁿ-tio̍h. Chit-tiuⁿ iáⁿ-siōng sī tī Tiong-kok Lōe Bông-kó͘ Xilingol ji̍t-thâu lo̍h-soaⁿ chìn-chêng hip–ê. Si̍t-chè-siōng, Goe̍h-kiû sī chiok-ba̍t ê giâm-chio̍h chòe–ê, Thài-iông sī chiok-sio ê khì-thé chòe–ê, hûn sī phû tī thiⁿ-téng ê chúi-tih kah peng-tih chòe–ê.

[KIP] Tsuá Gue̍h-niû ê Ji̍t-si̍t

Tse khuànn-khí-lâi ká-ná sī tsuá kôo–ê Gue̍h-niû uì phâng-pòo tsuè–ê Ji̍t-thâu thâu-tsîng sái–kuè. M̄-koh he m̄-sī tsuá-pang tsuè–ê hûn. Tse m̄-sī ké–ê kíng-sik. Tsit-tiunn siòng-phìnn ê kam-á-sik thinn-sik sī tsin–ê. Sī tsi̍t-ko-gue̍h-tshue huat-sing ji̍t-si̍t ê sî-tsūn, kā nn̄g-tiunn bô-kâng kám-kng ê siòng-phìnn, sóo-uī tsoo-ha̍p–khí-lâi-ê. Tē-it-pái ê kám-kng sī iōng it-puann bōng-uán-kiànn hip–ê. Hip-tio̍h kuè-hun kám-kng ê ji̍t-thâu kah bô-kàu-hun kám-kng ê Gue̍h-niû. Tē-jī-pái ê iánn-siōng sī iōng thài-iông bōng-uán-kiànn hip–ê. Hip-tio̍h puē-kíng Thài-iông ê sik-kiû-tsân ê siông-sè tsōng-hóng. Tsit-ê tshin-tshiūnn phâng-pòo pòo-liāu ê thài-iông sī uì tsuí-sòo huat-siā ê tsi̍t-ê ti̍k-sû ê âng-iánn hián-iánn lâi–ê. Kuí-nā-ê ji̍t-jínn ē-sái tī thài-iông guā-iân khuànn-tio̍h. Tsit-tiunn iánn-siōng sī tī Tiong-kok Luē Bông-kóo Xilingol ji̍t-thâu lo̍h-suann tsìn-tsîng hip–ê. Si̍t-tsè-siōng, Gue̍h-kiû sī tsiok-ba̍t ê giâm-tsio̍h tsuè–ê, Thài-iông sī tsiok-sio ê khì-thé tsuè–ê, hûn sī phû tī thinn-tíng ê tsuí-tih kah ping-tih tsuè–ê.

[English] A Paper Moon Solar Eclipse

It may look like a paper Moon. Sailing past a canvas Sun. But those are not cardboard clouds. And it’s not make believe. The featured picture of an orange colored sky is real – a digital composite of two exposures of the solar eclipse that occurred earlier this month. The first exposure was taken with a regular telescope that captured an overexposed Sun and an underexposed Moon, while the second image was taken with a solar telescope that captured details of the chromosphere of the background Sun. The Sun’s canvas-like texture was brought up by imaging in a very specific shade of red emitted by hydrogen. Several prominences can be seen around the Sun’s edge. The image was captured just before sunset from Xilingol, Inner Mongolia, China. It’s also not make-believe to imagine that the Moon is made of dense rock, the Sun is made of hot gas, and clouds are made of floating droplets of water and ice.

詞彙學習（漢羅/POJ/KIP/華語/English）

• 【日食】ji̍t-si̍t/ji̍t-si̍t/日食/solar eclipse
• 【太陽望遠鏡】thài-iông bōng-oán-kiàⁿ/thài-iông bōng-uán-kiànn/太陽望遠鏡/solar telescope
• 【日珥】ji̍t-jíⁿ/ji̍t-jínn/日珥/prominence
• 【水素】chúi-sò͘/tsuí-sòo/氫/hydrogen
• 【色球層】sek-kiû-chân/sik-kiû-tsân/色球層/chromosphere
• 【過分感光】kòe-hun kám-kng/kuè-hun kám-kng/過度曝光/overexpose
• 【無夠分感光】bô-kàu-hun kám-kng/bô-kàu-hun kám-kng/曝光不足/underexpose